༢༠༡༢ ཟླ་ ༣ ཚེས་ ༦ རེས་གཟའ་མིག་དམར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་ཕྱི་ལོ་ ༢༠༡༢ ཟླ་ ༣ ཚེས་ ༥ ཉིན་བཏང་གནས་ནང་འཁོད་དོན། ཕྱི་ལོ ༢༠༡༢ ཟླ ༣ ཚེས ༥ ཉིན་བོད་ནང་གི་ཕྱི་དྲོའི་ཆུ་ཚོད ༦།༣༠ ཙམ་ལ། རྔ་པ་རྫོང་གཅའ་ཞང་གཅའ་རུ་བའི་གཤོག་སྨད་མའི་མགར་སྐྱ་ཚང་གི་བུ་རྡོ་རྗེ་ལགས་རང་ལོ ༡༨ ཡིན་པ་དང་། ཕ་མིང་ལ་ཅཱ་ཅཱ་ཡིན་པ། ཁོང་གིས་རང་ལུས་མེར་སྲེག་གིས་རྒྱ་ནག་གཞུང་ནས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་སྐད་འབོད་བྱེད་བཞིན་གཅའ་ཞང་ཐོག་དང་ཐག་ཉེ་བའི་ཟམ་ཁ་ཞིག་ནས་གཅའ་ཞང་ཐོག་གི་རྒྱ་མིའི་ལས་ཁུངས་བར་གོམ་འགྲོས་གནང་འདུག
གནས་ཚུལ་འགྲེལ་བརྗོད་པས་བཤད་དོན་ལྟར་ན། དུས་ཐོག་ལ་ཉེན་རྟོག་པ་དང་དྲག་ཆས་ཉེན་རྟོག་པ་སོགས་སླེབས་མེད་པ་དང་ས་གནས་ཀྱི་བོད་མི་རྣམས་ཀྱིས་མེ་མ་བསད་པར་འབར་བཅུག་ཡོད་སྟབས། མེས་ཤུགས་ཆེན་པོ་ཚིགས་ཏེ་སྐབས་ཐོག་དེར་སྐུ་གྲོངས་འདུག བོད་མི་རྣམས་ཀྱིས་ཕུང་པོ་ཁྱེར་བརྩིས་བྱེད་སྐབས་ཉེན་རྟོག་པ་སོགས་སླེབས་ཏེ་ཕུང་པོ་བཙན་འཕྲོག་གིས་རྔ་པ་རྫོང་ཐོག་ཏུ་ཁྱེར་འདུག གཅའ་ཞང་ནི་རྔ་པ་རྫོང་ཐོག་ནས་ཤར་ཕྱོགས་སུ་སྤྱི་ལེ་ ༧༠ ཙམ་གྱི་སར་ཡོད་པ་དང་། དེང་སྐབས་རྒྱ་ནག་གིས་ས་བགོས་བྱེད་སྟངས་ལྟར་ན་འབྲོག་སྡེ་གཅའ་རུ་བ་དང་། རྭ་རུ་བ། ནག་ཚང་མ་བཅས་ཀྱི་ཞང་ཡིན་འདུག་པ་བཅས། །
རྔ་པར་བུ་རྡོ་རྗེ་ལགས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བ།
གསར་གནས།
འབྲེལ་གནས།
