༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༡༧ ཉིན་མན་སྤར་ཕན་བདེ་གླིང་བོད་མིའི་གཞིས་ཆགས་སུ་ཨ་རིའི་སྲིད་འཛིན་ཇོ་བྷའི་ཌེན་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་སྲིད་བྱུས་སུ་གཏན་འབེབས་གནང་བར་བཀའ་དྲིན་ཆེ་ཞུའི་མཛད་སྒོ་ཞིག་འཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་དྭགས་པོ་ཤེས་སྒྲུབ་གླིང་དགོན་པར་ཚང་འཛོམས་ཀྱིས་ས་གནས་འགོ་འཛིན་ཚེ་དབང་དབྱངས་མཚོ་ལགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ངོ་སྤྲོད་མདོར་བསྡུས་ཤིག་གནང་སྟེ་ཨ་རིའི་སྲིད་སྲིད་འཛིན་མཆོག་དང་མི་མང་བཅས་ལ་ཐུགས་རྗེ་ཆེ་ཞུས་ཡོད།
སྐབས་དེར་དགོན་སྡེ་ཁག་གི་སྐུ་ཚབ་དང་། ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་མི། ས་གནས་རང་བདེན་ཚོགས་ཆུང་གི་ཚོགས་གཙོ་དང་ཚོགས་མི། རྒྱ་གར་བོད་རིགས་མཉམ་ལས་མཐུན་ཚོགས་ཀྱི་ཚོགས་གཙོ་དང་དྲུང་ཆེ། དེ་བཞིན་སྨན་པ་དང་། སྨན་ཞབས་པ། སམ་བྷོ་ཊ་སློབ་གྲྭའི་དགེ་ཆེ་དང་དགེ་རྒན། གཞུང་ཁོངས་མ་ཡིན་པའི་ཚོགས་པ་བཅས་ཕེབས་ཞུགས་གནང་ཡོད་པ་བཅས།།
