༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༣༠ ཉིན་གློ་སྒྲིག་ས་གནས་འགོ་འཛིན་གསར་རྙིང་དབར་རྩིས་སྤྲོད་རྩིས་ལེན་ལས་དོན་དངོས་སུ་འགོ་འཛུགས་གནང་ཡོད།དེ་ཡང་ས་འགོའི་ཁྱབ་ཁོངས་བཀྲ་ཤིས་སྒང་དང་། དཔལ་འབྱོར་གླིང་། བྱམས་པ་གླིང་བཅས་ས་གནས་གསུམ་བང་རིམ་བཞིན་སྤྲོད་དཔང་གི་ཞིབ་འཇུག་ལས་དོན་ཞུ་སྒོའི་ལམ་སྟོན་གཞིར་བཟུང་རྩིས་སྤྲོད་ལེན་ལས་དོན་མཐའ་དག་ཁམས་གཙང་བདེ་བླག་ངང་བསྒྲུབས་ནས་ཕྱི་ཟླ་ ༡༡ ཚེས་ ༢ ཉིན་གྱི་སྔ་དྲོ་ཆུ་ཚོད་ ༡༠ ཐོག་བྱམས་པ་གླིང་ས་གནས་སུ་གློ་སྒྲིག་ས་གནས་འགོ་འཛིན་ལས་ཁུངས་ནང་དུ་གློ་སྒྲིག་བདེ་དོན་ཚོགས་པའི་ཚོགས་གཙོ་དང་། ས་འཐུས་ཚོགས་གཞོན། རང་བདེན་ཚོགས་གཙོ། སློབ་གྲྭའི་དགེ་ཆེ། ས་གནས་གཞོན་ནུ་དང་བུད་མེད་ཚོགས་གཙོ། སྤྱི་མི་བརྒྱ་དཔོན། ལས་བྱེད་བཅས་ཚང་འཛོམས་ཐོག་ཞབས་སྟེགས་བརྗེ་ལེན་གྱི་མཛད་སྒོ་ཞིག་ཚོགས་ཡོད།
སྐབས་དེར་ས་གནས་འགོ་འཛིན་ཟུར་པ་ནས་རང་ཉིད་ཀྱི་ལས་ཡུན་རིང་གི་མྱོང་ཚོར་དང་འབྲེལ་ཐུགས་རྗེ་ཆེ་ཞུའི་གསུང་བཤད་གནང་རྗེས་ས་གནས་འགོ་འཛིན་གསར་རྙིང་དབར་ཞབས་སྟེགས་བརྗེ་ལེན་ཞུས་འཕྲལ་རྟེན་མཚོན་གསོལ་ཇ་འབྲས་བསིལ་འདེགས་འབུལ་ཞུས། དེ་ནས་ནང་སྲིད་སྐུ་ཚབ་སྤྲོད་དཔང་ནས་རྩིས་སྤྲོད་རྩིས་ལེན་གྱི་ལས་དོན་བརྒྱུད་རིམ་དང་གནས་སྟངས་མཐོང་ཚུལ་གསལ་བཤད་འགྲེལ་བརྗོད་ཞུས། དེ་ནས་ས་འགོ་གསར་པ་ཀརྨ་བཟོད་པ་འཕྲིན་ལས་ལགས་ཀྱིས་འགོ་ལས་ཡོངས་ལ་འཚམས་འདྲིའི་གསུང་བཤད་གནང་རྗེས་གློ་སྒྲིག་བདེ་དོན་ཚོགས་པའི་ཚོགས་གཙོ་འཕྲིན་ལས་ཀུན་ཕན་ལགས་ནས་ས་འགོ་གསར་རྙིང་གཉིས་ལ་དགའ་བསུའི་འཚམས་འདྲི་དང་ཐུགས་རྗེ་ཞུའི་གསུང་བཤད་གནང་ནས་ཞབས་སྟེགས་བརྗེ་ལེན་མཛད་སྒོར་བདེ་བླག་ངང་གྲུབ།
དེ་ནས་དེ་སྔོན་བཀྲ་ཤིས་སྒང་དང་དཔལ་འབྱོར་གླིང་གཞིས་ཆགས་གཉིས་སུ་རྩིས་སྤྲོད་ལེན་གྱི་ལས་དོན་གྲུབ་རིམ་བཞིན་མི་མང་འདུ་འཛོམས་སར་རྩིས་སྤྲོད་རྩིས་ལེན་གྱི་ལས་དོན་གནས་སྟངས་གསལ་བཤད་དང་སྦྲགས། ས་འགོ་གསར་པ་ངོ་སྤྲོད་དང་རྙིང་པས་ཐོན་ཕྱག་གསུང་བཤད་གནང་བ་བཞིན། བྱམས་པ་གླིང་གཞིས་ཆགས་སུ་ཡང་གློ་སྒྲིག་ས་གནས་ཀྱི་འགོ་ལས་དང་གཞིས་ཆགས་མི་མང་ལྷན་འཛོམས་ཐོག་ས་འགོ་ཟུར་པ་ནས་མང་ཚོགས་ལ་ས་འགོ་གསར་པ་ངོ་སྤྲོད་དང་འབྲེལ་ཐོན་ཕྱག་གཏམ་བཤད་ཞིབ་རྒྱས་གནང་བ་དང་། སྤྲོད་དཔང་ནས་རྩིས་སྤྲོད་རྩིས་ལེན་གྱི་ལས་དོན་ལེགས་གྲུབ་གསལ་བཤད། དེ་ནས་ས་འགོ་གསར་པས་འཚམས་འདྲིའི་གསུང་བཤད་གནང་རྗེས། ས་འཐུས་ཚོགས་གཞོན་བཀྲ་ཤིས་ཆོས་འཕེལ་ལགས་ནས་ས་འགོ་གསར་རྙིང་གཉིས་ལ་དགའ་བསུ་དང་ཐུགས་རྗེ་ཆེ་ཞུས་འཕྲལ་འགོ་མང་ཡོངས་ནས་ལེགས་གསོའི་མཇལ་དར་སྒྲོན་འབུལ་ཞུས་པ་བཅས། །
