༄༅། །ཕྱི་ལོ་ ༢༠༢༤ ཟླ་བ་ ༡༠ ཚེས་ ༡༢ ཉིན། སུད་སི་དང་ལིག་ཏེན་སིཊཡན་ས་གནས་ཁག་གི་བོད་ཡིག་སློབ་གྲྭའི་བོད་སློབ་འགན་འཛིན་དང་། དགེ་རྒན་རྣམ་པའི་ཚོགས་ཆེན་ཐེངས་གཉིས་པ་དེ་བཞིན་ཛུ་རིག་ས་གནས་ཨོར་ལཱེ་ཀོན་དུ་ (Oerlikon) འཚོགས་ཤིང་། ཚོགས་འདུའི་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དང་གསོལ་ཇ་འབྲས་སིལ། དེ་གནས་སུད་སི་དང་ལིག་ཏེན་སིཊཡན་བོད་སློབ་སྤྱི་ཁྱབ་འགན་འཛིན་ཀརྨ་ཆོས་སྐྱིད་ལགས་ནས་དགའ་བསུའི་གསུང་བཤད་དང་སྦྲགས་ཚོགས་འདུའི་བརྗོད་བྱ་རིམ་པ་ཁག་མི་འདྲ་ངོ་སྤྲོད་གནང་། དེ་ནས་མགྲོན་གྱི་གཙོ་བོ་སུད་སིའི་སྐུ་ཚབ་དོན་གཅོད་ཁང་གི་སྐུ་ཚབ་བསྟན་འཛིན་ཆོས་བཟང་ལགས་ནས་ཕྱི་རྒྱལ་ཡུལ་གྲུ་དང་། དམིགས་བསལ་ཡུ་རོབ་ཁག་ཏུ་གཏན་འབེབས་གནང་བའི་བསླབ་གཞིའི་རྩ་འཛིན་གྱི་བརྒྱུད་རིམ་ངོ་སྤྲོད་གནང་བ་དང་། སུད་སིའི་དོན་ཁང་གི་ཁྱབ་ཁོངས་སུ་ཡོད་པའི་རྒྱལ་ཁབ་ཁག་ཏུ་ཡོད་པའི་བོད་ཡིག་སློབ་གྲྭའི་གནས་སྟངས། ད་དུང་མུ་མཐུད་ནས་ས་གནས་ཁག་ཏུ་བོད་པའི་སློབ་གྲྭ་ཚགས་ཚུད་པོ་དང་ཕྲུ་གུ་གང་མང་འཛུལ་ཞུགས་བྱེད་པར་འབད་བརྩོན་གནང་དགོས་ལུགས་སོགས་འབོད་སྐུལ་གནང་།
དེ་ནས་ཨར་གྷོའོ་བོད་སློབ་ཀྱི་དགེ་རྒན་མཆོག་གོ་རྡོ་རྗེ་ལགས་ནས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས། བསླབ་གཞིའི་རྩ་འཛིན་དགོངས་དོན་ལྟར་རྩོམ་སྒྲིག་གནང་བའི་སྔོན་འགྲོ་འཛིན་གྲྭ་ནས་འཛིན་རིམ་བཞི་པ་བར་གྱི་སློབ་དེབ་རེ་རེའི་གནད་འགག་དང་ཁྱད་ཆོས་སོགས་ཀྱི་སྐོར་ངོ་སྤྲོད་གནང་། དེ་རྗེས་དགེ་རྒན་སོ་སོའི་འཛིན་གྲྭ་ཆ་བགོས་ཀྱིས་སློབ་དེབ་ཐོག་བསྐྱར་ཞིབ་དང་ཆད་ལྷག་གང་ཡོད་སོགས་ཟིན་ཐོར་བཀོད། མཐར་ཤེས་རིག་ལས་ཁུངས་ནས་རྩོམ་སྒྲིག་གནང་བའི་སློབ་དེབ་དེ་བཞིན་སུད་སི་དང་ལིག་ཏེན་སིཊཡན་ས་གནས་བོད་སློབ་ཁག་ཏུ་ལག་བསྟར་བྱེད་མིན་ཐད། དགེ་རྒན་གཅིག་ནས་བར་ཞུགས་གནང་བ་མ་གཏོགས་ཚོགས་བཅར་བ་ཡོངས་ནས་མོས་མཐུན་གནང་། ཚོགས་བཅར་དགེ་རྒན་དང་འགན་འཛིན་ཡོངས་ལ་སྔོན་འགྲོ་ནས་འཛིན་རིམ་བཞི་པ་བར་གྱི་སློབ་དེབ་ཆ་ཚང་ཕུལ། ད་དུང་སྤྱི་ཁྱབ་འགན་འཛིན་ཀརྨ་ཆོས་སྐྱིད་ལགས་ཀྱི་གཙོ་སྐྱོང་དང་མིང་འདོན་འོག་དགེ་རྒན་དང་བོད་སློབ་འགན་འཛིན་ལྔ་ལས་གྲུབ་པའི་ཤེས་ཡོན་ཚོགས་ཆུང་ཞིག་མང་མོས་ཐོག་གསར་འཛུགས་ཐུབ་པ་བྱུང་། ཚོགས་འདུའི་མཐའ་མར་འདས་པའི་སྐད་ཡིག་འགྲན་སྡུར་ལ་གཞིགས་པའི་བསྐྱར་ཞིབ་དང་མ་འོངས་པར་ཚགས་ཚུད་པོ་དང་ཡར་རྒྱས་ཀྱི་ཐད་ལ་བསམ་ཚུལ་བརྗེ་རེས་སོགས་གནང་ཡོད། །
