༢༠༡༢ ཟླ་ ༣ ཚེས་ ༣ རེས་གཟའ་སྤེན་པ།
༄༅། །ཉིན་གཉིས་ཀྱི་གོང་པོ་ཧོར་གྱི་ནང་པ་དང་བོད་ཡུལ་ཇོ་ནང་ཆོས་བརྒྱུད་ཀྱི་དབུ་འཛིན་ཁལ་ཁ་རྗེ་བཙུན་དམ་པ་སྐྱབས་རྗེ་འཇམ་དཔལ་རྣམ་གྲོལ་ཆོས་ཀྱི་རྒྱལ་མཚན་རིན་པོ་ཆེ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པར་བརྟེན་ཕྱི་ལོ་ ༢༠༡༢ ཟླ་ ༣ ཚེས་ ༣ ཉིན་དགའ་ལྡན་ཕོ་བྲང་གི་ཡིག་ཚང་ནས་གོ་སྒྲིག་ཐོག་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ་མཆོད་སྤྲིན་བརྒྱ་ཚར་འབུལ་གཤོམ་དང་འབྲེལ། མཆོད་འབུལ་སྨོན་ལམ་གྱི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྣམ་གྲྭའི་མཁན་པོ་ཁྲོམ་ཐོག་རིན་པོ་ཆེ་མཆོག་དང་མཁན་ཟུར་བྱ་དོ་རིན་པོ་ཆེ་མཆོག ཀེའུ་ཚང་རིན་པོ་ཆེ་མཆོག གཞན་མཁན་བླ་སྤྲུལ་རྣམ་པ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། བོད་མི་མང་སྤྱི་འཐུས་རྒྱུན་ལས་རྣམ་པ། རྣམ་གྲྭ་ཕན་བདེ་ལེགས་བཤད་གླིང་གི་དགེ་འདུན་རྣམ་པས་གཙོས་བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ་དང་གློ་བུར་ལྷགས་པའི་དགེ་བཙུན་སྔགས་གསུམ། མི་མང་བཅས་ཁྱོན་མི་གྲངས་ ༧༠༠ བརྒལ་བ་འདུ་འཛོམས་ཐོག་ཞལ་འདོན་གསུངས་ཏེ་གསོལ་ཇ་བཞེས་མུར་ཕོ་བྲང་ཡིག་ཚང་གི་དྲུང་ཆེ་བྲེ་སྲང་ལགས་ཀྱིས་སྐྱབས་ཐོ་སྙན་སྒྲོན་ཞུས་ཡོད་པའི་འཁོད་དོན། བསླབ་གསུམ་འཕགས་པའི་ནོར་གྱིས་ཕྱུག་པའི་མཁས་མང་འདུ་ཚོགས་རིན་པོ་ཆེའི་༸ཞབས་དྲུང་དུ།
གུས་ལྡན་དགའ་ལྡན་ཕོ་བྲང་གི་ཡིག་ཚང་ནས་ཕྱག་བཅས་ཞུ་གསོལ་འདེབས་སྙིང་། དེ་ཡང་ད་ལམ་ཆེན་པོ་ཧོར་གྱི་ནང་པའི་ཆོས་ཀྱི་དབུ་འཛིན། བོད་ཡུལ་ཇོ་ནང་ཆོས་བརྒྱུད་ཀྱི་དབུ་འཛིན་ཁལ་ཁ་རྗེ་བཙུན་དམ་པ་སྐྱབས་རྗེ་འཇམ་དཔལ་རྣམ་གྲོལ་ཆོས་ཀྱི་རྒྱལ་མཚན་རིན་པོ་ཆེ་མཆོག་གང་གི་ཐུགས་དགོངས་ཟབ་མོ་ཡོངས་སུ་རྫོགས་ཏེ་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་རེ་ཞིག་དགོངས་པ་ཆོས་དབྱིངས་སུ་ཐིམ་ཞིང་། དམ་པ་མཆོག་ཉིད་༸རྒྱལ་བསྟན་རིས་མེད་ལ་ཐུགས་དད་ཆེ་བ་དང་། ཉམས་བཞེས་མཛད་པ། རང་ལུགས་ཀྱི་བསྟན་པ་འཛིན་སྐྱོང་སྤེལ་གསུམ་བསྟན་འགྲོར་སྨན་པའི་ཐུགས་འཁུར་ཟབ་བཞེས་གནང་བ། ལྷག་པར་༸གོང་ས་༸སྐྱབས་མགོན་ཆེན་པོར་ཐུགས་དད་རྩེ་གཅིག་གཡོ་བ་མེད་པ་ཅི་གསུང་བཀའ་བཞིན་སྒྲུབ་པའི་མཆོད་པས་མཉེས་པར་མཛད་པ་དང་། རང་ཅག་བོད་མི་རིགས་ཀྱི་བདེན་དོན་ལ་ཐུགས་ཁུར་ཆེ་བཞེས་མཛད་མཁན་བཅས་ཡིན་པས་བཀའ་དྲིན་ཅུང་ཟད་གསོབ་ཕྱིར་དང་། གང་གི་ཐུགས་དགོངས་ཟབ་མོ་རྫོགས་ཕྱིར་ད་ལམ་ཐེག་ཆེན་ཆོས་གླིང་གཙུག་ལག་ཁང་དུ་རྟེན་མཆོག་སྤྱན་སྔར་མཆོད་སྤྲིན་འབུལ་གཤོམ་ཐོག་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་ཆེད་ཕེབས་༸ཞབས་སོར་འཁོད་དེ་མཆོད་འབུལ་ཐུགས་སྨོན་བཀའ་དྲིན་ཆེ་ཞིང་ཚོགས་བཞུགས་དགེ་འདུན་རྣམས་ལ་གསོལ་ཇ་དང་། སྐུ་འགྱེད་ཧིན་སྒོར་ ༥༠ འབུལ་ལམ་ཞུས་པ་ལགས་ན། གོང་དུ་གསོལ་བ་བཏབ་དོན་ལྟར་གང་གི་ཡང་སྲིད་འཁྲུལ་བྲལ་ངེས་རྙེད་རིང་པོར་མི་ཐོགས་པར་མྱུར་དུ་བྱོན་ཞིང་། སྤྱི་སྒོས་བསྟན་འགྲོའི་སྨན་ཡོན་དམ་པར་འགྱུར་བའི་ཐུགས་སྨོན་སྐྱབས་འཇུག་བརྩེ་བས་གཟིགས་པ་མཁྱཻན་མཁྱེན་ཞེས་སྙན་སྒྲོན་རྗེས་མུ་མཐུད་སྨོན་ལམ་གསུང་འདོན་གནང་ཡོད་པ་བཅས། །