༢༠༡༢ ཟླ་ ༢ ཚེས་ ༢༧ རེས་གཟའ་ཟླ་བ།
༄༅། །འདི་གར་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་གནས་ཚུལ་མཁོ་སྤྲོད་གནང་དོན་ལྟར་ན། མགོ་ལོག་པདྨ་རྫོང་ནང་ཕྱི་ཟླ་ ༡ ཚེས་ ༡༦ ནས་རིམ་བཞིན་ཞི་རྒོལ་རབ་དང་རིམ་པར་བྱུང་ཡོད་ལ། སྐབས་དེར་ས་གནས་ཉེན་རྟོག་པ་དང་། དམག་མིས་བཙན་གནོན། གཅར་རྡུང་། འཛིན་བཟུང་བྱས་པ་སོགས་ཀྱི་གནས་ཚུལ་ཛ་དྲག་བྱུང་འདུག་ལ། ལྷག་པར་ཕྱི་ཚེས་ ༡༨ ནས་བཟུང་ཨ་སྐྱོང་ཇོ་ནང་པའི་ནང་ཆོས་ལུགས་ཀྱི་བྱེད་སྒོ་གཅིག་ཀྱང་སྤེལ་མི་ཆོག་པའི་བཙན་བཀའ་བཏང་སྟེ་ད་བར་དགོན་པའི་ནང་དུས་མཆོད་སོགས་གཅིག་ཀྱང་འཚོགས་མི་ཐུབ་པ་མ་ཟད། དགོན་པའི་དགེ་འདུན་པ་མང་པོ་ཞིག་ཕྱི་ཟླ་ ༡ ཚེས་ ༡༨ ནས་བཟུང་རིའི་སྒང་དུ་བྲོས་བྱོལ་དུ་ཕེབས་དགོས་ཐུག་འདུག
སྤྱིར་ཨ་སྐྱོང་ཇོ་ནང་དགོན་པར་མཚོན་ན། ལོ་རྟག་པར་བོད་ཟླ་ ༡༢ པའི་ནང་ཉིན་ ༩ རིང་ཕུར་པའམ་དཔལ་ཆེན་རྡོ་གཞོན་ནུའི་སྒོ་ནས་སྒྲུབ་མཆོད་གལ་ཆེན་ཞིག་འཚོགས་སྲོལ་ཡོད་པ་དེ་ནི་དགོན་པ་དེ་དང་ས་གནས་དེའི་དུས་མཆོད་གལ་ཆེ་ཤོས་ཡིན་འདུག དུས་མཆོད་དེ་གྲུབ་མཚམས་དགུ་གཏོར་ཞེས་བོད་ཚེས་ ༢༨ དང་ ༢༩ གཉིས་ལ་དགོན་པར་ཕུར་བ་ཁྲོ་བཅུའི་གར་འཆམ། དེ་བཞིན་བོད་ཀྱི་ཟློས་གར་ཆེན་པོ་དྲི་མེད་ཀུན་ལྡན་དང་། འགྲོ་བ་བཟང་མོ། གླིང་སྒྲུང་རྟ་རྒྱུག་རྒྱལ་འཇོག ཧོར་གླིང་གཡུལ་འགྱེད་སོགས་འཁྲབ་སྟོན་བྱེད་པ། གར་འཆམ་དང་ཟློས་གར་སོགས་ལ་ལྟད་མོ་བ་མང་ཚོགས་ལྔ་སྟོང་ལྷག་འཛོམས་སྲོལ་ཡོད་མོད། ད་ལོར་དེ་ཡང་འཚོགས་ཐུབ་མི་འདུག་ལ། ས་གནས་དེའི་བོད་རིགས་མང་ཚོགས་ཚོས་གནས་ཚུལ་དེ་ལ་བློ་འགྱོད་ཆེན་པོ་བྱེད་བཞིན་ཡོད་འདུག དགོན་པ་དེའི་ནང་ཕྱི་ལོ་ ༡༩༩༩ ལོར་རྒྱལ་གཅེས་ཆོས་གཅེས་ཟེར་བའི་ལས་འགུལ་སྤེལ་སྐབས་དགོན་པའི་གྲྭ་མང་གིས་ངོས་ལེན་མ་བྱས་པར་བརྟེན། དགོན་པའི་བཤད་སྒྲུབ་གཉིས་ཟླ་གསུམ་ལྷག་སྒོ་བརྒྱབ་མྱོང་ཡོད་འདུག་པ་བཅས། །