༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་དང་། སྤྱི་འཐུས་བློ་བཟང་རྒྱ་མཚོ་སྲི་ཐར་ལགས། སྤྱི་འཐུས་བསྟན་འཛིན་ཆོས་འཛིན་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཡུ་རོབ་སུད་སི་རྒྱལ་ཁབ་ནང་བོད་དོན་ཞུ་སྐུལ་གནང་བཞིན་ཡོད་པ་ལྟར། ཕྱི་ལོ་ ༢༠༢༤ ཟླ་བ་ ༡༠ པའི་ཚེས་ ༢༤ ཉིན་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་ཛུ་རིག་གྲོང་ཁྱེར་ནང་སུད་སི་གྲོས་ཚོགས་འཐུས་མི་སྐུ་ཞབས་ཕེ་བྷི་ཡན་མོ་ལི་ན་ (Fabian Molina, Member of Parliament, National Council) མཆོག་དང་ལྷན་ཁོང་གི་ལས་ཁུངས་སུ་མཇལ་འཕྲད་གནང་ཡོད།
དེའི་སྐབས་བོད་མི་མང་སྤྱི་འཐུས་རྣམ་པས་བོད་ནང་རྒྱ་ནག་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག མི་རིགས་ཀྱི་ངོ་བོ་དང་བཅས་པ་རྩ་མེད་བཟོ་རྒྱུའི་སྲིད་བྱུས་ལག་བསྟར་བྱེད་བཞིན་པའི་ཐོག་སེམས་འཚབ་བསྟན་པ་དང་། དེ་བཞིན་སུད་སིར་གནས་སྡོད་བོད་མི་ཚོའི་དཀའ་ངལ་བདེ་སྡུག་སྐོར་སྙན་སེང་དང་འབྲེལ་མུ་མཐུད་མཐུན་འགྱུར་རྒྱབ་སྐྱོར་ཡོང་བའི་འབོད་སྐུལ་དང་། སྐུ་ཞབས་ཁོང་གིས་བོད་དོན་ཐོག་ཡུན་རིང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག དཔལ་ལྡན་ཚོགས་གཙོ་མཆོག་གིས་མཚན་རྟགས་བཀོད་པའི་བོད་དོན་ཞུ་ཡིག་དང་། བོད་མི་མང་སྤྱི་འཐུས་ལྷན་ཚོགས་ཀྱི་དྲན་རྟེན་ཕྱག་རྟགས་ཕུལ་འདུག
ཉིན་རྒྱབ་ཕྱོགས་ཕེབས་བོད་མི་མང་སྤྱི་འཐུས་རྣམ་པ་རི་ཀོན་ཆོས་འཁོར་དགོན་དུ་གཟིགས་སྐོར་ལ་ཕེབས་ཤིང་། དེའི་སྐབས་དགོན་པའི་མཁན་པོ་དགེ་བཤེས་བསྟན་འཛིན་བྱང་ཆུབ་ལགས་དང་། བླ་མ་བསྟན་འཛིན་ལགས། འཛིན་སྐྱོང་འགན་འཛིན་པི་ཊར་ ཨོ་བྷར་ཧོལ་ཛར་ (Peter Oberholzer) ལགས་བཅས་ཀྱིས་སྣེ་ལེན་ཕེབས་བསུ་དང་འབྲེལ། རི་ཀོན་ཆོས་འཁོར་དགོན་གི་ལོ་རྒྱུས་དང་། ད་ལྟའི་ལས་འཆར་སྐོར་ངོ་སྤྲོད་གནང་བ་དང་། དེ་བཞིན་གསོལ་ཇ་དང་ཞལ་ཏོག་འདེགས་འབུལ་ཞུས་འདུག
