༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༢༡ ཉིན་འཚེ་བ་མེད་པའི་དགེ་རྩ་ཚོགས་པའི་ (Foundation for Non-violent Alternatives) གོ་སྒྲིག་འོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་བསྟི་གནས་ཁང་ (India International Centre) དུ་བོད་ཀྱི་མ་འོངས་ཁ་ཕྱོགས་དང་འབྲེལ་ཏེ། བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་དང་། བཙན་བྱོལ་ནང་གི་ཐབས་བྱུས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས། རྒྱ་གར་གྱི་བྱེད་སྒོ་བཅས་ཀྱི་ཐོག་གསུང་བཤད་གནང་ཡོད།
དེ་ཡང་བགྲོ་གླེང་ནང་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། འཚེ་བ་མེད་པའི་དགེ་རྩ་ཚོགས་པ་གསར་འཛུགས་གནང་མཁན་གྲས་སྐུ་ཞབས་ཨོཾ་པྲ་ཀཤ་ཏན་ཊོན་ལགས། དམག་དཔོན་ཟུར་པ་ཨ་ཤོཀ་ཀུ་མཱར་ལགས། རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཟུར་པ་སྐུ་ཞབས་སུ་ཇིཊ་ཀུ་མཱར་ལགས་བཅས་ཕེབས་ཡོད་ཅིང་། སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉེ་ལམ་ཨ་རིའི་གཞུང་གིས་གཏན་འབེབས་གནང་བའི་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གི་ནང་དོན་གལ་གནད་སྐོར་གཙོ་བོར་བཟུང་སྟེ། ཁྲིམས་ཡིག་དེ་བརྒྱུད་ཨ་རི་གཞུང་ནས་བོད་རྒྱའི་དཀའ་རྙོག་ཐོག་སྔར་ལྷག་དོ་སྣང་དང་། ལངས་ཕྱོགས་གསལ་སྟོན་གྱིས་བོད་དོན་ལ་རྒྱབ་སྐྱོར་དང་། བོད་དང་རྒྱ་ནག་བར་གྱི་དཀའ་རྙོག་སེལ་ཐབས་ལ་སྐུལ་འདེད་གཏོང་གི་ཡོད་སྐོར་སོགས་ཁྲིམས་ཡིག་གི་ནང་དོན་གནད་འགག་སྐོར་གསལ་བཤད་གནང་ཡོད།
དེ་བཞིན་ཁོང་གིས་བོད་ཀྱི་ལོ་རྒྱུས་ཀྱི་འཕེལ་རིམ་སྤྱི་དང་། ལྷག་པར་ཉེ་རབས་བོད་ཀྱི་ལོ་རྒྱུས་ཀྱི་འཕེལ་རིམ་ཁྲོད་རྒྱ་ནག་གིས་བོད་ཀྱི་ཆབ་སྲིད་ལ་ཐེ་བྱུས་དང་། ལྷག་པར་ཕྱི་ལོ་ ༡༩༡༣ ལོར་༸རྒྱལ་དབང་སྐུ་ཕྲེང་བཅུ་གསུམ་པ་ཆེན་པོས་བོད་རང་བཙན་གསལ་བསྒྲགས་བསྐྱར་ནན་གནང་སྟེ། བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་སྐོར་གསལ་སྟོན་གནང་རྗེས། བོད་དང་རྒྱ་གར་བར་གྱི་ཆོས་དང་། ཆབ་སྲིད། རིག་གཞུང་གི་འབྲེལ་ལམ་དང་འབྲེལ་ཏེ། བོད་བརྒྱུད་ནང་བསྟན་གཙོས་པའི་བོད་ཀྱི་རིག་གཞུང་ལ་རྒྱ་གར་གྱི་ཤུགས་རྐྱེན་ཆེན་པོ་ཡོད་པ་དང་། ལྷག་པར་བོད་ཡུལ་རྒྱ་ནག་གཞུང་གིས་བཙན་བཟུང་བྱས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་མི་ཁྲི་ཕྲག་འགའ་ཤས་རྒྱ་གར་དུ་སྐྱབས་བཅོལ་དུ་ཕེབས་སྐབས་རྒྱ་གར་གཞུང་དམངས་གཉིས་ནས་རྒྱབ་སྐྱོར་ཕན་གྲོགས་གནང་ཡོད་སྐོར་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་ཀྱི་ཁོར་ཡུག་སྤྱི་དང་། ལྷག་པར་བོད་ནས་ཐོན་པའི་གཙང་ཆུ་ཁག་རྒྱ་ནག་གཞུང་གིས་ཆབ་སྲིད་ཀྱི་ལག་ཆར་བཀོལ་སྤྱོད་བྱེད་ཚུལ་དང་འབྲེལ་ཏེ། བོད་ནས་ཐོན་པའི་གཙང་ཆུ་རྣམས་ནི་ཨེ་ཤི་ཡའི་མི་མང་འབུམ་ཕྲག་མང་པོའི་འཚོ་རྟེན་དུ་གྱུར་ཡོད་པ་མ་ཟད། བོད་ནས་ཐོན་པའི་གཙང་ཆུ་ཆེ་ཁག་གཉིས་ཀྱི་འདབས་སུ་རྒྱ་དཀར་ནག་གཉིས་ཀྱི་དཔལ་ཡོན་དར་འགོ་ཚུགས་ཡོད་པ་གསལ་བཤད་གནང་བའི་ཐོག ད་ལྟའི་ཆར་རྒྱ་ནག་གཞུང་གིས་གཙང་ཆུ་དེ་དག་ལ་ཆུ་མཛོད་བརྒྱབ་སྟེ། ཆུའི་བཞུར་རྒྱུན་ལ་འགྱུར་བ་གཏོང་གི་ཡོད་ལ། ལྷག་པར་གཙང་ཆུ་དེ་དག་ཆབ་སྲིད་ཀྱི་དགོས་མཁོར་བེད་སྤྱོད་ཀྱིས་གཤམ་འོག་གི་རྒྱལ་ཁབ་ཚོར་ཐུབ་ཚོད་གཏོང་གི་ཡོད་པ་གསུངས། དེ་ལས་འཕྲོས་ཏེ་ཁོང་གིས་ད་ལྟ་རྒྱ་ནག་གཞུང་གིས་ཡར་ཀླུང་གཙང་པོར་འཛམ་གླིང་སྟེང་གི་ཆུ་མཛོད་ཆེ་ཤོས་དེ་རྒྱག་བཞིན་ཡོད་པ་དང་། གལ་ཏེ་དེ་ལྟ་བུའི་ཆུ་མཛོད་ཆེན་པོ་ཞིག་ལ་ས་འགུལ་སོགས་ཀྱི་རྐྱེན་བྱས་ཏེ་གས་ཆག་ཤོར་ན། གཤམ་དུ་གནས་པའི་མི་མང་འབུམ་ཕྲག་མང་པོའི་ཚེ་སྲོག་ལ་ཉེན་ཁ་བཟོ་གི་ཡོད་པ་འགྲེལ་བརྗོད་གནང་།
གཞན་ཡང་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་དབུ་ཁྲིད་ལམ་སྟོན་འོག་བོད་དོན་དེ་རྒྱལ་སྤྱིའི་གནད་དོན་ཞིག་ཏུ་བསྒྱུར་ཡོད་ཅིང་། མགོན་པོ་མཆོག་བཙན་བྱོལ་དུ་ཕེབས་རྗེས་འཛམ་བུ་གླིང་ལ་བྱམས་དང་སྙིང་རྗེའི་སྐོར་ལམ་སྟོན་གནང་བ་དང་ཆབས་ཅིག བོད་མིའི་འཚེ་བ་མེད་པའི་བདེན་པའི་འཐབ་རྩོད་ལ་རྒྱབ་སྐྱོར་ཐོབ་སླད་ཞུ་གཏུག་སྟེ། བོད་དོན་ལ་རྒྱལ་སྤྱིའི་སྟེང་རྒྱབ་སྐྱོར་ཚད་མཐོ་པོ་ཐོབ་ཡོད་སྐོར་སོགས་མགོན་པོ་མཆོག་གི་མཛད་རྗེས་ཐོག་འགྲེལ་བརྗོད་གནང་རྗེས་ཚོགས་བཅར་བ་ཁག་ཅིག་གི་དོགས་དྲིར་ལན་འདེབས་གནང་ཡོད་པ་བཅས།། 
