༢༠༡༢ ཟླ་ ༡ ཚེས་ ༢༥ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་བཀའ་ཤག་གིས་བཀའ་འབྲེལ་འོག་ཕྱི་ལོ་ ༢༠༡༢ ཟླ་ ༡ ཚེས་ ༢༥ ཉིན་གྱི་སྔ་དྲོ་ཆུ་ཚོད་ ༩ པའི་ཐོག་ཆོས་རིག་ལས་ཁུངས་ནས་གོ་སྒྲིག་ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཞི་བདེ་དང་རང་དབང་དུ་གནས་པའི་བོད་ཀྱི་བདག་པོ་བོད་མིའི་ཐོག་མི་སྤྱོད་ལས་འདས་པའི་དྲག་གནོན་མནར་གཅོད་གཉའ་གནོན་ཤུ་གཞོག་འོག་བོད་རིགས་རྒྱལ་གཅེས་སེར་སྐྱ་ཕོ་མོ་རྒན་བྱིས་བར་གསུམ་གྲངས་ལས་འདས་པ་དུས་མིན་རྐྱེན་ལམ་གྱུར་པ་དང་། ཉེེས་མེད་བོད་མི་ཁྲི་ཚོ་མང་པོ་བཙོན་འཇུག་རྡུང་རྡེག་མནར་གཅོད་སོགས་ཀྱི་ཀླ་ཀློའི་བྱ་སྤྱོད་འོག་དཀའ་སྡུག་ཚད་མེད་དམྱལ་བ་མི་ཡུལ་དུ་མྱངས་དང་མྱོང་བཞིན་ཡོད། ལྷག་པར་ཉེ་ཆར་བོད་བསྟན་སྲིད་ཆེད་རང་ལུས་མེར་སྲེག་གནང་མཁན་སྤྲུ་སྐུ་བསོད་བྷ། ཚུལ་ཁྲིམས། བསྟན་ཉི། བློ་བཟང་འཇམ་དབྱངས་དང་། མེ་མདའ་ཕོག་པ་ལོ་རྒྱ་ཚང་གི་བུ་དང་། ཡོན་ཏན། རྨས་སྐྱོན་ཕོག་པའི་མི་སྣ་སུམ་ཅུ་ལྷག་ཡོད་པ་བཅས་ལ་གདུང་སེམས་མཉམ་སྐྱེའི་བྱས་རྗེས་ལ་གུས་བཀུར་མྱ་ངན་མཚོན་ཆེེད་བཀའ་ཁྲི་མཆོག་མཆོག་གིས་དབུས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དྲུང་ཆེ་ཆུང་དང་ལས་བྱེད་རྣམ་པ།
བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ། གློ་བུར་ལྷགས་པའི་དགེ་བཙུན་སྔགས་གསུམབཅས་ཁྱོན་མི་གྲངས་བརྒྱ་ཕྲག་བརྒལ་བས་བོད་ཁ་བ་གངས་ཅན་ལྗོངས་ཀྱི་བསྟན་པ་ཆབ་སྲིད་ཆེད་རང་སྲོག་བློས་གཏོང་གིས་འཐབ་རྩོད་གནང་མཁན་རྒྱལ་གཅེས་དཔའ་བོ་དཔའ་མོ་ཁོང་རྣམས་ཀྱིས་ཚེ་རབས་ཕྲེང་བར་བྱས་བསགས་སྡིག་ལྟུང་མ་ལུས་བྱང་ཞིང་དག་ནས་དལ་རྟེན་རིམ་བརྒྱུད་བླ་མེད་རྫོགས་བྱང་གི་གོ་འཕང་མྱུར་དུ་ཐོབ་ཆེད་དུ་དམིགས་ནས་རྟེན་མཆོག་སྤྱན་སྔར་མཆོད་སྤྲིན་བརྒྱ་ཚར་དང་འབྲེལ། ༸རྒྱལ་བའི་ཞབས་བརྟན་གསོལ་འདེབས་དང་མ་ཎི་ཡིག་དྲུག་ཆུ་ཚོད་གཅིག་རིང་གསུང་འདོན་གནང་སྐབས། ཆོས་རིག་དྲུང་འཕར་ནོར་བུ་དོན་ལྡན་ལགས་ཀྱིས་སྐྱབས་ཐོ་སྒྲོགས་སྦྱང་གནང་རྗེས་བཀའ་ཁྲི་མཆོག་གིས་མཆོད་འབུལ་དང་འབྲེལ་བའི་སྐོར་ལ་གསུང་བཤད་གནང་དོན། སྐྱབས་གནས་དགེ་འདུན་གྱི་སྡེ་རྣམ་པ། མང་གཙོ་ཀ་བ་གསུམ་གྱི་མཛད་གཙོ་རྣམ་པ། སྲི་ཞུ་བ་རྣམ་པ། མི་མང་རྣམ་པ། ཚང་མས་མཁྱེན་གསལ་རེད། བོད་ནང་རྒྱ་ནག་གཞུང་གིས་འཁྲེག་བཟུང་གི་སྲིད་བྱུས་འོག་བོད་མི་རྣམས་ལ་མནར་གཅོད་དང། བོད་མི་རྣམས་ཀྱང་འུ་ཐུག་ཐབས་ཟད་ཀྱི་གནས་སྟངས་འོག་ཉེ་ཆར་རང་ལུས་མེར་སྲེག་བཏང་བའི་ཡིད་སྐྱོའི་གནས་ཚུལ་བྱུང་འདུག