ཕྱི་ལོ་ ༢༠༠༨ ཟླ་ ༨ ཚེས་ ༢༡ རེས་གཟའ་ཕུར་བུ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ནན་གྲོང་ཁྱེར་གྱི་ཛི་ནི་ཐ་ཚོགས་ཁང་ཆེན་མོའི་ནང་མགོན་ཀླུ་སྒྲུབ་ཀྱིས་ལྗགས་རྩོམ་མཛད་པའི་བྱང་ཆུབ་སེམས་འགྲེལ་གྱི་བཀའ་སློབ་བཀའ་དྲིན་སྩོན་བཞིན་པ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༨ ཟླ་ ༨ ཚེས་ ༡༦ ནས་ཕ་རན་སི་གྲོང་ཁྱེར་ནན་གྱི་ཛི་ནི་ཐ་ཚོགས་ཁང་ཆེན་པོར་དད་ལྡན་ཆོས་ཞུ་བ་ ༨༠༠༠ བརྒལ་བར་ཉིན་གྲངས་ལྔའི་རིང་མགོན་པོ་ཀླུ་སྒྲུབ་ཀྱིས་ལྗགས་རྩོམ་མཛད་པའི་བྱང་ཆུབ་སེམས་འགྲེལ་གྱི་བཀའ་སློབ་བཀའ་དྲིན་སྩལ་ཡོད་པ་རེད། ཕྱི་ལོ་ ༢༠༠༨ ཟླ་ ༨ ཚེས་ ༢༠ རེས་གཟའ་ལྷག་པའི་ཉིན་གསུང་ཆོས་བཀའ་སློབ་བཀའ་དྲིན་ལེགས་གྲུབ་ཟིན་མཚམས་ཆོས་ཞུར་བཅར་བའི་མི་མང་རྣམས་ལ་བཀའ་སློབ་ཕེབས་དོན། ངོས་རང་འདི་གར་འབྱོར་སྐབས་མི་མང་མང་པོས་བོད་ཀྱི་རྒྱལ་དར་ཁྱེར་ནས་དགའ་བསུ་གནང་བྱུང་བས་ཐུགས་རྗེ་ཆེ། ཞེས་ཞུ་རྒྱུ་ཡིན། དེས་ག་རེ་མཚོན་གྱི་ཡོད་རེད་ཅེས་ན་མི་མང་རྣམས་ཀྱི་བོད་མིའི་ལས་དབང་ལ་གདུང་སེམས་མཉམ་སྐྱེ་དང་ཐུགས་ཁུར་ཡོད་པ་མཚོན་གྱི་ཡོད་རེད། ཅེས་དང་། ལྷག་དོན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྩལ་དོན། བོད་གཞུང་མང་ཛ་དྲག་ལས་དོན་ཚོགས་ཆུང་གིས་ཕྱི་ལོ་ ༢༠༠༨ ཟླ་ ༨ ཚེས་ ༣༠ ཉིན་ཞི་བདེར་དགའ་བའི་མང་ཚོགས་ནས་འཛམ་གླིང་ཁྱོན་ཡོངས་སུ་ཟས་བཅད་སྨྱུང་གནས་དང་གསོལ་འདེབས་སྨོན་ལམ་གྱི་མཛད་རིམ་སྤེལ་རྒྱུ་ཡིན་པ་དེར་མགོན་པོ་གང་ཉིད་ལྷན་ཞུགས་གནང་རྒྱུ་ཡིན་པ་དང་། ཆོས་རྒྱུད་ཁག་དང་བོད་དོན་རྒྱབ་སྐྱོར་བ་གང་མང་མཉམ་ཞུགས་གནང་རྒྱུའི་འབོད་སྐུལ་གྱི་བཀའ་ཡང་ཕེབས་ཡོད་པ་རེད།།
