༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཨ་རིའི་མང་གཙོ་ཁྱབ་སྤེལ་བསྟི་གནས་ཁང་གིས་མང་གཙོ་ཞབས་ཞུའི་གཟེངས་རྟགས་ (Democracy service Medal) གནང་ཡོད། 

དེ་ཡང་ཨ་རིའི་མང་གཙོ་ཁྱབ་སྤེལ་བསྟི་གནས་ཁང་གིས་འཛམ་གླིང་ནང་གི་མང་གཙོ་དང་རང་དབང་ཆེད་འཐབ་རྩོད་གནང་མཁན་ལས་འགུལ་བ་རྣམས་ལ་ཆེ་བསྟོད་ངོས་འཛིན་དང་། གཟེངས་རྟགས་གནང་སྲོལ་ཡོད་པ་ལྟར། འདི་ལོར་བོད་དང་། སུ་ཊན། ཡུག་རེན་གྱི་ཚོགས་པ་གསུམ་ལ་མང་གཙོའི་གཟེངས་རྟགས་དང་། ཨ་རིའི་གྲོས་ཚོགས་གོང་མའི་འཐུས་མི་མེ་ཆི་མེག་ཀོ་ནལ་ (Mitch McConnell) མཆོག་དང་། ཨ་རིའི་གྲོས་ཚོགས་འོག་མའི་ཚོགས་ཟུར་ལྕམ་སྐུ་ནན་སི་པི་ལོ་སི་ (Nancy Pelosi) མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག གཞན་ཡང་ཨུ་རུ་སུ་དང་། བེ་ལ་རུ་སིའི་མང་གཙོའི་ལས་འགུལ་བ་བཅས་ལ་མང་གཙོའི་ལས་འགུལ་གྱི་གཟེངས་རྟགས་ཕུལ་འདུགགཟེངས་རྟགས་འབུལ་བཞེས་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་མང་གཙོ་ཁྱབ་སྤེལ་བསྟི་གནས་ཁང་ནས་བོད་དོན་ལ་ཡུན་རིང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། བཙན་བྱོལ་བོད་མི་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་ཤར་སྐྱོད་གནང་སྟེ། བཙན་བྱོལ་ནང་དུ་མང་གཙོའི་ཆ་ལག་ཚང་བའི་སྒྲིག་འཛུགས་གསར་འཛུགས་བསྐྱངས་ཏེ། ད་ལམ་མང་གཙོའི་ཀ་བ་གསུམ་ལྡན་གྱི་སྒྲིག་འཛུགས་ཚད་ལྡན་ཞིག་ཏུ་གྱུར་ཡོད་པ་གསལ་བཤད་གནང་།

