༄༅། །འདི་གར་བེལ་ཇི་ཡམ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༦ རེས་གཟའ་སྤེན་པའི་ཉིན་བེལ་ཇི་ཡམ་གྱི་གྲོང་ཁྱེར་ཨན་ཊབ་ཏུ་སྦེལ་ཇམ་ཆོས་རིག་འཛིན་སྐྱོང་ཁང་གི་འཇམ་དབྱངས་བློ་འཕེལ་བོད་ཀྱི་སྐད་ཡིག་དང་རིག་གཞུང་སློབ་གྲྭ་དབུ་བརྙེས་ནས་མི་ལོ་ཧྲིལ་པོ་ ༡༦ འཁོར་བའི་དུས་དྲན་སྲུང་བརྩི་ཞུས་གནང་ཡོད་པ་དང་། དུས་དྲན་སྲུང་བརྩིའི་མཛད་སྒོའི་སྐུ་མགྲོན་གཙོ་བོར་སྦར་སིལ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། དོན་ཁང་གི་ཡུ་རོབ་འབྲེལ་མཐུད་པ་དྲུང་ལས་བསྟན་འཛིན་ཕུན་ཚོགས་ལགས། གཞན་ཡང་ཧི་མ་ལ་ཡ་སྒྲོལ་མ་ཆོས་ཚོགས་ཀྱི་འགན་འཛིན་མེ་ཏོག་རིན་པོ་ཆེ། བཤད་སྒྲུབ་བསྟན་རྒྱས་གླིང་ཆོས་ཚོགས་ཀྱི་འགན་འཛིན་དགེ་བཤེས་ཚེ་བརྟན་ཕུན་ཚོགས་ལགས། གཞན་ཡང་བེལ་ཇི་ཡམ་ཁུལ་གྱི་ཚོགས་པ་ཁག་གི་ཚོགས་གཙོ་དང་། ཆོས་རིག་འཛིན་སྐྱོང་ཁང་གི་སློབ་ཁག་དྲུག་གི་དགེ་ལས་ཕ་མ་དང་སློབ་ཕྲུག་བཅས་མཉམ་ཞུགས་གནང་འདུག
མཛད་སྒོའི་ཐོག་མར་ཉིན་རྒྱབ་ཆུ་ཚོད་ ༢།༠༠ པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན་སྐུ་མགྲོན་གཙོ་བོ་སློབ་གྲྭའི་འགན་འཛིན་གཉིས་ནས་མནྜལ་རྟེན་གསུམ་འདེགས་འབུལ་ཞུས་རྗེས་བོད་རྒྱལ་ཁབ་ཆེན་པོའི་རྒྱལ་གླུ་བཏང་། དེ་རྗེས་བོད་ནང་གི་རྒྱལ་གཅེས་པ་རྣམས་ལ་གུས་འདུད་མཚོན་ཕྱིར་ངག་བཅད་སྐར་མ་གཅིག་རིང་ཞུས་རྗེས་སློབ་མ་ཁག་ཅིག་ནས་གཡག་སེང་འཁྲབ་སྟོན་དང་། བཀྲ་ཤིས་ཞོལ་པ་འཁྲབ་སྟོན། དེ་བཞིན་སློབ་མ་རྒན་པ་རྣམས་ནས་རྟགས་གསལ་བཏང་ཟིན་འཕྲལ་སློབ་གྲྭའི་སྤྱི་ཁྱབ་འགན་འཛིན་འཇིགས་མེད་ལགས་ནས་སློབ་གྲྭའི་ལོ་འཁོར་ལས་བསྡོམས་སྙིང་བསྡུས་དང་རྩིས་ཁྲ་གསལ་བཤད་གནང་། དེ་རྗེས་སྐུ་མགྲོན་གཙོ་སྦར་སིལ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ནས་དགེ་སློབ་ཕ་མ་ཡོངས་ལ་གསུང་བཤད་སྙིང་བསྡུས་གནང་ཡོད།
དེ་རྗེས་སློབ་ཁག་དྲུག་གི་འཛིན་གྲྭ་སོ་སོའི་སློབ་མ་རྩེ་ཕུད་གསུམ་ལ་སློབ་གྲྭའི་ངོས་ནས་གཟེངས་བསྟོད་ཕྱག་འཁྱེར་འགྲེམས་སྤྲོད་གནང་ཡོད་པ་དང་། གཞན་ཡང་བསླབ་པ་མཐར་ཕྱིན་གྱི་སློབ་མ་རྣམས་ལ་ཕྱག་འཁྱེར་འགྲེམས་སྤྲོད་གནང་། མཇུག་ཏུ་སློབ་ཁག་དྲུག་གི་སློབ་མ་རྣམས་དང་ཕ་མའི་སྐུ་ཚབ་ཁག་གཅིག་ནས་བོད་ཀྱི་རྐང་བྲོ་གླུ་གཞས་དང་སྙན་ངག་གྱེར་འདོན་ཀྱི་ལས་རིམ་གཟིགས་འབུལ་ཞུས་རྗེས་སྒོར་གཞས་ལ་རོལ་ཡོད་པ་བཅས།། 
