༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༨ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་ཞུས་པའི་རྒྱ་གར་ལྷོ་ཕྱོགས་སུ་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཟབ་སྦྱོང་མཇུག་སྒྲིལ་ཡོད།
དེ་ཡང་ཐེངས་འདིའི་ཟབ་སྦྱོང་གི་དམིགས་ཡུལ་ནི། བོད་དོན་ཞུ་གཏུག་ལས་འགུལ་སྤེལ་བར་མཁོ་བའི་ཤེས་ཡོན་དང་ནུས་པ་གོང་མཐོར་གཏོང་ཆེད་ཡིན་པ་དང་། དེར་རྒྱ་གར་ལྷོ་ཕྱོགས་གྲོང་ཁྱེར་འདྲ་མིན་ནས་ཕེབས་པའི་ན་གཞོན་ ༣༥ མཉམ་ཞུགས་གནང་ཡོད།
ཟབ་སྦྱོང་གི་ཉིན་གཉིས་པ་ཕྱི་ཟླ་ ༡༠ ཚེས་ ༡༧ ཉིན་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་ཞུ་གཏུག་གྲ་སྒྲིག་བྱེད་སྟངས་དང་། ཚད་ལྡན་ཐབས་བྱུས་སྒྲིག་སྟངས། གནད་དོན་གང་གི་ཆེད་དུ་ཞུ་གཏུག་བྱེད་ཕྱོགས། བོད་མིའི་སྒྲིག་འཛུགས་ནས་མཉམ་འབྲེལ་རྒྱལ་ཚོགས་ཞུ་གཏུག་གནང་ཕྱོགས་སོགས་ཀྱི་སྐོར་སློབ་སྟོན་གནང་ཡོད།
དེ་བཞིན་བོད་མི་མང་སྤྱི་འཐུས་དང་ལྷོ་སྤྱི་ཟུར་པ་ཆོས་འཕེལ་ཐུབ་བསྟན་ལགས་ཀྱིས་གསུང་བཤད་གནང་ཞིང་། ཁོང་གིས་རང་ཉིད་ཀྱི་ཉམས་མྱོང་ལ་གཞི་བཅོལ་ནས་རྒྱ་གར་ལྷོ་ཕྱོགས་སུ་ཞུ་གཏུག་བྱེད་ཕྱོགས་དང་། གདོང་ལེན་བྱ་དགོས་ཇི་ཡོད། ཐབས་བྱུས་སྒྲིག་སྟངས། དེ་བཞིན་བོད་རིགས་ན་གཞོན་ཚོས་རྒྱ་གར་གྱི་ན་གཞོན་ཚོ་དང་མཉམ་དུ་འབྲེལ་འདྲིས་བྱ་རྒྱུར་འབད་རྩོལ་བྱེད་དགོས་པ་མ་ཟད། ཞུ་གཏུག་བྱ་བར་ས་གནས་ཀྱི་སྐད་ཡིག་སྦྱོང་རྒྱུ་གལ་ཆེན་པོ་ཡིན་པའི་སྐོར་ནན་བརྗོད་གནང་ཡོད།
ཉིན་རྒྱབ་བོད་དོན་ལས་འགུལ་བསྟི་གནས་ཁང་གི་འཕྲུལ་རིག་འགན་འཛིན་དང་བོད་མི་མང་སྤྱི་འཐུས་བློ་བཟང་རྒྱ་མཚོ་སྲི་ཐར་ལགས་ཀྱིས་སྤྱི་ཚོགས་བརྒྱུད་ལམ་དང་དྲྭ་རྒྱའི་བདེ་འཇགས་སྐོར་སློབ་སྟོན་གནང་ཡོད་པ་དང་། ཁོང་གིས་ཞུ་གཏུག་ཆེད་དུ་སྤྱི་ཚོགས་བརྒྱུད་ལམ་གྱི་སྡིངས་ཆ་དང་ལག་ཆ་འདྲ་མིན་བེད་སྤྱོད་བྱེད་སྟངས་ཐད་ལག་ལེན་དངོས་ཀྱི་ལམ་སྟོན་དང་སྦྲགས། བོད་དོན་དྲིལ་བསྒྲགས་དང་ཞུ་གཏུག་བྱ་བར་སྤྱི་ཚོགས་དྲྭ་རྒྱའི་ཁེ་ཕན་རྣམས་གསལ་སྟོན་གནང་བའི་ཐོག་དྲྭ་རྒྱའི་བདེ་འཇགས་ལའང་དོ་སྣང་དགོས་པའི་ལམ་སྟོན་གནང་ཡོད་པ་རེད།
ཕྱོགས་མཚུངས་ཉིན་དེར་ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་རིན་ཆེན་ལགས་དང་ཚེ་བརྟན་སྒྲོལ་མ་ལགས་གཉིས་ནས་དང་བླངས་བོད་དོན་ཞུ་གཏུག་ལས་འགུལ་ངོ་སྤྲོད་དང་། ད་ལྟའི་བཀའ་ཤག་གིས་བོད་རིགས་ན་གཞོན་ཚོར་དམིགས་བསལ་ཐུགས་སྣང་གིས་བོད་དོན་ཆེད་དུ་ཞུ་གཏུག་བྱེད་སའི་སྡིངས་ཆ་ཞིག་སྐྲུན་གནང་ཡོད་པ་གསལ་བཤད་གནང་རྗེས་རྒྱ་གར་དང་བླངས་བོད་དོན་ཞུ་གཏུག་ལས་འགུལ་གྱི་འབྲེལ་མཐུད་པ་ངག་དབང་ཆོས་ལྡན་ལགས་དང་། རྒྱ་གར་ལྷོ་ཕྱོགས་དང་བླངས་བོད་དོན་ཞུ་གཏུག་ལས་འགུལ་གྱི་འབྲེལ་མཐུད་པ་ཟུར་པ་ལྷ་རོང་ལགས་གཉིས་ནས་ཚོགས་པའི་ལས་བསྡོམས་སྐོར་གསུངས་ཡོད།
ཕྱི་ཟླ་ ༡༠ ཚེས་ ༡༨ ཉིན་སྦྱོང་བརྡར་གྱི་ཉིན་མཐའ་མར་མ་འོངས་པའི་ལས་དོན་དང་། ལག་བསྟར་འཆར་གཞི་སྒྲིག་ཆེད་ཚོགས་བཅར་བ་ནང་ཁུལ་བགྲོ་གླེང་ལྷུག་པོ་གནང་ཡོད་པ་མ་ཟད། མ་འོངས་ལས་དོན་སྤེལ་ཕྱོགས་སྐོར་བསམ་ཚུལ་བརྗེ་ལེན་གནང་ཡོད། ཟབ་སྦྱོང་གྲུབ་མཚམས་ཚོགས་བཅར་བ་རྣམས་ཕྱི་དྲིལ་ལས་ཁུངས་དང་ཏཱ་ལའི་བླ་མ་མཐོ་སློབ་ཟུང་སྦྲེལ་གྱིས་གོ་སྒྲིག་ཞུས་པའི་བོད་ཀྱི་གལ་གནད་སྐོར་གསུང་བཤད་ལས་རིམ་ནང་མཉམ་ཞུགས་གནང་གི་ཡོད་པ་བཅས།།
