དེ་ཡང་ཆེས་མཐོའི་ཁྲིམས་ཞིབ་པ་ཆེ་བ་ཟུར་པ་དང་། སྤྱི་འཐུས་ཚོགས་གཞོན་ཟུར་པ་བྱ་དུར་བསོད་ནམས་བཟང་པོ་མཆོག་ནི། ཕྱི་ལོ་ ༡༩༣༨ ལོའི་ཟླ་ ༩ ཚེས་ ༡༥ ཉིན་བོད་ལྗོངས་ལ་སྟོད་བྱ་དུར་ཡོན་ཆབ་སྟིང་ཀ་ཞེས་པའི་གྲོང་སྡེ་དེར་འཁྲུངས། ལོ་དྲུག་ནས་བྱ་དུར་དགོན་དུ་ཡི་གེ་འབྲི་ཀློག་ལ་སྦྱངས་བརྩོན་དང་དགོན་གྱི་སྤྱི་གཉེར་ལས་ཚབ་བཅས་གནང༌། ཕྱི་ལོ་ ༡༩༥༩ དུས་འགྱུར་སྐབས་བལ་ཡུལ་བརྒྱུད་རྒྱ་གར་ལ་འབྱོར་རྗེས་བཙན་བྱོལ་བོད་མིའི་ལམ་ལས་བརྒྱ་ཤོག་གི་ཧིན་དྷིའི་སྐད་བསྒྱུར་དང་སྤྱི་པའི་འགན་འཁྲིའི་ཞབས་ཞུ་སྣ་མང་གནང་། ཕྱི་ལོ་ ༡༩༦༦ ནས་༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེའི་བཀའ་དགོངས་བཞིན་བོན་གཞིས་ཆགས་ཡུལ་ས་ཆ་འཚོལ་སྒྲུབ་ཞབས་ཞུ་དང་། ཕྱི་ལོ་ ༡༩༧༩ ནས་བོན་གཞིས་ས་གནས་འགོ་འཛིན་བཅས་གནང༌། ཕྱི་ལོ་ ༡༩༨༢ ཟླ་ ༩ ཚེས་ ༢ ནས་ཕྱི་ལོ་ ༡༩༩༠ ཟླ་ ༥ ཚེས་ ༡༡ བར་བོད་མི་མང་སྤྱི་འཐུས་སྐབས་བརྒྱད་པ་དང་དགུ་པ། བཅུ་པ་བཅས་སུ་གཡུང་དྲུང་བོན་གྱི་སྤྱི་འཐུས་མཛད་འཁུར་བཞེས། ཕྱི་ལོ་ ༡༩༩༡ ཟླ་ ༥ ཚེས་ ༢༩ ནས་ཕྱི་ལོ་ ༢༠༠༡ ཟླ་ ༩ ཚེས་ ༢༤ བར་བོད་མི་མང་སྤྱི་འཐུས་སྐབས་བཅུ་གཅིག་པ་དང་། བཅུ་གཉིས་པ། བཅུ་གསུམ་པ་བཅས་ཀྱི་ནང་གཡུང་དྲུང་བོན་གྱི་སྤྱི་འཐུས་སུ་འོས་ཐོན་བྱུང་བ་ལྟར་མཛད་ཁུར་བཞེས། ལྷག་པར་དུ་སྐབས་བཅུ་གཅིག་པའི་བོད་མི་མང་སྤྱི་འཐུས་ཚོགས་གཞོན་གྱི་འགན་ཁུར་བཞེས་གནང་བ་དང་། སླར་ཡང་ཕྱི་ལོ་ ༢༠༠༡ ཟླ་ ༠༦ ཚེས་ ༠༡ ནས་ཕྱི་ལོ་ ༢༠༠༡ ཟླ་ ༩ ཚེས་ ༢༤ བར་སྐབས་བཅུ་གསུམ་པའི་ནང་སྤྱི་འཐུས་ཚོགས་གཞོན་གྱི་ཐུགས་འགན་བཞེས་པའི་སྐབས་ཆེས་མཐོའི་ཁྲིམས་ཞིབ་པར་འོས་ཐོན་བྱུང་མཚམས་དགོངས་ཞུ་གནང་།

ཕྱི་ལོ་ ༢༠༠༡ ཟླ་ ༩ ཚེས་ ༢༦ ནས་ཕྱི་ལོ་ ༢༠༠༢ ཟླ་ ༩ ཚེས་ ༣༠ བར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གྱི་ཐུགས་འགན་བཞེས་གནང་བ་དང་། ཕྱི་ལོ་ ༢༠༠༢ ཟླ་ ༡༠ ཚེས་ ༡ ནས་ ༢༠༠༤ ཟླ་ ༩ ཚེས་ ༢༨ བར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་མཛད་ཁུར་བཞེས་ཏེ་བགྲེས་ཡོལ་ལ་ཕེབས་གནང་བ་དང་བར་སྐབས་ནས་སྙུང་མནར་གྱིས་མཐར་ཕྱི་ལོ་ ༢༠༢༤ ཟླ་ ༩ ཚེས་ ༢༨ དགོང་མོ་བོན་གཞིས་ཐོབ་རྒྱལ་གསར་པའི་བཞུགས་གནས་སུ་དགོངས་པ་རྫོགས་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ།།