༄༅། །ཉེ་ཆར་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་བརྙན་ཞིག་བཏོན་པའི་ནང་། པེ་ཅིང་མི་མང་ཁྲིམས་ཁང་ནས་ཁོང་གི་གཅུང་པོ་རྡོ་རྗེ་བཀྲ་ཤིས་ལགས་ཀྱི་འགྱོད་གཞི་དེ་ཆེད་མངགས་འགོར་འགྱངས་སུ་བཏང་སྟེ་གཡོ་སྒྱུ་དང་ཁྲིམས་འགལ་གྱི་བྱ་སྤྱོད་སྤེལ་གྱི་ཡོད་པའི་ཉེས་འཛུགས་བྱས་འདུག
དེ་ཡང་ཕྱི་ལོ་ ༢༠༡༠ ལོར་ལྷ་ས་མི་དམངས་འབྲིང་རིམ་ཁྲིམས་ཁང་གིས་གསང་བའི་ཁྲིམས་བཤེར་བྱས་ཏེ་རྡོ་རྗེ་བཀྲ་ཤིས་ལགས་ལ་དྲང་བདེན་མ་ཡིན་པའི་ཚེ་བཙོན་ཁྲིམས་ཐག་བཅད་ཡོད་པ་དང་། དེ་རྗེས་ཁོང་གི་གཅེན་མོ་མགོན་པོ་སྐྱིད་ལགས་ཀྱིས་མུ་མཐུད་རྡོ་རྗེ་བཀྲ་ཤིས་ལགས་གློད་བཀྲོལ་ཡོང་ཐབས་སུ་ཞུ་གཏུག་གནང་ཡོད་པ་མ་ཟད། སྐབས་མང་པོར་ཁོང་མོར་ཉེན་རྟོག་པས་ཉེས་རྡུང་དྲག་པོ་བཏང་བའི་གནས་ཚུལ་ཐོན་ཡོད་པ་རེད། བརྙན་ནང་དུ་མགོན་པོ་སྐྱིད་ལགས་ཀྱི་ལག་ཏུ་ལོ་ངོ་བདུན་ནམ་བརྒྱད་སྔོན་དུ་པེ་ཅིང་མི་མང་ཁྲིམས་ཁང་གིས་སྤྲད་པའི་ཡི་གེ་ཞིག་སྟོན་བཞིན། པེ་ཅིང་མི་མང་ཁྲིམས་ཁང་ནས་རྡོ་རྗེ་བཀྲ་ཤིས་ལགས་ཀྱི་འགྱོད་གཞི་དེ་ཟླ་གསུམ་གྱི་ནང་ཐག་གཅོད་བྱེད་དགོས་ལུགས་བཤད་ཡོད་ཀྱང་། ད་དུང་ཐག་གཅོད་མ་བྱས་པར་ལོ་མང་པོ་འགོར་སོང་། ཚང་མས་ལྟོས་དང་། འདི་ན་ལྷ་ས་མི་དམངས་ཁྲིམས་ཁང་གིས་མི་དཀར་པོར་ཞྭ་མོ་ནག་པོ་གཡོགས་ནས་འདས་པའི་ལོ་ངོ་བདུན་བརྒྱད་རིང་ལ་རྡོ་རྗེ་བཀྲ་ཤིས་ལགས་ཀྱི་གནད་དོན་ལ་དྲང་བདེན་གྱིས་ཁྲིམས་ཞིབ་མ་བྱས་པ་དང་། ནང་མིར་ཐུག་འཕྲད་བྱེད་མ་བཅུག་པར་འགོར་འགྱངས་བཏང་སོང། ཞེས་བརྗོད་འདུག
