༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༤ རེས་གཟའ་ཟླ་བ་ཉིན་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་བཞུགས་སྒར་དྷ་ས་ཉེ་འཁྲིས་སུ་ཡོད་པའི་འཛིན་སྐྱོང་སྦྱོང་བརྡར་ཁང་དུ་ཉེ་ལམ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གསར་འདེམས་བྱུང་བ་རྣམས་ལ་ཟབ་སྦྱོང་དབུ་འབྱེད་ཀྱི་མཛད་སྒོ་ཞིག་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཟབ་སྦྱོང་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་ལགས་དང་། ལས་བྱེད་འདེམས་ལྷན་གྱི་དྲུང་ཆེ་བསྟན་འཛིན་ལེགས་གྲུབ་ལགས། འབྲེལ་ཡོད་ལས་བྱེད། དེ་བཞིན་ཟབ་སྦྱོང་བ་བཅས་ཚང་འཛོམས་ཀྱིས་ཐོག་མར་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་ལགས་ཀྱིས་སྣང་གསལ་ཞལ་ཕྱེ་གནང་གྲུབ་མཚམས་རྟེན་འབྲེལ་མཚོན་བྱེད་གསོལ་ཇ་དང་འབྲས་སིལ་འདེགས་འབུལ་ཞུས།
དེ་རྗེས་སྲི་ཞུའི་ལས་བྱེད་གསར་པ་རྣམས་ཀྱིས་རེ་རེ་བཞིན་རང་ཉིད་ངོ་སྤྲོད་གནང་གྲུབ་བསྟུན། འདེམས་ལྷན་དྲུང་ཆེ་བསྟན་འཛིན་ལེགས་གྲུབ་ལགས་ཀྱིས་སློབ་ཁྲིད་པ་རྣམས་ཀྱི་ངོ་སྤྲོད་དང་། ཟབ་སྦྱོང་གི་སྒྲིག་གཞི་ཁག་ངོ་སྤྲོད་གནང་གྲུབ་མཚམས་སྐུ་མགྲོན་གཙོ་བོ་ལས་བྱེད་འདེམས་ལྷན་གྱི་ཚོགས་གཙོ་ཀརྨ་ཡེ་ཤེས་ལགས་ཀྱིས་འཚམས་འདྲི་དང་འབྲེལ་ཟབ་སྦྱོང་དུ་བཞུགས་པའི་རིང་བུམ་སྐྱོན་གསུམ་བྲལ་ཞེས་ཟེར་སྲོལ་ཡོད་པ་ལྟར། སྣོད་ཁ་སྦུབ་ལྟ་བུའི་སྐྱོན་དང་། ཞབས་རྡོལ་ལྟ་བུའི་སྐྱོན། སྣོད་དྲི་མ་ཅན་བཅས་སྐྱོན་གསུམ་དང་བྲལ་དགོས་སྐོར་དང་། དེ་བཞིན་སྲི་ཞུ་བ་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མིའི་སྒྲིག་འཛུགས་དང་མི་རབས་གོང་མ་རྣམ་པའི་སྐུ་དྲིན་ལས་བཙན་བྱོལ་དུ་འཚོ་བ་བསྐྱར་བསྐྲུན་དང་རང་མི་རིགས་ཀྱི་ངོ་བོ་སྲུང་སྐྱོབ་ཐུབ་ཡོད་པར་དྲན་པའི་ཐོག་ནས། གསར་འདེམས་སྲི་ཞུ་བ་རྣམ་པས་ལྷག་བློ་ཆེ་སྐྱེད་ཀྱི་སྒོ་ནས་ཞབས་ཞུ་སྒྲུབ་དགོས་ལ་ཆེ་བཞག་ཆུང་བསྐྱུར་གྱིས་སྤྱི་བའི་དོན་དུ་བློས་གཏོང་གང་ཐུབ་གནང་བ་བརྒྱུད་ཚད་སྤུས་མྱུར་གསུམ་གྱི་སྒོ་ནས་ཞབས་ཞུ་སྒྲུབ་དགོས་པའི་ལམ་སྟོན་གནང་ཡོད།
ཐེངས་འདིའི་ཟབ་སྦྱོང་ནང་ལས་བྱེད་གསར་འདེམས་མཉམ་ཞུགས་གནང་མཁན་གྲངས་ ༣༣ ཡོད་པ་དང་། ཟབ་སྦྱོང་འདི་ཉིད་ཕྱི་ལོ་ ༢༠༢༤ ཟླ་བ་ ༡༡ ཚེས་ ༤ ནས་ ༢༣ བར་བདུན་ཕྲག་གསུམ་རིང་འཚོགས་རྒྱུ་ཡིན་འདུག་པ་བཅས།།
