༄༅། །ཆོས་རིག་ལས་ཁུངས་ནས་ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༡ ནས་ ༢༢ བར་དྷ་ས་བོད་ཀྱི་དཔེ་མཛོད་ཁང་དུ་དགེ་འདུན་པའི་ཚན་རིག་ངོ་སྤྲོད་ཟབ་སྦྱོང་ཐེངས་དགུ་པ་གོ་སྒྲིག་ཞུས་ཡོད།
དེ་ཡང་ཕྱི་ལོ་ ༢༠༡༡ ལོར་ཆོས་ཚོགས་བཅུ་གཅིག་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལུང་རྟོགས་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གནང་ཕྱོགས་ཟབ་གསལ་ལམ་སྟོན་ཇི་སྙེད་ཕེབས་པ་དང་། ཆོས་རིག་ལས་ཁུངས་ནས་ཕྱི་ལོ་ ༢༠༡༣ ལོར་ཆོས་བརྒྱུད་རིས་མེད་དགོན་སྡེ་ཆེ་གྲས་ལྔ་བཅུའི་སྐོར་གྱི་སྐུ་ཚབ་གདན་ཞུས་ཀྱིས་བཤད་སྒྲུབ་བསྟན་པ་གོང་འཕེལ་ལྷན་ཚོགས་ཞེས་པ་བསྐོངས་ཚོགས་བགྱིས་ཏེ་བཀའ་བསྡུར་ཞིབ་ལྷུག་གནང་སྐབས་ཐག་གཅོད་གྲོས་ཆོད་གཏན་འབེབས་བྱུང་བ་བཞིན་ཚན་རིག་འཛིན་གྲྭ་མེད་པའི་ཆོས་སྡེ་ཁག་ལ་དམིགས་ཏེ་དེང་དུས་ཀྱི་ཚན་རིག་ངོ་སྤྲོད་ཟབ་སྦྱོང་ཞེས་བོད་ཀྱི་དཔེ་མཛོད་ཁང་དང་ཟུང་འབྲེལ་གྱིས་ལག་བསྟར་ཞུས་དང་ཞུ་མུས་ལྟར། དྷ་ས་བོད་ཀྱི་དཔེ་མཛོད་ཁང་དུ་ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༡ ནས་ ༢༢ བར་བདུན་ཕྲག་གཉིས་རིང་ཚན་རིག་འཛིན་གྲྭ་མེད་པའི་དགོན་སྡེ་ཁག་ནས་དགེ་བཙུན་གྲངས་བཅུ་བདུན་གདན་ཞུས་ཀྱིས་དེང་དུས་ཚན་རིག་གི་ཟབ་སྦྱོང་ཐེངས་བར་དགུ་པ་གོ་སྒྲིག་ཞུས།
ཟབ་སྦྱོང་འདིར་སློབ་འཁྲིད་གནང་མཁན་བོད་ཀྱི་དཔེ་མཛོད་ཁང་གི་ཚན་རིག་སྡེ་ཚན་གྱི་དགེ་རྒན་ལྔ་ཡོད། ད་ལན་ཟབ་སྦྱོང་མཉམ་ཞུགས་གནང་མཁན་ནི། དཔལ་ཡུལ་ཆོས་འཁོར་གླིང་ནས་དགེ་འདུན་པ་ ༡ དང་། བཙུན་དགོན་དགེ་ལྡན་ཆོས་གླིང་ནས་བཙུན་མ་ ༢ ། རྫོང་དཀར་ཆོས་སྡེ་ནས་དགེ་འདུན་པ་ ༡། བཙུན་དགོན་ཤུག་གསེབ་ཨོ་རྒྱན་རྫོང་ནས་བཙུན་མ་ ༡། དྷ་ས་རིགས་ལམ་སློབ་གཉེར་ཁང་ནས་དགེ་འདུན་པ་ ༥། བཙུན་དགོན་སྒྲོལ་མ་གླིང་ནས་བཙུན་མ་ ༢། བལ་ཡུལ་ཇོ་ནང་ངེས་དོན་རྟག་བརྟན་བཤད་སྒྲུབ་ཆོས་འཁོར་གླིང་ནས་དགེ་འདུན་པ་ ༢། ཇོ་ནང་དུས་འཁོར་གྲྭ་ཚང་ནས་དགེ་འདུན་པ་ ༣ བཅས་ཁྱོན་དགེ་བཙུན་ ༡༧ ཡོད། །
