༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཐའེ་ཝན་གྱི་སྦན་ཆའོ་གྲོང་འཁྱེར་དུ་ཡོད་པའི་སེ་ར་བྱེས་ཆོས་ཚོགས་ནས་ཐའེ་ཝན་དད་ལྡན་མང་ཚོགས་ལ་ཕྱི་ལོ་ ༢༠༢༤ ཟླ་བ་ ༡༠ ཚེས་ ༣༡ ནས་ཟླ་བ་ ༡༡ ཚེས་ ༣ བར་ཉིན་བཞིའི་ཆོས་འབྲེལ་གྱི་མཛད་པ་ཞིག་བསྐྱངས་གནང་ཡོད་པའི་ཐོག་མགྲོན་ཤོག་འབྱོར་དོན་བཞིན་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་སྐལ་བཟང་རྒྱལ་མཚན་ལགས་དང་དྲུང་ཆེ་རྣམ་གཉིས་ཟླ་བ་ ༡༡ པའི་ཚེས་ ༠༡ ཉིན་སེར་བྱེས་མཁས་སྙན་གྲྭ་ཚང་གི་མཁན་རབས་ ༧༨ པ་བྲ་ཏི་དགེ་བཤེས་བཀྲ་ཤིས་ཚེ་ཐར་མཆོག་ནས་བཟང་སྤྱོད་སྨོན་ལམ་གྱི་དབང་ལུང་གནང་བར་མཉམ་ཞུགས་ཀྱིས་རིན་པོ་ཆེ་མཆོག་ལ་མཇལ་དར་དང་འབྲེལ་མཎྡལ་རྟེན་དོད་འདེགས་འབུལ་ཞུས་གནང་ཡོད་པ་རེད།
དེ་ནས་ཕྱི་ལོ་ ༢༠༢༤ ཟླ་བ་ ༡༡ ཚེས་ ༤ ཉིན་སེར་བྱེས་མཁན་སྙན་གྲྭ་ཚང་གི་མཁན་རབས་ ༧༨ པ་བྲ་ཏི་དགེ་བཤེས་བཀྲ་ཤིས་ཚེ་ཐར་མཆོག་དང་སྐུ་འཁོར་རྣམ་པ་ཐའེ་ཝན་བོད་ཀྱིས་སྐུ་ཚབ་དོན་གཅོད་ལས་ཁུངས་སུ་འཚམས་གཟིགས་ཀྱིས་སྐུ་ཚབ་དོན་གཅོད་ལྷན་རྒྱས་སྐར་མ་ ༤༥ ཙམ་ལ་དོན་ཁང་གི་ལས་དོན་དང་། ཐའེ་ཝན་དུ་ཆོས་ཕྱོགས་དང་འབྲེལ་བའི་ཕན་ཚུན་རྒྱུས་ལོན་དང་ངོ་སྤྲོད་ཞུས་རྗེས་དོན་གཅོད་ལས་ཁུངས་ཀྱིས་མཆོད་ཁང་དུ་སྤྱི་ནོར་༸གོང་ས་༸སྐྱབས་མགོན་མཆོག་གི་བཞུགས་ཁྲིར་མཇལ་དར་འབུལ་ཏེ་མཇལ་ཁ་ཞུས།
གཞན་ཡང་ཕྱི་ལོ་ ༢༠༢༤ ཟླ་བ་ ༡༠ ཚེས་ ༩ ཉིན་དགའ་ལྡན་བྱང་རྩེ་གྲྭ་ཚང་གི་མཁན་པོ་དཔལ་ལྡན་དབང་ཕྱུག་རིན་པོ་ཆེ་མཆོག་དང་སྐུ་འཁོར་རྣམ་པ་གཙོས་པའི་ཐའེ་ཝན་དུ་ཡོད་པའི་བྱང་རྩེ་གྲྭ་ཚང་གི་ཆོས་ཚོགས་ཀྱི་སློབ་མ་ཁག་ཅིག་དང་། དོན་གཅོད་ལས་ཁུངས་སུ་ཆེད་དུ་ཕེབས་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲིར་མཇལ་ཁ་ཞུས་རྗེས་དོན་གཅོད་དང་ལྷན་དུ་ཆུ་ཚོད་གཅིག་ཙམ་གྱི་རིང་སྐུ་ཚབ་དོན་གཅོད་ལས་ཁུངས་ཀྱི་ལས་དོན་དང་ཐའེ་ཝན་ནང་བོད་བརྒྱུད་ནང་བསྟན་གནས་སྟངས་སོགས་སྐོར་ཕན་ཚུན་ངོ་སྤྲོད་འགྲེལ་བརྗོད་ཞུས་རྗེས། མཁན་རིན་པོ་ཆེ་མཆོག་ནས་དོན་ཁང་ལ་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་མཚན་རྟགས་འབྱར་མའི་ཐང་ཀ་ཞིག་དྲན་བརྟེན་དུ་གནང་བ་དང་ཆོས་ཚོགས་ཀྱི་དད་ལྡན་སྦྱིན་བདག་ཁག་ཅིག་ནས་དགོང་མོའི་ཞལ་ལག་འདེགས་འབུལ་ཞུས་པར་མཉམ་བཅར་ཞུས་ཏེ་ཕན་ཚུན་བཀའ་མོལ་ལྷོད་པོ་བྱུང་ཡོད་པ་རེད།
དེ་བཞིན་ཕྱི་ཟླ་ ༡༠ ཚེས་ ༡༩ ཉིན་ཨ་རིར་གནས་བཞུགས་རྙིང་མའི་བླ་མ་པདྨ་བློ་གྲོས་བསོད་རྒན་རིན་པོ་ཆེ་མཆོག་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་རྒྱུན་ལས་བླ་མ་ཡོན་ཏན་ལགས་དང་མཉམ་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་སུ་འཚམས་གཟིགས་ཀྱིས་སྐུ་ཚབ་དོན་གཅོད་དང་ལྷན་ཆུ་ཚོད་གཅིག་ཙམ་རིང་སྐུ་ཚབ་དོན་ཁང་ནས་ཐའེ་ཝན་དུ་བོད་བརྒྱུད་ནང་བསྟན་དང་འབྲེལ་བའི་ལས་འཆར་ཇི་ཡོད་ངོ་སྤྲོད་དང་འབྲེལ། རིན་པོ་ཆེ་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲིར་་མཇལ་ཁ་ཞུས་ཡོད་པ་དང་བཅས་ཆོས་ཕྱོགས་ཀྱི་མཛད་རིམ་སྣ་མང་བསྐྱངས་ཡོད། །