ཁོང་མོའི་ལག་ཏུ་ཡོད་པའི་པེ་ཅིང་མི་མང་ཁྲིམས་ཁང་གིས་སྤྲད་པའི་ཡི་གེ་དེའི་ནང་དུ། ཁྱེད་ཀྱི་ཡི་གེ་འབྱོར་བ་ལྟར་ཁྲིམས་ལུགས་དང་མཐུན་པའི་ཞིབ་འཇུག་བྱས་རྗེས་བོད་རང་སྐྱོང་ལྗོངས་མི་མང་ཁྲིམས་ཁང་དུ་ཞིབ་འཇུག་དང་བྱ་རིམ་ལག་བསྟར་ཆེད་འབུལ་རྒྱུ་ཡིན་པས་ཟླ་བ་གསུམ་ནང་ཚུན་བྱ་རིམ་ལག་བསྟར་དང་འབྲས་བུ་གང་བྱུང་གི་ལན་གསལ་སྤྲད་རྒྱུ་ཡིན། ཞེས་གསལ་འདུག
དེ་མཚུངས་ཁོང་མོས་བརྙན་ནང་དུ་ཕྱི་ལོ་ ༢༠༢༤ ཟླ་བ་ ༠༥ ཚེས་ ༢༨ ཉིན་སྒྲ་འཇུག་བྱས་པའི་བརྙན་ཞིག་ནང་ཁོང་མོར་རྡུང་རྡེག་བཏང་བའི་རྐྱེན་གྱིས་ལག་ཏུ་སྨུག་ཐིག་ཐོན་པའང་བསྟན་འདུག
སྤྱིར་རྡོ་རྗེ་བཀྲ་ཤིས་ལགས་བཙོན་འཇུག་བྱས་ནས་ལོ་ངོ་བཅོ་ལྔ་ལྷག་འདས་ཟིན་ཞིང། འདས་པའི་ལོ་ངོ་དེ་དག་གི་རིང་རྡོ་རྗེ་བཀྲ་ཤིས་ལགས་ལ་མནར་གཅོད་དང་ཉེས་རྡུང་ཚད་མེད་བཏང་བར་བརྟེན་ནས་ཁོང་གི་ནང་མི་ཚོས་ཁོང་གི་འཕྲོད་བསྟེན་ལ་སེམས་ཁྲལ་ཆེན་པོ་བྱེད་བཞིན་ཡོད། ཁོང་གིས་གྱོད་གཞི་དེར་བསྐྱར་ཞིབ་དང་ཁྲིམས་ཞིབ་དྲང་བདེན་ཡོང་བའི་རེ་སྐུལ་ཡང་ཡང་ཞུས་ཡོད་ཀྱང་། ཁོང་མུ་མཐུད་བཙོན་ཁང་ནང་དུ་ལུས་ཡོད་པ་རེད། བཙོན་ཁང་དུ་ཁོང་གི་ནང་མི་རྣམས་ཁོང་ལ་ཐུག་འཕྲད་བྱེད་དུ་མི་འཇུག་པ་དང་། མཐོ་རིམ་དབང་འཛིན་ལས་ཁུངས་སུ་ཞུ་གཏུགས་བྱས་ཀྱང་འབྲས་བུ་གང་ཡང་ཐོན་མེད། རྡོ་རྗེ་བཀྲ་ཤིས་ལགས་ཀྱིས་བཙན་བྱོལ་བོད་མི་ཚོར་ཞལ་འདེབས་དང་བོད་ནང་གི་ངོ་རྒོལ་པ་ཚོར་རོགས་སྐྱོར་བྱེད་ཀྱི་ཡོད་པའི་དོགས་གཞིའི་འོག་ཁོང་ཐོག་མར་ཕྱི་ལོ ༢༠༠༨ ལོའི་ཟླ་བ ༧ པའི་ཚེས ༡༠ ཉིན་འཛིན་བཟུང་བྱས་ཤིང་། ཕྱི་ལོ ༢༠༡༠ ལོའི་ཟླ་བ ༥ པའི་ཚེས ༡༧ ཉིན་ཚེ་བཙོན་གྱི་ཁྲིམས་ཐག་བཅད་ཡོད་པ་རེད།།
