༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༩ ཉིན་བོད་མིའི་སྒྲིག་འཛུགས་ནས་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ལ་དགའ་བསུ་ཞུ་རྒྱུའི་གཞུང་འབྲེལ་མཛད་སྒོ་ཞིག་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་གི་དབུ་གཡབ་ཏུ་གོ་སྒྲིག་གནང་སྟེ། ཨ་རིའི་གྲོས་ཚོགས་འཐུས་མི་རྣམ་པས་བོད་དོན་ལ་རྒྱབ་སྐྱོར་གཡོ་མེད་གནང་བཞིན་པར་བཀའ་དྲིན་རྗེས་དྲན་དང་འབྲེལ་ཆེ་བསྟོད་ཞུས་གནང་ཡོད་པ་རེད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༠༩།༣༠ ཐོག་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་དང་སྤྱི་མཐུན་ཚོགས་པའི་འཐུས་མི་སྐུ་ཞབས་མ་ཧི་ཀལ་མེག་ཀོལ་ (Michael McCaul) མཆོག་གིས་དབུ་ཁྲིད་པའི་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་དང་། གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་མང་གཙོ་ཚོགས་པའི་འགོ་ཁྲིད་སྐུ་ཞབས་གྷེ་རེ་གོ་རི་མིག་ (Gregory Meeks) མཆོག ཨ་རིའི་གྲོས་ཚོགས་འོག་མའི་སྒྲིག་ཁྲིམས་ཚོགས་ཆུང་གི་ཚོགས་གཞོན་སྐུ་ཞབས་ཇིམ་མེག་གྷོ་ཧན་ (Jim McGovern) མཆོག གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ནང་གསེས་རྒྱ་གར་ཞི་བདེ་རྒྱ་མཚོའི་ཚོགས་ཆུང་གིས་ཚོགས་གཞོན་སྐུ་ཞབས་ཨ་མི་བྷེ་ར་ (Ami Bera) མཆོག གྲོས་ཚོགས་འཐུས་མི་ལྕམ་སྐུ་མ་རིཡ་ནེ་ཊི་མི་ལར་མིག་ (Mariannette Miller-Meeks) མཆོག གྲོས་ཚོགས་འཐུས་མི་ལྕམ་སྐུ་ནི་ཀོལ་མ་ལིའོ་ཏ་ཀིས་ (Nicole Malliotakis) མཆོག དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཆེས་མཐོའི་ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག དབུས་འོས་བསྡུ་ལས་ཁང་གི་འགན་འཛིན་དང་ལས་བྱེད་འདེམས་ལྷན་ཚོགས་གཙོ་དཔེ་ཟུར་དབང་འདུས་ཚེ་རིང་མཆོག བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་གཙོས་པའི་སྲི་ཞུའི་ལས་བྱེད་རྣམ་པ། གཞུང་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ་རྣམ་པ། ས་གནས་བོད་མི་དང་སློབ་ཕྲུག