༢༠༡༢ ཟླ་ ༡ ཚེས་ ༦ རེས་གཟའ་པ་སངས།
༄༅། །འདི་གར་བདེ་སྲུང་ལས་ཁུངས་ནས་ཕྱི་ལོ་ ༢༠༡༢ ཟླ་ ༡ ཚེས་ ༢ ཉིན་བཏང་གནས་ནང་འཁོད་དོན། བདེ་སྲུང་ལས་ཁུངས་ཀྱི་དྲུང་ཆེ་ཟུར་པ་བློ་བཟང་ཚུལ་ཁྲིམས་ལགས་ནི་ཕྱི་ལོ་ ༡༩༣༩ ལོར་ཁམས་ཆ་ཕྲེང་ཁུལ་དུ་འཁྲུངས་ཤིང་། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་རྗེས་ཨ་རིའི་དབུས་གསང་བའི་ལས་ཁུངས་ཀྱི་སྦྱོང་བརྡར་ཁོངས་ཞུགས་ཏེ་རིམ་པས་སྐད་བསྒྱུར་སོགས་ཀྱི་ཕྱག་ལས་ལྷག་བསམ་རྣམ་དག་ཞུས་ཡོད་པ་དང་། དེ་རྗེས་གློ་སྒྲིག་འཛུགས་ཁོངས་སུའང་ཕྱག་ལས་གནང་ཡོད། ཕྱི་ལོ་ ༡༩༨༣  ལོ་ནས་བཟུང་གཞུང་ཞབས་གནས་རིམ་བདུན་པའི་ཐོག་བལ་ཡུལ་སློབ་གྲྭ་ཁག་གི་ལྟ་རྟོག་འགན་འཛིན་ལས་འཁུར་ཞུས་པ་དང་། ཕྱི་ལོ་ ༡༩༨༥ ལོར་གནས་རིམ་དྲུག་པའི་ཐོག་བདེ་སྲུང་ལས་ཁུངས་ཀྱི་དྲུང་ཆེ་ལས་རོགས་སུ་བསྐོ་བཞག་གནང་སྟེ་ཞབས་ཞུ་མུ་མཐུད་ཞུ་མུས་སྐབས་ཕྱི་ལོ་ ༡༩༨༧ ལོར་བདེ་སྲུང་ལས་ཁུངས་ཀྱི་དྲུང་ཆེར་བསྐོ་བཞག་གནང་བ་དང། ཕྱི་ལོ་ ༡༩༨༩ ལོར་དགུང་ལོའི་བབས་སོགས་ནས་དོ་བདག་གི་ཞུ་དོན་བཞིན་བཀའ་ཤག་ནས་དགོངས་འཁྲོལ་གནང་།
དེ་མཇུག་རང་གཞུང་བཀའ་ཤག་ནས་དབུས་འོས་བསྡུའི་འགན་འཛིན་ལས་རོགས་སུ་བསྐོ་གཞག་གནང་བ་ལྟར་ཕྱག་ལས་གནང་ཡོད་པ་སོགས་སྔ་རྗེས་ལོ་མང་རིང་གཞུང་མང་སྲི་ཞུ་ལྷག་བསམ་རྣམ་དག་གིས་གྲུབ་མཁན་གཞུང་ཞབས་རྒན་གྲས་ཤིག་ཡིན་ཅིང་། ཉེ་དུས་བལ་ཡུལ་ཁུལ་རང་ཁྱིམ་དུ་བཟའ་ཟླ་དང་བུ་ཕྲུག་ལྷན་བཞུགས་མུས་སུ་སྙུན་གཞིས་མནར་ཏེ་ཕྱི་ལོ་ ༢༠༡༡ ཟླ་ ༡༢ ཚེས་ ༢༧ ཉིན་གྱི་དགོང་དྲོར་སྐུ་ཚེ་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་འདི་གའི་ལས་བྱེད་ཐུན་མོང་ནས་ཤུལ་ལུས་བཟའ་ཟླ་བུ་ཕྲུག་ལྷན་ལ་ཐུགས་གསོ་ཞུ་རྒྱུ་མ་ཟད། ཚེ་རབས་ཀུན་ཏུ་ཕྱག་ན་པདྨོས་རྗེས་སུ་འཛིན་པའི་སྨོན་ལམ་འདེབས་རྒྱུ་བཅས།།