༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༠༤ ནས་ ༠༩ བར་ཨི་ཊ་ལིའི་ཝི་མ་ལ་རོགས་ཚོགས་ (Vimala Association) དང་། ཨི་ཊ་ལི་ནང་པའི་ཚོགས་པ། (Unione Biddhista Italiana ) ཝ་ཧི་སི་ཊི་ན་ཐེབས་རྩའི་ (Wise Dana Foundation) ཚོགས་མི་ཁག་ཅིག་སྦེལ་ཀོབ་ལུགས་བསམ་བོད་མིའི་གཞིས་ཆགས་སུ་ཕེབས་ཏེ། རོགས་ཚོགས་དེ་དག་གི་མཐུན་འགྱུར་འོག་དེ་སྔའི་ལས་གཞི་ལེགས་གྲུབ་བྱུང་བ་ཁག་ལ་གཟིགས་ཞིབ་དང་། འབྱུང་འགྱུར་བོད་མིའི་བདེ་དོན་ལ་སྨན་པའི་ལས་འཆར་གང་ཞིག་སྤེལ་དགོས་མིན་ཐད་གཟིགས་སྐོར་གནང་ཡོད།

དེ་ཡང་དེ་སྔོན་རོགས་ཚོགས་དེ་དག་བརྒྱུད་གཞིས་ཆགས་ནང་བོད་མི་ཉམ་ཐག་འཁོས་ཞན་ཚོར་སྡོད་ཁང་དང་། ཚོང་ཁང་། ཟ་ཁང་། གསང་སྤྱོད་སོགས་ཀྱི་དགོས་མཁོའི་མཐུན་རྐྱེན་སྦྱོར་སྤྲོད་གནང་ཡོད་པ་མ་ཟད། སཾ་བྷོ་ཊ་སློབ་གྲྭའི་ཚོགས་ཁང་གསར་བཟོ་དང་། གསང་སྤྱོད་བཟོ་བཅོས། ཁང་པར་ཚོན་གཏང་རྒྱུ། དེ་བཞིན་ཁང་ཐོག་རྒྱག་ཆེད་རོགས་སྐྱོར་གནང་ཡོད།

གཟིགས་སྐོར་སྐབས་སུ་ཝི་མ་ལ་རོགས་ཚོགས་ཀྱི་ཚོགས་གཙོ་ལྕམ་སྐུ་ཊེ་བི་ཀ་ར་ནི་ (Debbie Carrani) ལགས་དང་། ཨི་ཊ་ལི་ནང་པ་ཚོགས་པའི་སྐུ་ཞབས་ཕི་ལི་པོ་ (Fillipo Scianna) ལགས། ཝ་ཧི་སི་ཊེ་ན་ཐེབས་རྩའི་ངེས་སྟོན་པ་ཨན་རི་ཀ་ལོ་བི་ན་ (Enrica Lobina) ལགས་ཀྱི་སྣེ་ཁྲིད་པའི་ཚོགས་མི་གྲངས་ ༣༠ ཕེབས་ཡོད་ཅིང་། ཁོང་རྣམས་བོད་མིའི་གཞིས་ཆགས་དང་། དགོན་སྡེ། སློབ་གྲྭ སྨན་ཁང་། རྒས་གསོ་ཁང་དུ་གཟིགས་སྐོར་དུ་ཕེབས་ཡོད་པ་རེད།

ཕྱི་ཚེས་ ༠༩ ཉིན་ལུགས་བསམ་ས་གནས་འགོ་འཛིན་ལས་ཁུངས་དང་། ས་གནས་མཉམ་སྦྲེལ། བོད་ཁྱིམ་སློབ་གྲྭ འཚོ་བྱེད་སྨན་ཁང་ཐུན་མོང་ནས་སྦྱིན་བདག་རྣམས་ལ་ཐུགས་རྗེ་ལེགས་འབུལ་མཚོན་ཆེད་དགོང་ཚིགས་འདེགས་འབུལ་ཞུས་པ་དང་སྦྲགས། བོད་ཁྱིམ་སློབ་གྲྭ་དང་། སཾ་བྷོ་ཊ་སློབ་གྲྭ་གཉིས་ཀྱི་སློབ་ཕྲུག་རྣམས་ནས་རིག་གཞུང་འཁྲབ་སྟོན་གནང་བའི་ཁར། སྐུ་མགྲོན་རྣམས་ལ་བཀའ་དྲིན་རྗེས་དྲན་ཞུ་སླད་དྲན་རྟེན་ཕྱག་རྟགས་རེ་ཕུལ་ཡོད་པ་བཅས།།