༢༠༡༢ ཟླ་ ༢ ཚེས་ ༢༩  རེས་གཟའ་ལྷག་པ།
༄༅། །སྦག་སེ་(Basque)རང་སྐྱོང་གྲོང་སྡེ་ལྷན་ཚོགས་ནས་བོད་དོན་རྒྱབ་སྐྱོར་གྱི་གྲོས་ཆོད་གཏན་འབེབས་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༢ ཚེས་ ༢༣ ཉིན་སྦག་སེ་གྲོང་སྡེ་ལྷན་ཚོགས་ནས་བོད་དོན་རྒྱབ་སྐྱོར་གྱི་གྲོས་ཆོད་གཏན་འབེབས་གནང་ཡོད་པའི་ནང་འཁོད་དོན། ཕྱི་ལོ་ ༢༠༠༠ ནང་ཡུ་རོབ་གྲོས་ཚོགས་ངོས་ནས་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབར་ལོ་གསུམ་ནང་ཚུན་དོན་དམ་གྱི་གྲོས་མོལ་མ་བྱས་ན། ཡུ་རོབ་མཐུན་ཚོགས་ངོས་ནས་རྒྱ་གར་དུ་རྟེན་གཞི་བྱས་པའི་བཙན་བྱོལ་གཞུང་དེ་བཞིན་བོད་མིའི་ཁྲིམས་མཐུན་གྱི་སྐུ་ཚབ་གཅིག་ལ་ངོས་ལེན་བྱེད་དགོས་ཀྱི་ཡོད་པའི་གྲོས་ཆོད་གཏན་འབེབས་བྱུང་བ་ལྟར། ད་ཆ་ཡུ་རོབ་མཐུན་ཚོགས་ངོས་ནས་གྲོས་ཆོད་དེའི་ཐོག་སླར་ཡང་ཐུགས་ཞིབ་ནན་ཏན་ཞིག་གནང་དགོས་ཀྱི་ཡོད། དེ་བཞིན་ཡུ་རོབ་མཐུན་ཚོགས་ནང་རྒྱ་ནག་གི་སྐུ་ཚབ་བསྐོ་གཞག་ཡོད་པ་བཞིན་བོད་མིའི་དམིགས་བསལ་སྐུ་ཚབ་ཅིག་ཀྱང་བསྐོ་གཞག་གནང་དགོས་ཀྱི་རེད། ཅེས་སོགས་འཁོད་འདུག
བོད་དོན་རྒྱབ་སྐྱོར་གྱི་གྲོས་ཆོད་དེ་བཞིན་གཏན་འབེབས་གནང་སྐབས་སྤྱི་ཚོགས་རིང་ལུགས་ཀྱི་ཆབ་སྲིད་ཚོགས་པ་མ་གཏོགས་ཆབ་སྲིད་ཚོགས་པ་ཡོངས་ཀྱིས་རྒྱ་ནག་གཞུང་ནས་བོད་ཐོག་བཟུང་བའི་སྲིད་བྱུས་དེ་དང་ལེན་བྱེད་ཐུབ་ཐབས་མེད་པའི་འགྲེལ་བརྗོད་གནང་འདུག དེ་བཞིན་སྦག་སེ་མངའ་སྡེ་དང་སེ་པན་གཞུང་གཉིས་ནས་ཕྱི་ལོ་ ༢༠༠༠ ལོར་བོད་དོན་རྒྱབ་སྐྱོར་གྱི་གྲོས་ཆོད་དེར་རྒྱབ་སྐྱོར་གནང་དགོས་པའི་འབོད་སྐུལ་ཡང་གནང་འདུག་པ་བཅས། །