༄༅། །ཕྱི་ལོ་ ༡༩༩༥ ལོའི་ཟླ་ ༥ ཚེས་ ༡༧ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་རྒྱ་ནག་གི་མི་མང་སྤྱི་མཐུན་རྒྱལ་ཁབ་ཀྱིས་བཙན་ཁྲིད་བྱས་ཏེ་གར་སོང་ཆ་དུ་གྱུར་ཡོད། དེ་དུས་དགུང་གྲངས་དྲུག་ལ་སོན་པའི་ན་ཆུང་བྱིས་པ་ཁོང་ནི་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་དབུ་ཁྲིད་མཐོ་ཤོས་གྲས་ཤིག་ཏུ་ངོས་འཛིན་ཞུ་གི་ཡོད་ཅིང། ཕྱི་ལོ་ ༡༩༩༥ ལོའི་ཟླ་ ༥ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོངས་གྲགས་སུ་ན་ཆུང་བྱིས་པ་ཁོང་པཎ་ཆེན་སྐུ་ཕྲེང་བཅུ་གཅིག་པར་ངོས་འཛིན་གསལ་བསྒྲགས་གནང་སྟེ། མཚན་ལ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་ཞེས་གསོལ། དེ་ནས་ཉིན་གསུམ་གྱི་རྗེས་ཏེ་ཟླ་བ་ ༥ ཚེས་ ༡༧ ཉིན་པཎ་ཆེན་སྐུ་ཕྲེང་བཅུ་གཅིག་པ་མཆོག་དང་། ཁོང་གི་ཡབ་ཡུམ་གཉིས། གདན་ས་བཀྲ་ཤིས་ལྷུན་པོའི་མཁན་པོ་བྱ་བྲལ་རིན་པོ་ཆེ་གར་སོང་ཆ་མེད་དུ་གྱུར། རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་པཎ་ཆེན་སྐུ་ཕྲེང་བཅུ་གཅིག་པ་ཁས་ལེན་མ་བྱས་པར། རྒྱ་ནག་རང་གི་ཆབ་སྲིད་ཀྱི་དགོས་མཁོར་བསྟུན་ཏེ་ན་ཆུང་བྱིས་པ་གཞན་ཞིག་ཡང་སྲིད་དུ་བསྐོ་བཞག་བྱས། ད་ལོ་པཎ་ཆེན་སྐུ་ཕྲེང་བཅུ་གཅིག་པ་སྐུ་འཁོར་ནང་མི་དང་། བྱ་བྲལ་རིན་པོ་ཆེ་རྒྱ་གཞུང་གིས་འཛིན་བཟུང་བྱས་ཏེ་ལོ་ངོ་ ༢༩ འཁོར་གྱི་ཡོད་ནའང་། དུ་དུང་ཁོང་རྣམས་ཀྱི་གནས་སྟངས་སུས་ཀྱང་ཤེས་ཀྱི་མེད།
འདས་པའི་ལོ་ངོ་འདི་དག་གི་རིང་རྒྱལ་སྤྱིའི་སྤྱི་ཚོགས་དང་། སྲིད་གཞུང་འདྲ་མིན། གཞུང་འབྲེལ་མིན་པའི་ཚོགས་པ། བོད་དོན་རྒྱབ་སྐྱོར་བ། དེ་བཞིན་འཛམ་གླིང་ཡུལ་གྲུ་གང་སར་གནས་པའི་བོད་མི་བཅས་ཀྱིས་ཐབས་ཤེས་འདྲ་མིན་ལ་བརྟེན་ནས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གང་དུ་བཞུགས་ཡོད་མེད་རྩད་གཅོད་བྱེད་