གསར་འགོད་པ་སོགས་ཚང་འཛོམས་ཀྱི་ཐོག་མར་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་གཏོང་མུར། དཔལ་ལྡན་སྲིད་སྐྱོང་མཆོག་གིས་བོད་ཀྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་། དེ་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ལ་ཕེབས་བསུ་དང་འབྲེལ། ཐེངས་འདིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཁོངས་སུ་ཨ་རིའི་སྲིད་དོན་ཚོགས་པ་གཉིས་ཀའི་གྲོས་ཚོགས་འཐུས་མི་ལྷན་བཅར་ཞུས་ཡོད་པས། ཨ་རིའི་གྲོས་ཚོགས་ནང་བོད་དོན་ལ་རྒྱབ་སྐྱོར་ཚད་མཐོ་པོ་ཡོད་པ་བསྟན་ཡོད་སྐོར་གསལ་བཤད་གནང་བའི་ཐོག གྲོས་ཚོགས་འཐུས་མི་རྣམ་པས་བོད་བསྟན་སྲིད་མི་རིགས་ཀྱི་ཆེད་དུ་རྒྱབ་སྐྱོར་ཞོགས་འདེགས་ཡུན་རིང་གནང་བར་བཀའ་དྲིན་རྗེས་དྲན་ཞུས་ཡོད། དེ་དང་འབྲེལ་ཏེ་བར་ལམ་ཨ་རིའི་གྲོས་ཚོགས་གོང་འོག་གཉིས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་ཚད་མཐོའི་མང་མོས་ཐོག་གཏན་འབེབས་གནང་ཡོད་པ་དང་། ད་ལམ་ཁྲིམས་ཡིག་དེ་ཉིད་ཨ་རིའི་སྲིད་འཛིན་གྱི་ལས་ཁུངས་སུ་སླེབས་ཡོད་སྟབས། རིང་མིན་ཨ་རིའི་སྲིད་འཛིན་ཇོ་བྷའི་ཊན་མཆོག་གིས་མཚན་རྟགས་དགོད་རྒྱུའི་རེ་བ་སྐྱོན་གྱི་ཡོད་པ་དང་། གལ་ཏེ་ཁྲིམས་འཆར་དེ་ཉིད་ཨ་རི་གཞུང་གི་ཁྲིམས་ཡིག་ཏུ་འགྱུར་ཚེ་ཨ་རི་གཞུང་ནས་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ངོས་འཛིན་ལ་ཐེ་བྱུས་བྱེད་པར་གདོང་ལེན་བྱ་རྒྱུ་མ་ཟད། རྒྱ་ནག་གཞུང་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་བོད་མིའི་དབུ་ཁྲིད་བར་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་གྲོས་མོལ་གནང་རྒྱུར་སྐུལ་དེད་གནང་རྒྱུ་ཡིན་པ་གསལ་བཤད་གནང་། དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་གིས་རྒྱལ་ཁབ་གཞན་རྣམས་ནས་ཀྱང་ཨ་རིའི་རྗེས་སུ་འབྲང་སྟེ་བོད་དོན་ཐོག་ཁྲིམས་ཡིག་གཏན་འབེབས་གནང་སྐྱོང་ཡོང་བའི་རེ་སྐུལ་ཞུས་ཡོད། དེ་རྗེས་སློབ་ཕྲུག་ཁག་ཅིག་ནས་རིག་གཞུང་གཞས་སྣ་གཟིགས་འབུལ་ཞུས་གྲུབ་མཚམས་བོད་མིའི་སྒྲིག་འཛུགས་ངོས་ནས་ཨ་རིའི་གྲོས་ཚོགས་ཀྱི་སྐུ་ཚབ་རྣམ་པར་ཆེ་བསྟོད་མཚོན་ཆེད་སྐུ་ཐང་རེ་དང་། ལོ་རྒྱུས་ཐོག་བོད་དེ་རང་བཙན་རྒྱལ་ཁབ་ཅིག་ཡིན་པའི་མཚོན་རྟགས་སུ་བོད་དངུལ་པར་སྒྲོམ་ནང་བསྒྲིགས་ཏེ་ཕུལ་ཡོད། དེ་ནས་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་མ་ཧི་ཀལ་མེག་ཀོལ་མཆོག་གིས་མང་ཚོགས་ལ་གསུང་བཤད་གནང་དོན། ང་ཚོ་འདིར་ཨ་རིའི་གྲོས་ཚོགས་ཀྱི་སྲིད་དོན་ཚོགས་པ་གཉིས་ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་རམ་ས་ལར་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་མཇལ་བར་ཡོང་བ་ཡིན། ལོ་ངོ་ ༦༥ སྔོན་དུ་རྒྱ་ནག་དམར་ཤོག་གཞུང་གིས་བོད་བཙན་བཟུང་བྱས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཁོང་གི་རྗེས་འབྲང་མི་མང་ཁྲི་བརྒྱད་ལྷག་བཙན་བྱོལ་དུ་བྲོས་དགོས་བྱུང་བ་རེད། བོད་མི་རྣམས་ནས་རང་གི་རིག་གཞུང་གོམས་སྲོལ་སྲུང་སྐྱོབ་ཆེད་རང་གི་ཕ་མ་སྤུན་མཆེད་དང་། གྲོགས་པོ་གྲོགས་མོ་རྒྱབ་ཏུ་བཞག་ནས་བྲོས་ཡོང་བ་རེད། རྒྱ་གར་གཞུང་གི་བཀའ་དྲིན་ལ་བརྟེན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཁོང་གི་རྗེས་འབྲང་བ་རྣམས་འདིར་རང་དབང་ལྡན་པའི་ངང་ནས་རང་གི་ཆོས་དང་རིག་གཞུང་རྒྱུན་འཛིན་བྱེད་བཞིན་འཚོ་བ་སྐྱེལ་གྱི་ཡོད། ཉིན་གཅིག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཁོང་གི་མི་མང་རྣམས་རང་ཡུལ་བོད་ལ་ལོག་ཐུབ་པའི་རེ་བ་ཞུ་གི་ཡོད། ཅེས་དང་། དེ་བཞིན་ཁོང་གིས་རྒྱ་ནག་གཞུང་གིས་བོད་ས་བཙན་འཕྲོག་བྱས་ནའང་བོད་ཀྱི་ཆོས་དང་རིག་གཞུང་འཕྲོག་ཐུབ་ཀྱི་མེད་པ་དང་། བར་ལམ་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་བཞུགས་སྒར་རྡ་རམ་ས་ལར་ཕེབས་རྒྱུའི་ཐག་གཅོད་བྱུང་རྗེས་རྒྱ་ནག་གཞུང་གིས་སྐུ་ཚབ་ཚོགས་ཆུང་ལ་དེ་ལྟར་ཕེབས་ན་འགྲིག་གི་མེད་ཚུལ་གྱི་ཡིག་འབྲེལ་བཏང་ཡོད་ནའང་། ཨ་རིའི་གྲོས་ཚོགས་ནས་དེ་ལ་སྣང་བ་མ་གཏད་པར་བོད་དོན་ལ་རྒྱབ་སྐྱོར་མཚོན་ཆེད་རྡ་རམ་སར་ཕེབས་པ་ཡིན་སྐོར་གསུངས། གཞན་ཡང་ཁོང་གིས་ཉེ་ལམ་ཨ་རིའི་གྲོས་ཚོགས་གོང་འོག་གཉིས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་ཡོད་སྐོར་དང་། ཁྲིམས་ཡིག་གི་ནང་དོན་ཇི་ཡིན་འགྲེལ་བརྗོད་གནང་རྗེས་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་མང་གཙོ་ཚོགས་པའི་འགོ་ཁྲིད་སྐུ་ཞབས་གྷེ་རེ་གོ་རི་མིག་གིས་གསུང་བཤད་གནང་དོན། ང་ལ་མི་མང་པོས་རྡ་རམ་ས་ལར་བཅར་དགོས་དོན་དྲིས་སོང་། སྐབས་དེར་ངས་མར་ཊིན་ལུ་ཐར་ཀིང་གཞོན་པས་གསུང་པ་ལྟར། ས་གནས་གང་ཞིག་ཏུ་མ་