༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༨ ཉིན་རྒྱ་གར་གྱི་རྒྱལ་ས་ལྡི་ལིའི་ཀ་ཐི་ཀ་རིག་གཞུང་བསྟི་གནས་ཁང་དུ་ཨ་རིའི་རོགས་ཚོགས་ཀྱི་རྒྱ་གར་ལས་དོན་འགན་འཛིན་ལྕམ་ཝི་ན་རེ་ཌྜི་ (Veena Reddy) ལགས་ཀྱི་ཕེབས་སྐྱེལ་གྱི་མཛད་སྒོར་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩའི་དྲུང་གཞོན་ཐུབ་བསྟན་རིག་འཛིན་ལགས་ཕེབས་ཞུགས་གནང་ཡོད།
སྐབས་དེར་དྲུང་གཞོན་ཐུབ་བསྟན་རིག་འཛིན་ལགས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལྕམ་ཝི་ན་ལགས་ཀྱི་དབུ་ཁྲིད་དང་རྒྱབ་སྐྱོར་ལ་ཐུགས་རྗེ་ཆེ་ཞུས་པའི་ཕྱག་བྲིས་ཤིག་ཕུལ་ཡོད་པའི་ནང་འཁོད་དོན། ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཁྱེད་ཀྱིས་ཨ་རིའི་རོགས་ཚོགས་ (USAID) ཡི་རྒྱ་གར་ལས་དོན་འགན་འཛིན་གྱི་ཕྱག་ལས་གནང་བའི་རིང་བོད་མིའི་སྒྲིག་འཛུགས་དང་ལྷན་དུ་མཉམ་འབྲེལ་དང་། སྣེ་ཁྲིད་གནང་བར་ཐུགས་རྗེ་ཆེ་ཞུ། ཁྱེད་ཀྱི་དབུ་ཁྲིད་དེས་ལྷོ་ཨེ་ཤི་ཡའི་ཁུལ་དང་། ལྷག་པར་རྒྱ་གར་དུ་བཙན་བྱོལ་བོད་མིའི་སྤྱི་ཚོགས་ཆེ་ཤོས་དེ་ཆགས་ཡོད་པ་དེ་དག་གི་རྒྱུན་གནས་ལ་ཕན་ཐོགས་ཆེན་པོ་བྱུང་ཡོད་པ་མ་ཟད། མ་འོངས་པའི་མཉམ་ལས་ཀྱི་རྨང་གཞི་བརྟན་པོ་ཞིག་ཀྱང་ཚུགས་ཡོད། ང་ཚོས་མ་འོངས་པའི་དུས་སུའང་མཉམ་ལས་འདིའི་ནུས་པ་ལ་བརྟེན་ནས་ཤུགས་རྐྱེན་ཆེན་པོ་ཐེབས་རྒྱུ་ཡིན་པའི་གདེང་ཚོད་ཡོད། ཁྱེད་ཀྱིས་བོད་མིའི་མདུན་ལམ་ཆེད་ཞབས་འདེགས་ཞུས་པར་སླར་ཡང་ཐུགས་རྗེ་ཆེ་ཞུ་བ་དང་སྦྲགས། བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཁྱེད་ཀྱི་བྱ་བ་མཐའ་དག་ལམ་ལྷོངས་ཡོང་བའི་སྨོན་ལམ་ཞུ་རྒྱུ་ཡིན།
མཛད་སྒོའི་སྐབས་ཨ་རིའི་རོགས་ཚོགས་ཀྱི་ལས་བྱེད་དང་། རྒྱལ་ཁབ་ཁག་གི་སྐུ་ཚབ་རྣམ་པ་ཕེབས་ཡོད་པ་དང་། ཁོང་རྣམ་པ་དང་ལྷན་དུ་གླེང་མོལ་བྱ་རྒྱུའི་གོ་སྐབས་ཐོབ་ཡོད་པ་བཅས།།