དེ་མཚུངས་ཁོང་གིས་རྒྱ་ནག་གཞུང་གིས་བོད་ཐེ་བའི་བཙན་འཛུལ་བྱ་ཡུལ་ས་ཁུལ་ཁག་ཏུ་བཙན་ཤེད་ཀྱིས་ཆོས་དང་རིག་གཞུང་རྩ་མེད་བཏང་སྟེ། རྒྱ་རིགས་སུ་བསྒྱུར་ཐབས་ཀྱི་འབད་རྩོལ་ཤུགས་ཆེ་བྱེད་བཞིན་པ་དང་། ལྷག་པར་རྒྱ་ནག་གཞུང་གིས་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་བརྒྱུད་བོད་ཕྲུག་ས་ཡ་གཅིག་ལྷག་ལ་ཆབ་སྲིད་སློབ་གསོ་སྤྲད་དེ་མི་རིགས་བཙན་སྒྱུར་གྱི་ལས་གཞི་གཞི་རྒྱ་ཆེན་པོ་སྤེལ་བཞིན་པར་ཐུགས་འཚབ་ཡོད་པ་གསུངས། དེ་བཞིན་དཔལ་ལྡན་སྲིད་སྐྱོང་མཆོག་གིས་རྒྱལ་སྤྱིའི་སྤྱི་ཚོགས་ཀྱིས་བོད་དོན་ལ་གཟིགས་ཕྱོགས་སྐོར་དང་འབྲེལ་ཏེ། རྒྱལ་ཁབ་ཚང་མས་བོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པར་ཁས་ལེན་བྱས་ན། རྒྱ་ནག་གིས་ང་ཚོར་གྲོས་མོལ་བྱེད་དགོས་པའི་རྒྱུ་མཚན་མཐོང་གི་མ་རེད། ངས་ད་དུང་སྲིད་གཞུང་ཁག་ལ་འདྲི་རྒྱུར། རྒྱ་ནག་གིས་རྒྱལ་ཁབ་གཞན་ལ་བོད་ཁོ་ན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པར་བཤད་དུ་འཇུག་དོན་ཅི་ཡིན་བསམ་གྱི་འདུག་གམ། དེ་ནི་རྒྱ་ནག་གིས་བོད་ལ་དབང་སྒྱུར་བྱེད་པའི་ཁྲིམས་མཐུན་གྱི་དབང་ཆ་མེད་པར་ཤེས་ཀྱི་ཡོད་པས་རེད། རྒྱུ་མཚན་དེའི་ཕྱིར་ཁོ་ཚོས་རྒྱལ་སྤྱིའི་སྤྱི་ཚོགས་ཀྱི་ཁྲོད་ནས་ཁྲིམས་མཐུན་གྱི་དབང་ཆ་དེ་འཐོབ་ཐབས་བྱེད་ཀྱི་ཡོད། ངས་གོ་སྐབས་འདི་བཟུང་ནས་ཨ་རིའི་གྲོས་ཚོགས་ནང་གི་ང་ཚོའི་གྲོགས་པོ་ཚོ་དང་། ལྷག་པར་གྲོས་ཚོགས་ཀྱི་ཚོགས་གཙོ་ལྕམ་སྐུ་ནན་སི་པོ་ལོ་སི་མཆོག་དང་། སྐུ་ཞབས་ཁཱ་སི་ཊོ་རོ་ (Joaquin Castro) ལགས་ཀྱིས་སྣེ་ཁྲིད་པའི་གྲོས་ཚོགས་འཐུས་མི་ཚོར་ཐུགས་རྗེ་ཆེ་ཞུ་འདོད་བྱུང་། གྲོས་ཚོགས་འཐུས་མི་ཁཱ་སི་ཊོ་རོ་ལགས་ཀྱིས་ཁ་སང་ཨ་རིའི་གྲོས་ཚོགས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ་དེའི་སྐོར་གསུངས་སོང་། ཁྲིམས་ཡིག་དེ་ནི་བོད་རྒྱའི་དཀའ་རྙོག་ད་དུང་སེལ་མེད་པའི་རྒྱལ་སྤྱིའི་དཀའ་རྙོག་ཅིག་ཡིན་པ་དང་། དཀའ་རྙོག་དེ་ཉིད་སེལ་ཐབས་སུ་རྒྱ་ནག་གཞུང་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་བོད་མིའི་དབུ་ཁྲིད་བར་སྔོན་འགྲོའི་ཆ་རྐྱེན་མེད་པའི་ཐོག་ནས་གྲོས་མོལ་ལ་ཞུགས་སྐུལ་དེད་གཏོང་ཆེད་ཡིན་པ་རེད། ཅེས་སོགས་གསུངས།དེ་རྗེས་ཨ་རིའི་གྲོས་ཚོགས་འོག་མའི་འཐུས་མི་ཇ་ཁ་ལིན་ཁཱ་སི་ཊོ་རོ་ (Joaquin Castro) ལགས་ཀྱིས་གསུངས་དོན།  ཁ་སང་རང་ང་དང་ཕྱག་སྦྲེལ་གྲོས་ཚོགས་འཐུས་མི་རྣམ་པས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་བྱས་པ་ཡིན། སྲིད་འཛིན་བྷའི་ཌེན་མཆོག་གིས་མི་འགྱངས་པར་ཁྲིམས་ཡིག་དེར་མཚན་རྟགས་འགོད་རྒྱུ་ཡིན་པ་དང་། ཁྲིམས་ཡིག་དེས་ཨ་རིའི་གཞུང་གིས་བོད་ཐོག་འཛིན་པའི་སྲིད་བྱུས་སྲ་བརྟན་དུ་གཏོང་གི་ཡོད། ཅེས་དང་།

ཉེ་བའི་ལོ་ཤས་རིང་བོད་མི་རྣམས་ལ་བཙན་ཤེད་ཀྱིས་གནས་སྤོ་དང་ཁྲིམས་འགལ་གྱི་བྱ་སྤྱོད་གཞན་གྱིས་མནར་གཅོད་ཚད་མེད་བཏང་ཡོད་ཀྱང་། བོད་མིའི་སྒྲིག་འཛུགས་ཀྱི་འགོ་ཁྲིད་ཚོས་བོད་དོན་འཐབ་རྩོད་གསོན་གནས་ཆེད་ལས་དོན་རླབས་ཆེན་བསྒྲུབས་ཡོད། སྲིད་སྐྱོང་སྤེན་པ་ཚེ་རིང་ལགས་ནས་སྲིད་སྐྱོང་གི་ལས་འགན་བཞེས་པ་ཕན་ཆད་རྒྱ་ནག་གི་ཤུགས་རྐྱེན་ལ་ཁ་གཏད་དང་། བོད་ཀྱི་མཐུན་གྲོགས་རྣམས་དང་མཉམ་སྦྲེལ་གྱིས་བཙན་གནོན་ཁ་གཏད་བཅག་ཡོད། ཁོང་གི་མཛད་རྗེས་ལ་ངོས་འཛིན་ཞུ་ཆེད་ཨ་རིའི་མང་གཙོ་ཁྱབ་སྤེལ་བསྟི་གནས་ཁང་གི་ཚབ་ཞུས་ཏེ་སྲིད་སྐྱོང་སྤེན་པ་ཚེ་རིང་མཆོག་ལ་ཕྱི་ལོ་ ༢༠༢༤ ལོའི་མང་གཙོའི་ཞབས་ཞུའི་གཟེངས་རྟགས་འདི་དབུལ་རྒྱུའི་གོ་སྐབས་བཟང་པོ་བྱུང་སོང་། ཞེས་གསུངས་རྗེས་དཔལ་ལྡན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་གཟེངས་རྟགས་ཕུལ་ཡོད་པ་བཅས།།