དྲང་བའི་གནས་ཚུལ་བྱུང་བ་དེ་ནི་འཛམ་གླིང་ཡོངས་ཀྱི་དྲང་བདེན་ལ་ཉེན་ཁ་ཆགས་ཡོད། ཅེས་ལན་འདེབས་བཞིན་ཡོད། དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཐོབ་པ་དེ་ངས་ནམ་ཡང་བརྗེད་མི་སྲིད། ཁོང་གི་རྣམ་དཔྱོད་དང་། བཟང་སྤྱོད། སྙིང་སྟོབས་ཀྱིས་སེམས་འགུལ་ཐེབས་བྱུང་བ་མ་ཟད། ངས་མི་ཚེ་ནང་ལག་བསྟར་བྱ་རྒྱུའི་འབད་བརྩོན་བྱེད་ཀྱི་ཡིན། དེ་རིང་འདིར་ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་དང་ལྷན་དུ་ང་ཨ་རི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་མང་གཙོ་ཚོགས་པའི་འགོ་ཁྲིད་ཅིག་ཡིན་པའི་ཆ་ནས་སླེབས་ཡོད། ང་ཚོ་ཚང་མས་བོད་དོན་ཐོག་རྒྱབ་སྐྱོར་དང་གདུང་སེམས་མཉམ་སྐྱེ་ཞུ་རྒྱུ་ཡིན། བོད་མི་དང་། བོད་དོན་རྒྱབ་སྐྱོར་བ་རྣམས་ཀྱིས་བོད་ཀྱི་འཐབ་རྩོད་ཆེད་སྐུ་ལས་སྐྱོན་བཞིན་ཡོད། རྒྱ་ནག་གཞུང་གིས་བོད་མི་རྣམས་ལ་མཉའ་གནོན་ཤུགས་ཆེར་གཏོང་བཞིན་པ་དང་། བོད་ཕྲུག་རྣམས་བཙན་དབང་གིས་གཏན་འཇགས་སློབ་གྲྭར་གཏོང་གི་ཡོད་པ་ང་ཚོས་ཤེས་ཀྱི་ཡོད། རྒྱ་གཞུང་གིས་བོད་མི་ལས་འགུལ་བ་དང་། གཞས་པ། རྩོམ་པ་པོ། དགེ་རྒན་ལ་སོགས་བོད་མི་བརྒྱ་ཕྲག་མང་པོས་རང་གི་གཞི་རྩའི་འགྲོ་བ་མིའི་ཐོབ་ཐང་རྩོད་པ་དང་། ནང་པའི་ཆོས་ཉམས་ལེན་བྱེད་པར་བཙོན་འཇུག་བྱེད་བཞིན་པ་ང་ཚོས་ཤེས་ཀྱི་ཡོད་ལ་དེར་སེམས་འཚབ་བྱེད་ཀྱི་ཡོད། ང་ཚོས་རྒྱ་ནག་གཞུང་གིས་ད་བར་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་མཚམས་འཇོག་དང་། སྔོན་འགྲོའི་ཆ་རྐྱེན་གང་ཡང་མེད་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་ཞི་མོལ་བྱ་དགོས་པའི་འབོད་སྐུལ་ཞུ་གི་ཡོད། མ་འོངས་པར་བོད་ཕྲུག་རྣམས་ནས་རང་གི་ཕ་སྐད་ཤོད་རྒྱུ་དང་། རིག་གཞུང་དང་ལམ་སྲོལ་སོགས་རྒྱུན་འཛིན་བྱ་བར་འབད་རྩོལ་བྱེད་པའི་རེ་བ་བྱེད་ཀྱི་ཡོད་ལ་ཡིད་ཆེས་ཡོད། ངས་མ་འོངས་བོད་མི་རྣམས་རང་གི་ཕ་ཡུལ་བོད་དུ་ལོག་ཐུབ་པ་དང་། རང་གི་ཆོས་དང་རིག་གཞུང་ཉམས་ལེན་བྱེད་ཐུབ་པ། རང་གི་མི་ཚེ་ཞི་བདེ་དང་ཆེ་མཐོང་དང་ལྡན་པའི་ངང་སྐྱེལ་ཐུབ་པའི་སྨོན་ལམ་རྒྱག་གི་ཡོད། ཅེས་གསུངས། དེ་བཞིན་ཨ་རིའི་གྲོས་ཚོགས་འོག་མའི་སྒྲིག་ཁྲིམས་ཚོགས་ཆུང་གི་ཚོགས་གཞོན་སྐུ་ཞབས་ཇིམ་མེག་གྷོ་ཧན་མཆོག་གིས།  