༄༅། །ཨ་རིའི་གྲོང་ཁྱེར་ནིའུ་ཡོག་གི་ཁོངས་སུ་གཏོགས་པའི་ཝུཊ་
ནིའུ་ཡོག་དང་ནིའི་འཇར་སི་བོད་རིགས་སྤྱི་མཐུན་ཚོགས་པས། དུས་རབས་ཉི་ཤུ་པ་དེ་དམག་འཁྲུག་གི་ལས་ལ་ཞུགས་པའི་སྐྱོ་གར་གྱི་ཉམས་མྱོང་ལས་བསླབ་བྱ་བླངས་ཏེ། དུས་རབས་ཉེར་གཅིག་པ་འདི་བཞིན་ཞི་བདེའི་དུས་རབས་ཤིག་ལ་མངོན་འགྱུར་ཡོང་ཆེད་གཙོ་བོ་མི་སོ་སོའི་སེམས་རྒྱུད་ལ་བྱམས་བརྩེའི་དཔལ་ཡོན་གོང་འཕེལ་གཏོང་དགོས་པའི་ལམ་སྟོན་སྐོར་གྱི་གློག་བརྙན་བདེ་སྐྱིད་ཀྱི་ཤེས་རབ་གྲོང་ཁྱེར་ནིའུ་ཡོག་ཏུ་ཐེངས་དང་པོ་སྟོན་གནང་བར་རྟེན་འབྲེལ་ཞུ་རྒྱུའི་ཆེད་དང་། ལྷག་པར་གློག་བརྙན་འཁྲབ་ཁྲིད་པ་བྷར་བྷ་ར་མི་ལར་ (Barbara Miller) ལགས་དང་། ཕི་ལིབ་དེ་ལི་ཁུ་སི་ (Philip Delaquis) ལགས། གློག་བརྙན་འཁྲབ་སྟོན་པ་གྲགས་ཅན་རི་ཅཊ་གྷེ་རི་ (Richard Gere) ལགས། འཁྲབ་གཞུང་རྩོམ་པ་པོ་དང་གློག་བརྙན་བཟོ་བསྐྲུན་པ་ཨོ་རན་ (Oren Moverman) ལགས་ལ་བོད་པའི་ངོས་ནས་ཐུགས་རྗེ་ཆེ་ཞུ་ཆེད། སྤྱི་སྤྱོད་རླངས་འཁོར་སྦ་སེ་གཉིས་རིན་མེད་ཐོག་གྲ་སྒྲིག་གནང་བ་བཞིན། ནིའུ་ཡོག་དང་ནིའུ་འཇར་སི་ཁུལ་ནས་བོད་མི་ ༡༧༠ ཙམ་ཕེབས་ཡོད་པ་རེད། གློག་བརྙན་བལྟ་མཁན་ཕྱི་རྒྱལ་མི་སྣ་མང་བའི་རྐྱེན་གྱིས་ཚོགས་ཁང་ནང་མ་གཤོངས་པར་བོད་མི་ ༤༠ ཙམ་ཚོགས་ཁང་ཕྱི་ལ་སྡོད་དགོས་བྱུང་ཡོད།
ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས་ཀྱིས་འགྲེལ་བརྗོད་གནང་བར་གཞིགས་ན། དེ་རིང་གཅིག་ནི་རེས་གཟའ་ཉི་མའི་གུང་སེང་ཡིན་པ་དང་། གཉིས་ནས་གློག་བརྙན་སྟོན་ས་དེ་གྲོང་ཁྱེར་ནིའུ་ཡོག་ནས་ཐག་རིང་པོ་ཡིན་ནའང་མི་མང་དག་ཅིག་ཕེབས་ཐུབ་པར་ཧ་ཅང་གི་ཡག་པོ་བྱུང་སྐོར་དང་། དེ་བཞིན་གློག་བརྙན་འཁྲབ་ཁྲིད་པ་བྷར་བྷ་ར་མི་ལར་ (Barbara Miller) ལགས་དང་འབྲེལ་ཡོད་རྣམས་ཧ་ཅང་མཉེས་པོ་བྱུང་སྟེ། འདི་ལྟར་རྒྱབ་སྐྱོར་གནང་བར་བཀའ་དྲིན་ཆེ་ཞེས་གསུངས་ཡོད་སྐོར་འགྲེལ་བརྗོད་གནང་། གཞན་ཡང་བོད་རིགས་སྤྱི་མཐུན་ཚོགས་པའི་ཚོགས་གཙོས་གློག་བརྙན་སྟོན་སའི་ཉེ་འདབས་སུ་ཡོད་པའི་བཀྲ་ཤིས་འཁྱིལ་ཆོས་ཚོགས་ནས་གང་ཅིའི་ཐད་མཐུན་འགྱུར་རོགས་སྐྱོར་གནང་ཡོད་ཅེས་གསུངས་ཡོད་པ་རེད། 
འཁྲབ་ཁྲིད་པ་བྷར་བྷ་ར་མི་ལར་ (Barbara Miller) ལགས་དང་། འཁྲབ་གཞུང་རྩོམ་པ་པོ་དང་གློག་བརྙན་བཟོ་བསྐྲུན་པ་ཨོ་རན་ (Oren Moverman) ལགས་གཉིས་ནས་ཀྱང་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་རྒྱུན་ལས་དང་། རྒྱབ་སྐྱོར་བ། རྟེན་འབྲེལ་ཞུ་བར་ཕེབས་མཁན་བོད་མི། གློག་བརྙན་གཟིགས་གྲུབ་པའི་རྗེས་ཐུགས་ཚོར་ཇི་ཡོད་གསུང་བཤད་མདོར་བསྡུས་གནང་མཁན་དོན་གཙོད་ཟུར་པ་རིན་ཆེན་དར་ལོ་ལགས་ལ་ཐུགས་རྗེ་ཆེ་ཞུས་ཡོད།
ཕྱི་ཟླ་ ༡༠ ཚེས་ ༡༩ ཉིན་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པས། བདེ་སྐྱིད་ཀྱི་ཤེས་རབ་གྲོང་ཁྱེར་ནིའུ་ཡོག་ཏུ་ཐེངས་དང་པོར་སྟོན་གནང་བར་རྟེན་འབྲེལ་ཞུ་རྒྱུ་དང་། གློག་བརྙན་བཟོ་སྐྲུན་གནང་མཁན་འབྲེལ་ཡོད་རྣམས་ལ་ཐུགས་རྗེ་ཆེ་ཞུ་བའི་བྱེད་སྒོ་འདི་དང་འབྲེལ་བའི་སྐོར་གསར་འགོད་གསལ་བསྒྲགས་སྤེལ་ཡོད་པ་བཅས།།
