༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་ལྷོ་བྱང་ཨ་རིའི་ཁུལ་གྱི་བོད་མི་མང་སྤྱི་འཐུས་བསྟན་འཛིན་འཇིགས་མེད་ལགས་ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༥ ནས་ ༡༨ བར་ས་བགོས་ཁྱབ་ཁོངས་ཨ་རིའི་གྲོང་ཁྱེར་ཤཱི་ཁ་གྷོ་ (Chicago) དང་། མེ་ཌི་སན་ (Madison) ནང་གཞུང་འབྲེལ་ས་བགོས་ཕྱོགས་བསྐྱོད་གནང་གཏན་ཁེལ་ཡོད།གཞི་རྩའི་ལྷོ་བྱང་ཨ་རི་ཁུལ་དང་། ཡུ་རོབ་དང་ཨ་ཕི་རི་ཀའི་ཁུལ། རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སེ་ཀྲེ་ལེ་ཤི་ཡའི་ཁུལ་བཅས་ཀྱི་བོད་མི་མང་སྤྱི་འཐུས་རྣམ་པ་སོ་སོའི་ཁྱབ་ཁོངས་སུ་དེ་སྔོན་ས་བགོས་ཕྱོགས་བསྐྱོད་ཕེབས་ལམ་མེད་ནའང་། བོད་མི་མང་སྤྱི་འཐུས་སྐབས་ ༡༧ པའི་སྐབས་སུ་འབྲེལ་ཡོད་སྤྱི་འཐུས་རྣམ་པ་དང་། དཔལ་ལྡན་ཚོགས་གཙོ་སྦྲེལ་པོའི་དབར་བཀའ་བསྡུར་སྔ་རྗེས་དང་། རིམ་པས་སྤྱི་འཐུས་རྒྱུན་ལས་ལྷན་ཚོགས་ནང་དང་། འཛིན་སྐྱོང་བཅས་ཀྱི་ལྷན་བཀའ་བསྡུར་ཞུས་རྗེས། སྤྱི་འཐུས་ལས་ཡུན་རིང་ཁྱབ་ཁོངས་ས་གནས་སུ་ཐེངས་རེར་ས་བགོས་ཕྱོགས་བསྐྱོད་གནང་རྒྱུའི་ལས་རིམ་གཏན་ཁེལ་ཡོད་པ་དང་། ས་བགོས་ཕྱོགས་བསྐྱོད་ཀྱི་ལས་རིམ་བཟོ་ཕྱོགས་ཐད། འབྲེལ་ཡོད་སྤྱི་འཐུས་རྣམ་པ་དང་། སྐུ་ཚབ་དོན་གཅོད། བོད་རིགས་ཚོགས་པ་བཅས་སོ་སོར་བཀའ་བསྡུར་གནང་སྟེ་ལས་རིམ་བཟོ་རྒྱུ་གནང་ཡོད་པ་བཅས། །
