༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་ཕེབས་འབྱོར་གྱིས་ཐོག་མར་བོད་དོན་རྒྱབ་སྐྱོར་ཚོགས་པ་པོ་ཏ་ལ་ཧི་མ་ལ་ཡ་ཚོགས་པའི་ལྕམ་ཛུ་ན་ན་ (Zuzana) ལགས་དང་། རླུང་རྟ་ཚོགས་པའི་ལྕམ་ཨ་ཊི་ཀ་ (Edita Kleckerová) ལགས་ཐེ་བའི་བོད་དོན་རྒྱབ་སྐྱོར་ཚོགས་པའི་སྐུ་ཚབ་ལྷན་མཇལ་མོལ་དང་སྦྲགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་གོ་སྟོན་སྲུང་བརྩི་ཞུ་ཕྱོགས་དང་། ལས་འཆར་ལག་བསྟར་གནང་ཕྱོགས་སོགས་ཀྱི་སྐོར་གྲོས་མོལ་གནང་ཡོད། སྐབས་དེར་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཕྲོད་བཞེས་སྐོར་ཅེཀ་སྤྱི་མཐུན་རྒྱལ་ཁབ་ཀྱི་གསར་འགོད་པ་ཚོར་གོ་རྟོགས་ཡག་པོ་མེད་པས། མགོན་པོ་མཆོག་གི་སྐུ་ཁམས་འཕྲོད་བཞེས་དང་བོད་ནང་གི་ཛ་དྲག་གནས་སྟངས་སྐོར་བཀའ་འདྲི་ཞུས་ཡོད། དེ་རྗེས་དཔལ་ལྡན་སྲིད་སྐྱོང་མཆོག་ནས་ཨ་རིའི་རླུང་འཕྲིན་ཁང་གི་གསར་འགོད་པ་ལེམ་ཨིས་ཀོཊ་ (Liam Scott) ལགས་དང་ཇི་སི་ཀ་ (Jessica Jerreat) ལགས་ཀྱི་བཅར་འདྲི་དང་ལེན་གྱིས་རྒྱ་ནག་གི་རྒྱལ་མཚམས་ལས་བརྒལ་བའི་དྲག་གནོན་དང་། བོད་དང་ཅེཀ་སྤྱི་མཐུན་རྒྱལ་ཁབ་ཀྱི་འབྲེལ་ལམ་སྐོར་བཀའ་མོལ་གནང་། ཕྱི་དྲོ་དཔལ་ལྡན་སྲིད་སྐྱོང་མཆོག་ནས་ ༢༠༠༠ ཞི་བདེའི་གླེང་སྟེགས་ཀྱི་ཚོགས་འདུ་ཐེངས་ ༢༨  པའི་སྐབས་ཨར་ཇེན་ཊི་ནའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཕར་ནན་ཊོ་ཨིག་ལེ་སི་ཧ་ (Fernando Iglesias) ལགས་དང་། ཅེག་སྤྱི་མཐུན་རྒྱལ་ཁབ་ཏུ་ཡོད་པའི་ཨར་ཇེན་ཊི་ནའི་གཞུང་ཚབ་ཀ་ལོ་ཊིའོ་ཇ་བིར་ (Claudio Javier Rozencwaig) ལགས་སོགས་དང་མཇལ་འཕྲད་གནང་། སྐབས་དེར་གྲོས་ཚོགས་འཐུས་མི་ཕར་ནན་ཊོ་ཨིག་ལེ་སི་ཧ་ལགས་ནས་རང་ཉིད་ཀྱི་གསར་འགོད་པའི་ཉམས་མྱོང་དང་སྦྱར་ཏེ། རྒྱ་ནག་གི་ལོ་རྒྱུས་འཕེལ་རིམ་འགྲེལ་བརྗོད་དང་། དྲག་གནོན་མྱོང་མཁན་རྣམས་ལ་གདུང་སེམས་མཉམ་སྐྱེ་ཞུས་ཡོད། དཔལ་ལྡན་སྲིད་སྐྱོང་མཆོག་གིས་ཁོང་རྣམ་པ་གཉིས་ལ་བོད་དོན་དང་འབྲེལ་བའི་དཔེ་དེབ་གཉིས་ངོ་སྤྲོད་དང་འབྲེལ། བོད་ཀྱི་གནད་དོན་དངོས་ཡོད་ཇི་ཡིན་རྟོགས་ཞིབ་གནང་དགོས་པ་ལས། རྒྱ་ནག་གཞུང་གི་འཁྱོག་བཤད་ལ་ཉན་མི་འོས་པ་གསུངས། དེ་མཚུངས་ཉིན་དེར་ ༢༠༠༠ ཞི་བདེའི་གླེང་སྟེགས་ཐེངས་ ༢༨ པའི་གཟེངས་རྟགས་འབུལ་བཞེས་མཛད་སྒོ་ (Prague Congress Center) དུ་འཚོགས་ཤིང་། ཚོགས་འདུའི་ཐོག་མང་གཙོ་དང་འབྲེལ་བའི་བགློ་གླེང་ནང་གནད་ཡོད་མི་སྣ་མང་དག་ཅིག་མཉམ་ཞུགས་གནང་ཡོད། སྐབས་དེར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་ཐའེ་ཝན་གྱི་སྲིད་འཛིན་ཟུར་པ་ཚའི་ཨིང་ཝན་མཆོག་དང་མཇལ་འཕྲད་གནང་ཡོད་པ་རེད། མཛད་སྒོའི་དབུ་འབྱེད་མཛད་སྒོའི་ཐོག་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཙོ་མི་ལོ་སི་ (Miloš Vystrčil) ལགས་དང་། སྐུ་ཞབས་ཝལ་ཊར་རུ་སེལ་མེཊ་ (Walter Russell Mead) ལགས་སོགས་ནས་གསུང་བཤད་གནང་ཞིང་། སྐབས་དེར་སྐུ་ཞབས་མེཊ་ལགས་ནས་ད་ལྟའི་དུས་སུ་འཛམ་གླིང་ནང་མང་གཙོར་དཀའ་ངལ་འཕྲད་བཞིན་ཡོད་པ་དང་། ལྷག་པར་འཛམ་གླིང་ནང་དབང་ཆའི་འཐབ་རྩོད་ཆེ་རུ་འགྲོ་བཞིན་པའི་སྐོར་གསལ་སྟོན་དང་སྦྲགས། རང་དབང་རྒྱལ་ཁབ་ཁག་ནས་དེ་ལ་འགན་མ་ཁུར་བའམ་སྣང་མེད་དུ་བཞག་པ་ལ་བརྟེན་ནས་རྒྱ་ནག་ལྟ་བུའི་སྲིད་དབང་སྒེར་འཛིན་རིང་ལུགས་པས་རྒྱལ་སྤྱི་ལ་ཉེན་ཁ་བཟོ་གི་ཡོད་པ་གསུངས། དེ་ལྟར་གསུང་བཤད་པ་ཐུན་མོང་ནས་རྒྱལ་སྤྱིའི་དཀའ་ངལ་ཁྲོད་ནས་མང་གཙོའི་རིན་ཐང་སྲུང་སྐྱོབ་བྱ་ཕྱོགས་སྐོར་བགྲོ་གླེང་ལྷུག་པོ་གནང་ཡོད་པ་བཅས།།