༢༠༡༢ ཟླ་ ༡ ཚེས་ ༥ རེས་གཟའ་ཕུར་བུ།
༄༅། །འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡ ཚེས་ ༥ ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་རྡོ་རྗེ་གདན་དུ་ཕྱི་དྲིལ་ལས་ཁུངས་ཀྱིས་གོ་སྒྲིག་གནང་བའི་པར་རིགས་འགྲེམས་སྟོན་ཁག་ལ་གཟིགས་སྐོར་གྲུབ་མཚམས། ཆུ་ཚོད་ ༡༠། ༡༥ ཐོག་བཀའ་ཁྲི་མཆོག་དང་ཕྱི་དྲིལ་བཀའ་བློན་མཆོག་རྣམ་གཉིས་ཀྱིས་དཔལ་དུས་ཀྱི་འཁོར་ལོའི་དབང་ཆེན་གྱི་ཉེ་འཁྲིས་སུ་བུད་མེད་ཚོགས་པའི་སྡོད་གུར་གྱི་ཚོགས་ཁང་ཞིག་ནང་ཕྱི་ནང་གི་གསར་འགོད་པ་ ༥༠ བརྒལ་བ་དང་ཐུག་འཕྲད་གནང་སྟེ་ཐོག་མར་ཕྱི་དྲིལ་བཀའ་བློན་མཆོག་གིས་ངོ་སྤྲོད་གནང་གྲུབ་མཚམས།  བཀའ་ཁྲི་མཆོག་གིས་གསར་འགོད་ལྷན་ཚོགས་ཐོག་ཁོང་ཐེངས་འདིར་གནས་མཆོག་རྡོ་རྗེ་གདན་དུ་ཡོང་དོན་གཙོ་བོ་༧གོང་ས་མཆོག་གི་མདུན་ནས་དུས་དབང་ཞུ་རྒྱུ་དང་། ལས་འགུལ་ཁག་ལ་མཉམ་ཞུགས་བྱེད་དུ་ཡོང་སྐོར་དང་། བོད་ནས་དུས་འཁོར་དབང་ཆེན་ལ་ཕེབས་མཁན་མི་ ༨༠༠༠ དང་། རྒྱ་ནག་སྐམ་ས་ནས་མི་ ༡༢༠༠། ཕྱིའི་རྒྱལ་ཁབ་ཁག་ནས་མི་གྲངས་ ༨༠༠༠ དང་དེ་བཞིན་དགེ་བཙུན་སྔགས་གསུམ་དང། བཙན་བྱོལ་བོད་མི། དེ་བཞིན་དད་ལྡན་རྒྱ་གར་བ་བཅས་ཁྱོན་མི་ ༡༥༠༠༠༠ ལྷག་ཕེབས་ཐུབ་པ་དེ་བཞིན་༸གོང་ས་མཆོག་ལ་དད་པ་དམ་ཚིག་ཡོད་པའི་སྟབས་ཀྱིས་ཡིན་སྐོར་གསུངས་ཏེ། “འདི་ལོར་བོད་ནས་ཆོས་ཞུ་བ་ ༨༠༠༠ ཙམ་ཕེབས་པ་ལོ་སྔོན་མ་དང་བསྡུར་ན་མང་ཤོས་ཆགས་ཡོད་པ་དང་།  གལ་སྲིད་རྒྱ་གཞུང་གིས་ལག་འཁྱེར་སྤྲད་པ་ཡིན་ན་བོད་མི་ས་ཡ་གཅིག་ཡོང་སྲིད་ཀྱི་རེད་ལ། གཅིག་བྱས་ན་ས་ཡ་ ༦ ཆ་ཚང་ཡོང་ཡང་སྲིད་པ་ཞིག་ཡིན་སྐོར་གསུངས།