ཐབས་བྱས་ཡོད་ལ། ཐ་ན་ཁ་ཤས་ཀྱིས་ཐད་ཀར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྐུ་ཚབ་ཚོགས་པ་དང་། མཉམ་འབྲེལ་རྒྱལ་ཚོགས་ནང་དུའང་པཎ་ཆེན་སྐུ་ཕྲེང་བཅུ་གཅིག་པའི་སྐུ་ཕྱྭའི་གནས་སྟངས་སྐོར་ལ་ཐུགས་འཚབ་བསྟན་ཡོད་ཀྱང་། ཕན་འབྲས་གང་ཡང་ཐོན་མེད།
དུས་ཚིགས་འདི་དང་འབྲེལ་ཏེ་བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས་ཀྱིས། རྒྱ་ནག་གཞུང་གིས་པཎ་ཆེན་སྐུ་ཕྲེང་བཅུ་གཅིག་པ་གར་སོང་ཆ་མེད་བཏང་ནས་ཡུན་རིང་འགོར་བར་ང་ཚོས་སྐྱོན་བརྗོད་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་ལོ་ངོ་ཉི་ཤུ་རྩ་དགུའི་རིང་བཙོན་འཇུག་བྱས་པའི་པཎ་ཆེན་རིན་པོ་ཆེ་འཕྲལ་དུ་གློད་བཀྲོལ་གཏོང་དགོས་པའི་རེ་སྐུལ་ཞུ་བཞིན་ཡོད། ད་ལྟའི་ཆར་རྒྱ་ནག་གཞུང་གིས་བཙན་ཁྲིད་བྱས་པའི་༸པཎ་ཆེན་རིན་པོ་ཆེའི་སྐོར་ལ་གནས་ཚུལ་དང་པར་གཅིག་ཀྱང་མེད་ལ། ཁོང་གི་སྐོར་གནས་ཚུལ་འཛམ་བུ་གླིང་མི་མང་སུས་ཀྱང་ཤེས་ཀྱི་མེད། ང་ཚོས་རྒྱ་ནག་གཞུང་གིས་༸པཎ་ཆེན་རིན་པོ་ཆེ་དང་། ཁོང་གི་ཡབ་ཡུམ་གཉིས། བྱ་བྲལ་རིན་པོ་ཆེ་བཅས་ཀྱི་གནས་སྟངས་སྐོར་ལ་ཁུངས་ལྡན་གྱི་གནས་ཚུལ་གསལ་སྟོན་བྱེད་དགོས་པའི་རེ་སྐུལ་ཞུ་བཞིན་ཡོད། བདེན་པའི་འོད་སྣང་མ་ཤར་བར་དུ་ང་ཚོས་མུ་མཐུད་ནས་ཁོང་རྣམས་གློད་བཀྲོལ་གཏོང་དགོས་པའི་རེ་སྐུལ་ཞུ་རྒྱུ་ཡིན། ཞེས་གསུངས་ཡོད།
ཟླ་བ་སྔོན་མའི་ཕྱི་ཟླ ༤ ཚེས ༢༤ ཉིན་༸པཎ་ཆེན་རིན་པོ་ཆེ་དགུང་གྲངས་སོ་ལྔ་ལ་ཕེབས་པ་དང་། བོད་མིའི་སྒྲིག་འཛུགས་གཙོས་པའི་འཛམ་གླིང་ཡུལ་གྲུ་གང་སར་ཁོང་གི་འཁྲུངས་སྐར་སྲུང་བརྩི་ཞུས་ཡོད། ཇི་སྲིད་རྒྱ་ནག་གཞུང་གིས་༸པཎ་ཆེན་རིན་པོ་ཆེའི་གནས་སྟངས་གསལ་སྟོན་མ་བྱེད་བར་དེ་སྲིད་དུ་བོད་མིའི་སྒྲིག་འཛུགས་ཀྱིས་༸པཎ་ཆེན་རིན་པོ་ཆེ་གྲོལ་བཀྲོལ་ཡོད་བའི་ཞུ་གཏུག་འབོད་སྐུལ་མུ་མཐུད་བྱ་ངེས་ཡིན།།