ཁོང་དང་ཨ་རིའི་སྐུ་ཚབ་ཚོགས་ཆུང་ཞིག་དེ་སྔོན་བོད་དུ་ཆེད་ཕེབས་གནང་བའི་སྐབས་རྒྱ་ནག་གཞུང་གིས་བོད་མི་ཚོར་སྡུག་རྩུབ་གཏོང་བཞིན་པའི་གནས་སྟངས་དངོས་གཟིགས་བྱུང་ཚུལ་དྲན་གསོ་དང་འབྲེལ། བཙན་བྱོལ་བོད་མིའི་སྤྱི་ཚོགས་ཁྲོད་མང་གཙོ་ཚད་ལྡན་ལག་བསྟར་བྱེད་བཞིན་པར་བསྔགས་བརྗོད་གནང་བ་མ་ཟད། རྒྱ་ནག་གཞུང་ལྟར་མ་ཡིན་པར་བཙན་བྱོལ་བོད་མི་རྣམས་ནས་རང་གི་དབུ་ཁྲིད་སྲིད་སྐྱོང་འོས་བསྡུའི་ལམ་ནས་འདེམས་ཀྱི་ཡོད་པ་གསུངས། དེ་དང་ཆབས་ཅིག་ཁོང་གིས་བོད་མིའི་སྒྲིག་འཛུགས་ནི་བཙན་གནོན་དང་ཡུལ་གྱར་བ་རྣམས་ཀྱི་མིག་ལྟོས་ལྟ་ས་ཞིག་ཆགས་ཡོད་པ་དང་། ཨ་རི་གཞུང་གིས་བོད་དོན་ལ་རྒྱབ་སྐྱོར་གཡོ་བ་མེད་པ་མུ་མཐུད་ནས་གནང་གི་རེད་ཅེས་སོགས་གསུངས་ཡོད་པ་རེད། དེ་རྗེས་གྲོས་ཚོགས་འཐུས་མི་ཨ་མི་བྷེ་ར་ (Ami Bera) མཆོག གྲོས་ཚོགས་འཐུས་མི་ལྕམ་སྐུ་མ་རིཡ་ནེ་ཊི་མི་ལར་མིག་ (Mariannette Miller-Meeks) མཆོག གྲོས་ཚོགས་འཐུས་མི་ལྕམ་སྐུ་ནི་ཀོལ་མ་ལིའོ་ཏ་ཀིས་ (Nicole Malliotakis) མཆོག་ནས་ཀྱང་བོད་དོན་ལ་རྒྱབ་སྐྱོར་གྱི་གསུང་བཤད་གནང་གྲུབ་མཚམས་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་གིས་གསུང་བཤད་གནང་དོན། ང་ཚོ་འདིར་བཅར་བ་དང་། སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཐོབ་པར་དངོས་གནས་བསོད་ནམས་ཆེན་པོ་ཡིན། ཁྱེད་ཚོས་ང་ཚོར་ཐུགས་རྗེ་ཆེ་ཞུས་པ་བཞིན་ང་ཚོས་ཁྱེད་ཚོར་ཐུགས་རྗེ་ཆེ་ཞུ་འདོད་བྱུང་། གང་ཡིན་ཞེ་ན་ཨ་རིའི་གྲོས་ཚོགས་གོང་འོག་ནང་ཉེ་ཆར་ཁྲིམས་ཡིག་གཏན་འབེབས་བྱུང་བ་དེ་ང་ཚོས་དུས་ཡུན་རིང་པོ་ནས་དཀའ་ལས་བརྒྱབ་པ་ཞིག་རེད། དེར་༸གོང་ས་མཆོག་གི་ཐུགས་རྗེ་བྱིན་རླབས་དང་། གྲོས་ཚོགས་འཐུས་མི་རྣམས་ཀྱི་འབད་བརྩོན་ལ་བརྟེན་ནས་ཡར་རྒྱས་ཀྱི་རྣམ་པ་ཞིག་ཐོན་ཐུབ་པ་བྱུང་ཡོད།

ཁྲིམས་ཡིག་འདིས་ང་ཚོས་བོད་རྒྱའི་དཀའ་རྙོག་སྐོར་ཤེས་རྟོགས་ཡོད་པ་མཚོན་གྱི་ཡོད། ལོ་ཤས་སྔོན་རྒྱ་ནག་གི་སྲིད་འཛིན་ཨ་རིའི་རྒྱལ་ས་ཝ་ཤིང་ཊོན་ཌི་སིར་སླེབས་སྐབས་ངས་རྒྱ་ནག་གཞུང་གིས་བོད་དང་བོད་མིར་བཙན་གནོན་གཏོང་བཞིན་པར་ངོ་རྒོལ་བྱེད་ཀྱི་ཡོད་བརྗོད་པར། རྒྱ་ནག་གི་སྲིད་འཛིན་གྱིས་ཁྱེད་ཚོས་བོད་ནང་དུ་ཡར་རྒྱས་ཀྱི་རྣམ་པ་དེ་དག་ཤེས་ཀྱི་མེད། ཁྱེད་རྣམ་པ་བོད་དུ་ཕྱིན་ནས་ལྟ་ཆོག་ཅེས་ལན་བྱུང་བར་ངས་ཐུགས་རྗེ་ཆེ་ཞེས་ཞུས་ཡིན། ད་བར་ལོ་ངོ་ ༢༥ རིང་བཀག་སྡོམ་བྱས་རྗེས་གོ་སྐབས་སྤྲད་སྟབས་ང་དང་སྐུ་ཚབ་ཚོགས་ཆུང་ཞིག་བོད་དུ་ཕྱིན་པ་ཡིན། སྐབས་དེར་ང་ཚོས་བོད་ནང་གི་དངོས་ཡོད་གནས་སྟངས་མཐོང་བྱུང་། ང་ཚོས་ཕོ་བྲང་པོ་ཏཱ་ལ་མཇལ་བ་མ་ཟད། ༸གོང་ས་མཆོག་གི་གཟིམ་ཆུང་ཡང་མཇལ་རྒྱུ་བྱུང་སོང་། ལྷ་ས་གྲོང་ཁྱེར་དུ་ང་ཚོས་༸གོང་ས་མཆོག་གི་མཚན་ཡང་གླེང་བ་ཡིན། སྐབས་དེར་རྒྱ་ནག་གིས་བོད་ཀྱི་སྐད་ཡིག་དང་རིག་གཞུང་རྩ་མེད་གཏོང་བྱུས་བྱེད་བཞིན་པ་ངས་ཚོར་བྱུང་།  ང་ཚོ་ཚང་མས་རྒྱ་ནག་གཞུང་གང་འདྲ་ཡིན་མིན་ཤེས་ཀྱི་ཡོད་པ་དང་། གྲོས་ཚོགས་གོང་འོག་གཉིས་ཀྱིས་གཏན་འབེབས་བྱས་པའི་ཁྲིམས་ཡིག་འདི་བརྒྱུད་རྒྱ་གཞུང་ལ་བརྡ་ལན་ཞིག་འབྱོར་ངེས་ཡིན། ང་ཚོའི་འཐབ་རྩོད་དེ་མ་འོངས་སོན་རྩའི་ཆེད་དུ་ཡིན་དུས་བོད་ནང་དུ་ཡོད་པའི་བོད་ཕྲུག་རྣམས་ལ་རྒྱ་གཞུང་གིས་རྒྱ་སྒྱུར་གྱི་སྲིད་བྱུས་འོག་གཏན་འཇགས་སློབ་གྲྭར་བཙན་འཇུག་བྱས་པ་དང་། དོགས་སྲུང་བྱས་པ་སོགས་ང་ཚོས་སྣང་མེད་ནམ་ཡང་གཏོང་ཐུབ་ཐབས་མེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བྱམས་སྙིང་རྗེའི་བསླབ་བྱ་དེ་མུ་མཐུད་འཛམ་གླིང་འདིར་གནས་ཀྱི་རེད། ཡིན་ནའང་རྒྱ་ནག་གི་སྲིད་འཛིན་གྱི་བྱས་རྗེས་རྣམས་འཛམ་གླིང་མི་སུས་ཀྱང་དྲན་གྱི་མེད་པ་ཚང་མས་ཤེས་དགོས། བོད་མི་ཚོའི་ཡིད་ཆེས་དང་རེ་བ་བརྟན་པོ་བཅང་བ་དེ་ལ་བརྟེན་ནས་བོད་དུ་ཁྱད་པར་ཞིག་ཏན་ཏན་བཟོ་ཐུབ། ཅེས་གསུངས་ཡོད་པ་རེད། སྤྱིར་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ནས་ཁ་སང་ཕྱི་ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སུ་ཕེབས་ཏེ། བོད་མི་མང་སྤྱི་འཐུས་ལྷན་ཁང་དང་། བོད་ཀྱི་འགྲེམས་སྟོན་ཁང་དུ་གཟིགས་སྐོར་གནང་བོད་མིའི་སྒྲིག་འཛུགས་ཀྱི་དབུ་ཁྲིད་ལྷན་མཇལ་མོལ་གནང་ཡོད་པ་ལ། ཕྱི་དྲོ་བོད་ཀྱི་ཟློས་གར་ཚོགས་པར་བོད་མིའི་སྒྲིག་འཛུགས་ངོས་ནས་ཨ་རིའི་སྐུ་ཚབ་ཚོགས་ཆུང་ལ་ཕེབས་བསུ་དགོང་ཚིགས་འདེགས་འབུལ་དང་རིག་གཞུང་འཁྲབ་སྟོན་གཟིགས་འབུལ་ཞུས་ཡོད། དེ་རིང་སྔ་དྲོ་སྐུ་ཚབ་ཚོགས་ཆུང་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་ལམ་སྟོན་བཀའ་སློབ་ཞུས་ཡོད་པ་བཅས།།