༄༅། །ཕྱི་ལོ་ ༢༠༢༤  ཟླ་བ་ ༡༡ ཚེས་ ༥ ཉིན་རྒྱབ་ཆུ་ཚོད་ ༢ ཐོག་སྦན་ད་ར་ནོར་རྒྱས་གླིང་བོད་མིའི་གཞིས་ཆགས་སུ་ཆགས་པའི་སེར་བྱེས་ཐེག་ཆེན་གླིང་དགོན་པ་དང་། སྔ་འགྱུར་རྙིང་མ་ཆོས་འཕེལ་གླིང་དགོན་པར་རྒྱ་གར་དབུས་འོས་བསྡུ་ལྷན་ཁང་གི་སྐུ་ཚབ་ཪམ་དཱིན་ལི་ཡ་ནི་ (PI Ramdinliani) ལགས་དང་། སྣེ་ཤན་པ་པྲ་མི་ལ་ཇཀ་ལེཀར་ (Pramila Jakhlekar,Liaison Officer) ལགས། དེ་བཞིན་ཨ་ནི་རུ་ད་ཀམ་བྷེ་ལེ་ (Aniruddha Kamble,Tehsildar) ལགས་དང་། ས་གནས་ཉེན་རྟོག་པ་ག་ནེཤ་ (Ganesh Kevanarey,SHO) ལགས་བཅས་མཆོད་མཇལ་དུ་ཕེབས་ཡོད།

མཆོད་མཇལ་གྲུབ་མཚམས་ཁོང་རྣམས་ས་གནས་འགོ་འཛིན་ལས་ཁུངས་སུ་གདན་འདྲེན་ཞུས་ཤིང་། ཉིན་དགུང་གསོལ་ཚིགས་སྟབས་བདེ་ཞིག་གོ་སྒྲིག་ཞུས་པ་དང་། སྐབས་དེར་གནད་ཡོད་དཔོན་རིགས་རྣམས་ལ་ས་གནས་འགོ་འཛིན་གྱི་ངོས་ནས་བོད་དུ་ནང་ཆོས་དར་ཚུལ་སྐོར་གསལ་བཤད་ཞུས་པ་དང་སྦྲགས། མཧཱ་རཱཥཊྲ་ (Maharastra) མངའ་སྡེའི་ནང་ཆགས་པའི་ནོར་རྒྱས་གླིང་བོད་མིའི་གཞིས་ཆགས་ཀྱི་བྱུང་རིམ་ལོ་རྒྱུས་ངོ་སྤྲོད་དང་འབྲེལ། ད་ལྟའི་ཆར་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པ་ལག་བསྟར་ཐུབ་མིན་ཐོག་ས་གནས་ཀྱི་གནས་སྟངས་སྐོར་གསལ་བཤད་གཟབ་རྒྱས་ཞུས་ཡོད་པ་བཅས། །