ཕྱི་ཚེས་ ༢༥ ཉིན་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་སུད་སི་ཛུ་རིག་གྲོང་ཁྱེར་གྱི་བདེ་སྲུང་བློན་ཆེན་སྐུ་ཞབས་མ་རི་ཡོ་ ཕེར་ (Honourable Mr. Mario Fehr, Minister of Security, Zurich Council) མཆོག་དང་ལྷན་ཁོང་གི་ལས་ཁུངས་སུ་མཇལ་འཕྲད་གནང་སྟེ། ཉེ་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཛུ་རིག་གྲོང་ཁྱེར་དུ་ཞབས་སོར་འཁོད་སྐབས་མཐུན་འགྱུར་གང་ཐུབ་གནང་བར་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུས་པ་དང་། དེ་བཞིན་བོད་དོན་དང་བོད་མི་རྣམས་ལ་ཡུན་རིང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད་འདུག
གཞན་ཡང་མཇལ་འཕྲད་སྐབས་བོད་མི་མང་སྤྱི་འཐུས་རྣམ་པས་བློན་ཆེན་མཆོག་ལ་བོད་ནང་གི་ད་ལྟའི་ཛ་དྲག་གནས་སྟངས་ཐོག རྒྱ་ནག་དམར་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག མི་རིགས་ཀྱི་ངོ་བོ་དང་བཅས་པ་རྩ་མེད་བཟོ་རྒྱུའི་སྲིད་བྱུས་སྔར་ལྷག་ལག་བསྟར་བྱེད་བཞིན་ཡོད་པའི་སྐོར་གསུངས་རྗེས། དཔལ་ལྡན་ཚོགས་གཙོ་མཆོག་གིས་མཚན་རྟགས་བཀོད་པའི་བོད་དོན་ཞུ་ཡིག་དང་། བོད་མི་མང་སྤྱི་འཐུས་ལྷན་ཚོགས་ཀྱི་དྲན་རྟེན་ཕྱག་རྟགས་ཕུལ་བ་དང་། སྐུ་ཞབས་ཁོང་གིས་ཕྱི་ལོ་ ༡༩༨༨ ནས་བཟུང་ད་བར་མུ་མཐུད་བོད་མི་རྣམས་དང་འབྲེལ་བ་ཡོད་པའི་སྐོར་འགྲེལ་བརྗོད་གནང་འདུག
ཉིན་རྒྱབ་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་སུད་སི་དང་ལེག་ཏེན་སིཌཡན་བོད་རིགས་ཚོགས་པའི་ལས་ཁུངས་སུ་དེ་གའི་ཚོགས་མི་རྣམ་པ་དང་། དེ་བཞིན་བོད་དོན་རྒྱབ་སྐྱོར་ཚོགས་པ་དང་། ཆོས་ཚོགས་ཁག གཞུང་འབྲེལ་མ་ཡིན་པའི་ཚོགས་པ་བཅས་ཀྱི་སྐུ་ཚབ་རྣམས་དང་ལྷན་ཚོགས་འདུ་ཞིག་ཚོགས་ཤིང། དེའི་སྐབས་ཚོགས་སྡེ་སོ་སོའི་ལས་དོན་གནང་ཕྱོགས་དང་། བོད་དོན་འཐབ་རྩོད་ཐོག་ནུས་པ་མཉམ་སྤུངས་གནང་ཕྱོགས་སོགས་ཀྱི་ཐོག་བཀའ་བསྡུར་དང་། བོད་མི་མང་སྤྱི་འཐུས་རྣམ་པས་ད་ལྟ་འགྲོ་བཞིན་པའི་བོད་དོན་ཞུ་སྐུལ་གྱི་དམིགས་ཡུལ་དང་། བོད་དོན་འཐབ་རྩོད་ཐོག་ཚང་མས་མཉམ་རུབ་གནང་དགོས་སྐོར་སོགས་གསུངས་པ་དང་། དེ་བཞིན་ཚོགས་བཅར་བ་རྣམ་པས་དྲི་བ་ཕུལ་བ་ཁག་ལ་ལན་འདེབས་གསལ་བཤད་གནང་འདུག
ལས་རིམ་སྐབས་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། དོན་ཁང་གི་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུགས་གནང་མཁན་ལས་བྱེད་ཕུན་ཚོགས་སྟོབས་རྒྱལ་ལགས་རྣམ་གཉིས་མཉམ་བཅར་ཞུས་ཡོད་འདུག
