༄༅། །ཕྱི་ལོ་ ༢༠༢༤ ཟླ་བ་ ༠༨ ཚེས་ ༡༥ ཉིན་ཨིན་གཞུང་གི་དབང་སྒྱུར་འོག་ནས་རྒྱ་གར་ལ་རང་བཙན་ཐོབ་སྟེ་མི་ལོ་ ༧༨ འཁོར་བའི་དུས་ཆེན་རྒྱ་གར་རྒྱལ་ཡོངས་སུ་དགའ་སྐྱིད་སྤྲོ་གསུམ་ངང་ནས་སྲུང་བརྩི་ཞུ་གི་ཡོད་པ་ལྟར། རྒྱ་གར་བྱང་ཕྱོགས་རྡ་རམ་ས་ལར་རྟེན་གཞི་བྱས་པའི་བོད་མིའི་སྒྲིག་འཛུགས་ངོས་ནས་ཀྱང་རྒྱ་གར་གཞུང་དམངས་གཉིས་ལ་འཚམས་འདྲི་ཞུ་ཆེད། བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་སྲི་ཟློག་མཆོད་རྟེན་མདུན་ཐང་དུ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་གཙོས་པའི་དྲུང་ལས་ཡན་གྱི་ལས་བྱེད་རྣམ་པ་ཚང་འཛོམས་ཐོག་དུས་ཆེན་སྲུང་བརྩི་ཞུས་ཡོད།
དེ་ཡང་མཛད་སྒོའི་ཐོག་མར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་གླུ་དང་བཅས་རྒྱ་གར་གྱི་མཚོན་སྣ་གསུམ་ལྡན་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བ་དང་། དེ་རྗེས་རྟེན་འབྲེལ་འཚམས་འདྲི་མཚོན་ཆེད་མཛད་གཙོ་རྣམ་པ་གཙོས་པའི་ཚོགས་བཅར་བ་ཡོངས་ལ་མངར་ཟས་འདེགས་འབུལ་ཞུས་གྲུབ་བསྟུན། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་གསར་འགོད་པའི་བཅར་འདྲིར་དང་བཞེས་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་རྒྱ་གར་ལ་རང་བཙན་ཐོབ་ནས་མི་ལོ་ ༧༨ འཁོར་བའི་དུས་ཆེན་ལ་རྒྱ་གར་གཞུང་དམངས་གཉིས་ལ་འཚམས་འདྲི་དང་འབྲེལ། རྒྱ་གཞུང་དམངས་གཉིས་ནས་འདས་པའི་ལོ་ངོ་བཅུ་ཕྲག་མང་པོའི་རིང་བཙན་བྱོལ་བོད་མི་རྣམས་ལ་ཕྱོགས་ཡོངས་ནས་ཤ་ཚ་རྒྱབ་སྐྱོར་ཅི་ཐུབ་གནང་བར་བཀའ་དྲིན་རྗེས་དྲན་ཞུས་ཡོད།
དེ་བཞིན་དེ་རིང་གི་དུས་ཆེན་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས། ཕྱི་ལོ་ ༡༩༤༧ ལོར་རྒྱ་གར་ལ་རང་བཙན་ཐོབ་པའི་ཉིན་མོ་དེ་རྒྱ་གར་ལ་མཚོན་ན་ལོ་རྒྱུས་ཐོག་ནས་ཉིན་མོ་གལ་ཆེ་ཤོས་དེ་ཆགས་ཀྱི་ཡོད། ཨིན་ཇིའི་རྒྱ་སྐྱེད་རིང་ལུགས་ཀྱི་བཙན་དབང་འོག་ནས་ཐར་ཏེ་རང་བཙན་རྒྱལ་ཁག་ཅིག་གྱུར་ཡོད་དུས། རང་བཙན་ཐོབ་ནས་འདས་པའི་ལོ་ངོ་ ༧༨ རིང་ཆབ་སྲིད་ཚོགས་པ་འདྲ་མིན་གྱི་འགོ་ཁྲིད་ཀྱིས་རྒྱ་གར་ཡར་རྒྱས་གཏོང་བར་འགན་བཞེས་ཡོད།