དེ་རིང་འདིར་གདུང་སེམས་མཉམ་སྐྱེ་ཆེད་འཛོམས་པ་རེད། ང་ཚོས་ཤེས་རྟོགས་བྱུང་བར་བདུན་ཕྲག་གཉིས་ནང་སླར་ཡང་རང་མེར་སྲེག་གཏོང་མཁན་བྱུང་བ་ནས་ཚུལ་ཁྲིམས། རང་ལོ་ ༢༠། བསྟན་ཉི། རང་ལོ་ ༢༠། སྤྲུལ་སྐུ་བསོད་ནམས་དབང་རྒྱལ། རང་ལོ་ ༤༠། བློ་བཟང་འཇམ་དབྱངས། རང་ལོ་ ༢༠། བཅས་བྱུང་འདུག བློ་ཕམ་པ་ཞིག་ལ་ཁོང་རྣམ་པ་འདས་གྲོངས་སུ་གྱུར་འདུག དེ་བཞིན་ང་ཚོས་ཤེས་རྟོགས་བྱུང་བར། ད་བར་བོད་སྤྱི་ཡོངས་ནང་ཞི་བའི་ངོ་རྒོལ་བྱེད་བཞིན་ཡོད་པ་དང། ལྷག་པར་མགོ་ལོག་དར་ལག་དང་། རྔ་པ། རྒྱལ་རོང། བྲག་འགོ གསེར་རྟ་བཅས་ལ་བོད་མི་མང་པོ་ཞིག་གིས་ཞི་བའི་ངོ་རྒོལ་བྱེད་སྐབས། བོད་མི་མང་པོ་ཞིག་འཛིན་བཟུང་བྱས་པའི་གནས་ཚུལ་ཐོན་འདུག དེ་ཡང་ཚེས་ ༢༣ ཉིན་རྔ་པ་རྨེའུ་རུ་མ་དང་ཀིརྟི་དགོན་པའི་མདུན་དུ་ཞི་བའི་ངོ་རྒོལ་བྱས་ཏེ་བོད་མི་མང་པོ་ཞིག་འཛིན་བཟུང་བྱས་འདུག ཁམས་བྲག་འགོ་ནང་བོད་མི་རྣམས་ཀྱིས་ཞི་བའི་ངོ་རྒོལ་བྱེད་སྐབས་རང་ལོ་ ༤༠ སོན་པའི་ནོར་པ་ཡོན་ཏན་དང། ལོ་རྒྱ་ཚང་གི་བུ་གཉིས་རྒྱ་ནག་གིས་ཉེན་རྟོག་པས་མེ་མདའ་བརྒྱབ་སྟེ་བཀྲོངས་བ་དང། བོད་མི་སུམ་ཅུ་ལྷག་ལ་མེ་མདའ་ཕོག་སྟེ་རྨས་སྐྱོན་ཕོག་པའི་གནས་ཚུལ་འདུག ཁ་སང་གསེར་རྟ་རྫོང་དུ་བོད་མི་མང་པོ་ཞིག་འཛོམས་ཏེ་ཞི་བའི་སྒོ་ནས་ངོ་རྒོལ་བྱེད་སྐབས་སླར་ཡང་རྒྱ་ནག་གི་ཉེན་རྟོག་པས་མེ་མདའ་བརྒྱབ་སྟེ་པོ་པོ་རང་ལོ་ ༣༥ སོན་པ་དང་། ཟླ་བ་གྲགས་པ་རང་ལོ ༣༣ སོན་པ་གཉིས་འདས་གྲོངས་སུ་གྱུར་འདུག དེ་བཞིན་བོད་མི་ ༤༠ ཙམ་ལ་རྨས་སྐྱོན་ཕོག་པའི་གནས་ཚུལ་ཐོན་ཡོད། འདི་དག་ཚང་མ་ཛ་དྲག་དང་ཡིད་སྐྱོའི་གནས་ཚུལ་རེད། གོང་དུ་ཞུས་པའི་བོད་མི་རྣམས་དང་ཁོང་གི་ནང་མིར་གདུང་སེམས་མཉམ་སྐྱེ་ཞུ་སླད་འདིར་འཛོམས་པ་ཞིག་རེད། དེར་བརྟེན་མཆོད་འབུལ་སྨོན་ལམ་ཡག་པོ་གནང་རོགས་ཞེས་འབོད་སྐུལ་ཞུ་རྒྱུ་ཡིན། དེ་བཞིན་གཞུང་མང་གཉིས་ཀྱི་ཐོག་ནས་བོད་མི་སྤྱི་ཡོངས་དང་། བོད་དོན་རྒྱབ་སྐྱོར་ཚོགས་པ། འཛམ་གླིང་སྤྱི་ཡོངས་ལ་ཕྱི་ཟླ་ ༢ ཚེས་ ༨ རེས་གཟའ་ལྷག་པའི་ཉིན་རྒྱལ་སྤྱི་སྤྱི་ཡོངས་ཐོག་བོད་དང་བོད་མིའི་ཆེད་གདུང་སེམས་མཉམ་སྐྱེའི་ལས་འགུལ་སྤེལ་རོགས་ཞེས་འབོད་སྐུལ་ཞུ་རྒྱུ་ཡིན། དེའི་སྐོར་བཀའ་ཤག་གི་ངོས་ནས་རྗེས་སུ་གསར་འགོད་གསལ་བསྒྲགས་ཤིག་སྤེལ་རྒྱུ་ཡིན། ཐུགས་རྗེ་ཆེ། ཞེས་གསུང་བཤད་གནང་ཡོད། དེ་རྗེས་མུ་མཐུད་སྨོན་ལམ་གསུང་འདོན་གནང་ཡོད་པ་མ་ཟད། དགེ་བཙུན་སྔགས་གསུམ་ལ་སྐུ་འགྱེད་སྒོར་ ༥༠ འབུལ་ལམ་ཞུས་ཏེ་མཆོད་འབུལ་སྨོན་ལམ་གསུང་འདོན་གནང་ཡོད་པ་བཅས། །
