༢༠༡༢ ཟླ་ ༡ ཚེས་ ༢༠ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༡ ཚེས་ ༡༩ ཉིན་ཕ་རན་སིའི་ཕྱི་འབྲེལ་མགྲིན་ཚབ་པ་སྐུ་ཞབས་བྷར་ན་ཌི་ཝ་ལི་རའོ་(Bernard Valero)མཆོག་གིས་གསར་འགོད་ལྷན་ཚོགས་ཐོག ཉེ་སྔོན་བོད་ནང་བོད་མི་སྐྱ་སེར་ ༡༧ གྱིས་སྔ་ཕྱིར་རང་ལུས་མེར་སྲེག་བཏང་སྟེ་རྒྱ་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་ཞི་བའི་ངོ་རྒོལ་གནང་བའི་གནད་དོན་ཐད། ཕ་རན་སིའི་སྲིད་གཞུང་གིས་བློ་འཚབ་ཀྱི་རྣམ་པ་གསལ་བཏོན་གནང་ཡོད་པ་མ་ཟད། རྒྱ་གཞུང་གིས་བོད་མིའི་ངོ་བོ་དང་རིག་གཞུང་སྲུང་སྐྱོབ་བྱ་རྒྱུའི་ཆ་རྐྱེན་འོག་བོད་མི་ཚོ་དང་ལྷན་དུ་གྲོས་མོལ་གནང་དགོས་པའི་འབོད་སྐུལ་ཡང་གནང་འདུག
གཞན་ཡང་སྐབས་དེར་ཁོང་གིས་གསུང་དོན། བོད་མི་སྐྱ་སེར་དེ་དག་འུ་ཐུག་ཐབས་ཟད་པའི་གནས་སྟངས་ཆགས་པའི་རྐྱེན་གྱིས་རང་ལུས་མེར་སྲེག་བཏང་སྟེ་རྒྱ་གཞུང་ལ་ངོ་རྒོལ་བྱེད་དགོས་ཐུག་པ་རེད། ཕ་རན་སིའི་སྲིད་གཞུང་གིས་རྒྱ་ནག་གཞུང་ལ་བོད་མིའི་ཆོས་དང་རིག་གཞུང། སྐད་ཡིག འགྲོ་བ་མིའི་ཐོབ་ཐང་སོགས་ལ་གུས་བརྩི་ཞུ་དགོས་པ་ནན་སྐུལ་ཞུ་རྒྱུ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་རྩ་ཁྲིམས་ཀྱི་སྒྲོམ་གཞིའི་འོག་བོད་རྒྱ་ཕྱོགས་གཉིས་ཀྱིས་གྲོས་མོལ་གནང་སྟེ་གཉིས་སྨན་དབུ་མའི་ལམ་གྱི་ཐབས་ལམ་ཉག་གཅིག་ཡོད་པ་དེ་བརྒྱུད་བོད་མི་རིགས་ཀྱི་ཆོས་དང་རིག་གཞུང་ལ་རྒྱ་ནག་གཞུང་གིས་བརྩི་བཀུར་དང་སྲུང་སྐྱོབ་བྱེད་དགོས། ཞེས་གསུངས། གཞན་ཡང་ཁོང་གིས་གསུང་དོན། ཕ་རན་སིའི་སྲིད་གཞུང་གིས་དེང་སྐབས་བོད་མི་རྣམས་ཀྱིས་རང་ལུས་མེར་སྲེག་བཏང་བའི་གནད་དོན་ཐོག་སེམས་འཚབ་ཧ་ཅང་ཡོད། ཕ་རན་སིའི་སྲིད་གཞུང་གིས་ཡུ་རོབ་སྤྱི་མཐུན་ཚོགས་པ་དང་རྒྱ་ནག་དབར་གྱི་གྲོས་མོལ་ནམ་བྱུང་སྐབས་གོ་སྐབས་བཟུང་སྟེ་རྒྱ་གཞུང་གིས་འགྲོ་བ་མིའི་ཐོབ་ཐང་ལ་བརྩི་འཇོག་དགོས་པའི་རེ་འདུན་འདོན་བཞིན་ཡོད་ཅེས་གསུངས་ཡོད་པ་བཅས།།།
ཕ་རན་སིའི་ཕྱི་འབྲེལ་མགྲིན་ཚབ་པས་རྒྱ་གཞུང་ལ་རེ་འདུན་གནང་བ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)