ད་ལྟའི་ཆར་རྒྱ་གར་ནི་འཛམ་གླིང་ནང་གི་སྟོབས་ཆེན་རྒྱལ་ཁབ་ཆེ་ཤོས་གྲས་སུ་འཚུད་ཀྱི་ཡོད། དེ་འདྲ་ཡིན་དུས་རྒྱ་གར་གྱི་དབུ་ཁྲིད་དང་མི་མང་ཡོངས་ལ་བོད་ཕྱི་ནང་གཉིས་ཀྱི་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ཞུ་རྒྱུ་ཡིན། འཛམ་གླིང་དམག་ཆེན་གཉིས་པའི་རྗེས་རྒྱ་གར་མཚོན་པའི་རྒྱལ་ཁབ་མང་པོ་ཞིག་ལ་རྒྱ་སྐྱེད་རིང་ལུགས་འོག་ནས་རང་བཙན་ཐོབ་ཡོད། འོན་ཀྱང་སྟབས་མ་ལེགས་པ་ཞིག་ལ་རྒྱ་གར་རང་བཙན་ཐོབ་སྟེ་ལོ་ངོ་གསུམ་གྱི་རྗེས་སུ་བོད་དེ་རྒྱ་ནག་དམར་ཤོག་གཞུང་གི་བཙན་འོག་ཏུ་འཚུད་དེ་རང་དབང་བརླག་ཡོད། དེ་རྗེས་ཆིངས་ཡིག་དོན་ཚན་བཅུ་བདུན་ཞེས་པའི་འོག་ལོ་ངོ་བརྒྱད་ཙམ་བསྡད་རྒྱུའི་འབད་རྩོལ་གནང་ཡོད་ཀྱང་། རྒྱ་གཞུང་གིས་བོད་མིའི་གཞི་རྩའི་རང་དབང་ལ་རྡོག་རོལ་བཏང་དུས་བོད་མི་རྣམས་བཙན་བྱོལ་དུ་གྱར་དགོས་བྱུང་ཡོད་ལ། ད་ལྟ་བཙན་བྱོལ་དུ་གྱར་ནས་ལོ་ངོ་དྲུག་བཅུ་རེ་ལྔ་ཙམ་འགྲོ་གི་ཡོད། ཡིན་ནའང་ང་ཚོ་ནང་པ་སངས་རྒྱས་པའི་བསྟན་པའི་རྗེས་འབྲང་བ་ཡིན་དུས་རྟག་པ་བརྟན་པར་ཁས་ལེན་གྱི་མེད་པས། གནས་སྟངས་ལ་འགྱུར་ན་ཏན་ཏན་འགྲོ་གི་རེད་བསམ་པའི་ཡིད་ཆེས་འོག རྒྱལ་སྤྱིའི་ནང་བོད་དོན་གོ་རྟོགས་སྤེལ་རྒྱུ་དང་། བོད་དོན་ལ་རྒྱབ་སྐྱོར་ཐབས་འཚོལ་གྱིས་བོད་ཀྱི་བདེན་མཐའ་སེལ་ཐབས་ལ་འབད་རྩོལ་ཞུ་གི་ཡོད། ཅེས་དང་།
དེ་བཞིན་ཁོང་གིས་བོད་མི་རྣམས་ཕན་ཚུན་རྡོག་རྩ་གཅིག་ཏུ་སྒྲིལ་ཏེ་བོད་དོན་འཐབ་རྩོད་ལ་ནུས་པ་སྤུང་ན་འབྲས་བུ་ཐོན་ངེས་ཡིན་པས་དེ་ལྟར་དགོངས་པ་ཆེ་བཞེས་ཐོག་བོད་མི་སྤྱི་བོ་གནམ་བསྟན་ཡོངས་ནས་རྩ་དོན་ཐོག་ལ་འབད་འབུངས་ཧུར་སྐྱེད་གནང་དགོས་པའི་རེ་སྐུལ་གནང་ཡོད་པ་བཅས།།