༄༅། །ཕྱི་ལོ་ ༢༠༢༤ ཟླ་བ་ ༠༧ ཚེས་ ༠༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བསོད་ནམས་གླིང་གཞིས་ཆགས་ཉེ་ཁུལ་བོད་མིའི་སྒྲིག་འཛུགས་ཆོས་རིག་ལས་ཁུངས་ཁྱབ་ཁོངས་དགོན་སྡེ་ཁག་དང་། ལ་དྭགས་བོད་ཁྱིམ་སློབ་གྲྭ བོད་ཁྱིམ་རྒས་གསོ་ཁང་དུ་གནས་མཇལ་འཚམས་གཟིགས་དང་། ཕྱི་དྲོ་རྒྱ་གར་གྲོས་ཚོགས་འཐུས་མི་ཟུར་པ་ཁྲིག་རྩེ་རིན་པོ་ཆེ་མཆོག་གིས་ཆེ་བསྟོད་ཕེབས་བསུའི་དགོང་ཚིགས་འདེགས་འབུལ་གནང་བར་བར་ལྷན་ཞུགས་གནང་ཡོད།
དེ་ཡང་གོང་ཚེས་ཉིན་ཐོག་མར་དཔལ་ལྡན་སྲིད་སྐྱོང་མཆོག་ནས་ཞི་བའི་ཚལ་གྱི་ཕོ་བྲང་དགེ་འཕེལ་གླིང་དང་། ཀརྨ་སྒྲུབ་བརྒྱུད་ཆོས་གླིང་། གཡུང་དྲུང་ལྷ་རྩེ་དགོན། རུ་ཐོག་ལྷུན་གྲུབ་ཆོས་གླིང་དུ་གནས་མཇལ་དང་སྦྲགས། དགོན་པའི་ལས་སྣེ་ལྷན་དུ་དགོན་པ་སྲ་བརྟན་ཡོང་ཐབས་ཇི་དགེའི་གནད་དོན་ཐོག་གྲོས་མོལ་གནང་། དེ་རྗེས་དཔལ་ལྡན་སྲིད་སྐྱོང་མཆོག་གིས་ལ་དྭགས་བོད་ཁྱིམ་གཙོས་པའི་ཁྱབ་ཁོངས་སློབ་གྲྭར་གཟིགས་སྐོར་དང་འབྲེལ་སློབ་གྲྭའི་དགེ་ལས་སློབ་ཕྲུག་ལྷན་ཐུག་འཕྲད་གནང་ཡོད་པ་མ་ཟད། ཉིན་རྒྱབ་ལ་དྭགས་བོད་ཁྱིམ་སློབ་གྲྭའི་ཚོགས་ཁང་དུ་སློབ་གྲྭའི་དགེ་ལས་སློབ་ཕྲུག་རྣམས་ལ་བོད་མཐོ་སྒང་གི་ཆབ་སྲིད་དང་། ཁོར་ཡུག་གི་གལ་གནད་སྤྱི་དང་། ཁྱད་པར་དུ་བོད་ཀྱི་ཆོས་དང་རིག་གཞུང་གི་རིན་ཐང་ངོས་འཛིན་གྱིས་རྒྱུན་འཛིན་གནང་དགོས་པའི་ལམ་སྟོན་གནང་ཡོད། དེ་བཞིན་ཁོང་གིས་རྒྱ་ནག་གཞུང་ནས་བོད་མིར་དྲག་གནོན་མུ་མཐུད་བྱེད་བཞིན་པའི་དུས་སྐབས་འདིར་བོད་མིའི་སྒྲིག་འཛུགས་ནས་བོད་རྒྱའི་དཀའ་རྙོག་སེལ་ཐབས་དབུ་མའི་ལམ་གྱི་སྲིད་བྱུས་གཞིར་བཞག་ཤར་སྐྱོད་གནང་གི་ཡོད་པ་ནན་བརྗོད་གནང་བ་མ་ཟད། བོད་རྒྱའི་དཀའ་རྙོག་སེལ་ཐབས་སུ་ཉེ་ལམ་ཨ་རིའི་གྲོས་ཚོགས་ཀྱིས་སྤྱི་མོས་ཐོག་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་གནང་ཡོད་སྐོར་གསལ་བཤད་གནང་། དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་གིས་སློབ་གྲྭའི་དགེ་རྒན་རྣམས་ནས་སློབ་ཕྲུག་རྣམས་ལ་བོད་རྒྱའི་དཀའ་རྙོག་དང་། ད་ལྟའི་བོད་ནང་གི་ཛ་དྲག་གནས་སྟངས་སོགས་བོད་དོན་ཆབ་སྲིད་གནད་དོན་རྣམས་འགྲེལ་བརྗོད་གནང་དགོས་པའི་ལམ་སྟོན་གནང་རྗེས་སློབ་ཕྲུག་རྣམས་ཀྱིས་དོགས་དྲི་ཕུལ་བ་ཁག་ལ་ལན་འདེབས་གསལ་བཤད་གནང་ཡོད།
གཞན་ཡང་དེ་ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་ལྕོགས་ལམ་གསར་དུ་ཁང་པ་གསར་རྒྱག་གི་ལས་གཞི་འགྲོ་མུས་ཁག་ལ་གཟིགས་ཞིབ་དང་སྦྲགས། དེར་གནས་སྤོ་འཆར་ཡོད་པའི་ཆུ་ཤུལ་དང་མ་ཁྱུ་གཞིས་མི་ལྷན་ཐུག་འཕྲད་གནང་ཡོད།
ཕྱི་དྲོ་རྒྱ་གར་གྲོས་ཚོགས་འོག་མའི་འཐུས་མི་ཟུར་པ་ལ་དྭགས་ཁྲིག་རྩེ་རིན་པོ་ཆེ་མཆོག་གིས་དཔལ་ལྡན་སྲིད་སྐྱོང་མཆོག་ལ་ཆེ་བསྟོད་ཕེབས་བསུའི་དགོང་ཚིགས་འདེགས་འབུལ་གནང་བར་ལྷན་ཞུགས་གནང་ཡོད་པ་དང་། སྐབས་དེར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས་དང་སྡེ་དཔོན་གཞོན་པ་ཚེ་རིང་དབང་ཕྱུག་ལགས། གྲོང་སྡེ་ལྷན་ཚོགས་ཀྱི་ཚོགས་མི་སོགས་ཕེབས་ཞུགས་གནང་ཡོད།
དཔལ་ལྡན་སྲིད་སྐྱོང་མཆོག་གི་འཚམས་གཟིགས་སྐབས་ལ་སྤྱི་དོན་གྲུབ་བཀྲ་ཤིས་ལགས་དང་། ནང་སྲིད་ཟུང་དྲུང་བཀྲ་ཤིས་བདེ་སྐྱིད་ལགས་ལྷན་བཅར་ཞུས་ཡོད་པ་བཅས།། 