དེ་བཞིན་བཀའ་ཁྲི་མཆོག་གིས་བོད་རྒྱ་འབྲེལ་མོལ་སྐོར་ངོ་སྤྲོད་དང་ཁོང་གིས་དབུ་ཁྲིད་པའི་བཀའ་ཤག་གིས་ལམ་དབུ་མའི་སྲིད་བྱུས་རྒྱུན་འཁྱོངས་བྱ་རྒྱུ་ཡིན་སྐོར་གསུངས་དོན།  “ང་ཚོས་ད་བར་འབྲེལ་མོལ་ཐེངས་དགུ་བྱས་ཀྱང་དོན་འབྲས་གང་ཡང་བྱུང་མེད། དཀའ་ངལ་ཆེ་ཤོས་དེ་རྒྱ་གཞུང་གིས་འབྲེལ་མོལ་ལ་བརྡ་ལན་སྤྲོད་ཀྱི་མེད་པ་དེ་རེད། གཞི་རྩའི་བོད་རྒྱའི་འབྲེལ་མོལ་༸གོང་ས་མཆོག་གི་མཚན་ཐོག་ནས་གནང་བསྡད་པ་ཞིག་རེད། རྒྱ་གཞུང་ལ་འབྲེལ་མོལ་གྱི་འདོད་པ་ཡོད་ན་ང་ཚོར་དུས་ཚོད་དང་ས་གནས་གང་རུང་དུ་འབྲེལ་མོལ་གནང་རྒྱུར་གྲ་སྒྲིག་ཡོད། རྒྱ་གཞུང་ལ་ཆབ་སྲིད་ཐོག་རང་སྐྱོང་སྤྲོད་རྒྱུའི་འདོད་པ་མེད་པ་མ་རེད། རྒྱ་གཞུང་གིས་ཧོང་ཀོང་དང་ཨོ་མིན་ནམ་མ་ཁའོ་(Macau) གཉིས་ལ་རང་སྐྱོང་སྤྲད་ཡོད་ལ། ཐའེ་ཝན་ལའང་རང་སྐྱོང་སྤྲོད་ལབ་ཀྱི་ཡོད། ཡིན་ནའང་བོད་པར་རང་སྐྱོང་སྤྲོད་ཀྱི་མེད། དེ་ནི་རྒྱ་ནག་གི་རྩ་ཁྲིམས་ཀྱི་དཀའ་ངལ་དེ་འདྲ་མ་རེད། ཧོང་ཀོང་དང་ཨོ་མིན་གཉིས་ལ་རྩ་ཁྲིམས་གཞིར་བཟུང་སྟེ་རང་སྐྱོང་སྤྲད་པ་རེད། ཐའེ་ཝན་ལའང་རྩ་ཁྲིམས་ཐོག་རང་སྐྱོང་སྤྲོད་ཆོག་ལབ་ཀྱི་ཡོད། བོད་པར་རང་སྐྱོང་སྤྲོད་ཀྱི་ཡོད་པ་མ་རེད། བོད་པར་རང་སྐྱོང་མི་སྤྲོད་དོན་ནི་བོད་དེ་རྒྱ་ནག་དང་ལོགས་སུ་ཆགས་ཡོད་པ་སྟོན་གྱི་ཡོད་ཅེས་གསུངས། གསུང་བཤད་གྲུབ་བསྟུན།
གསར་འགོད་པས་བོད་ཀྱི་ཁོར་ཡུག་གནས་སྟངས་ཐད་ཀྱི་དྲི་བར་ལན་འདེབས་གནང་དོན། “ཁོར་ཡུག་གི་གནས་སྟངས་ཐོག་བཤད་ན་བོད་ནི་ཨེ་ཤ་ཡའི་ནང་ཆུ་བོ་མང་ཤོས་ཀྱི་འབྱུང་ཁུངས་ཆགས་ཡོད་ལ། རྨ་ཆུ་དང་འབྲི་ཆུ། ཆུ་བོ་གངྒ་སོགས་བོད་ཀྱི་ཆུ་ཆེན་དེ་དག་རྒྱ་དཀར་ནག་གཙོས་བོད་དང་འདབས་འབྲེལ་བའི་རྒྱལ་ཁབ་ཁག་ཏུ་རྒྱུག་བཞིན་ཡོད་པ་རེད། རྒྱུག་ཆུ་དེ་དག་གིས་མི་ས་ཡ་མང་པོའི་འཚོ་བ་དང་ཐད་ཀར་འབྲེལ་བ་ཆགས་ཡོད། རྒྱ་གཞུང་གིས་བོད་ནང་ཤིང་ནགས་གཅོད་འབྲེག་ཚོད་མེད་བྱས་པའི་ཉེར་ལེན་ལ་བརྟེན་ནས་རྒྱ་གར་ནུབ་བྷང་གྷལ་དུ་ཆུ་ལོག་གི་གནོད་སྐྱོན་ཡང་ཡང་ཡོང་བཞིན་ཡོད།  དེ་བཞིན། དེང་སང་ཁོར་ཡུག་སྦག་བཙོག་གིས་རྐྱེན་པས་རྒྱ་གར་གཙོས་འཛམ་གླིང་ས་ཆ་གང་སར་འཐུང་ཆུར་རིན་པ་སྤྲོད་དགོས་པ་ཆགས་ཡོད། ང་ཚོ་བོད་པས་ཆུ་རིན་མེད་དུ་སྤྲད་ཆོག་གི་ཡོད་སྟབས། འཛམ་གླིང་གང་ས་ནས་བོད་ཀྱི་ཁོར་ཡུག་ལ་ངོས་འཛིན་བྱས་ཏེ་རྒྱབ་སྐྱོར་གནང་རོགས་ཞེས་བཀའ་ཁྲི་མཆོག་གིས་འབོད་སྐུལ་ཡང་ཞུས་ཡོད།
དེ་བཞིན་བཙན་བྱོལ་བོད་མིའི་ཆབ་སྲིད་ཀྱི་འཕོ་འགྱུར་སྐོར་གྱི་དྲི་བར་ལན་འདེབས་གནང་དོན། “མི་མང་པོ་ཞིག་གིས་༸གོང་ས་མཆོག་གིས་བོད་མིའི་ཆབ་སྲིད་འགན་དབང་མང་ཚོགས་ལ་རྩིས་སྤྲོད་མཛད་པ་ནི་བོད་མིའི་ཆབ་སྲིད་ཀྱི་ལེའུ་གཅིག་མཇུག་སྒྲིལ་ནས་ལེའུ་གསར་པ་ཞིག་མགོ་བཙུགས་པར་ངོས་འཛིན་བྱེད་བཞིན་་ཡོད། དོན་དངོས་ཐོག་བོད་མིའི་ཆབ་སྲིད་ཀྱི་འགན་དབང་༸གོང་ས་ལྔ་པའི་སྐབས་ཀྱི་འགྲོ་སྟངས་རྒྱུན་མཐུད་པ་ཞིག་རེད་མ་གཏོགས་དེར་འགྱུར་བ་བཏང་བ་མ་རེད། ༸གོང་ས་མཆོག་གིས་བཀའ་ཁྲིའི་དམ་འབུམ་མཛད་སྒོའི་སྐབས་ངོས་ཀྱིས་བོད་ཀྱི་ཆབ་སྲིད་ཀྱི་འགན་དབང་སྲིད་སྐྱོང་སྟག་བྲག་རིན་པོ་ཆེའི་མདུན་ནས་བླངས་པ་ཡིན། དེ་རིང་མང་ཚོགས་ཀྱིས་བདམས་པའི་ཆབ་སྲིད་མགོ་ཁྲིད་ལ་རྩིས་སྤྲད་པ་ཡིན་ཞེས་བཀའ་སྩལ་ཡོད་སྟབས། དབུས་བོད་མིའི་སྒྲིག་འཛུགས་དེ་བཞིན་སྔ་མོའི་གཞུང་གི་རྒྱུན་མཐུད་པ་ཞིག་ཆགས་ཡོད་ཅེས་གསུངས།
མཐར་བཀའ་ཁྲི་མཆོག་ནས་༸གོང་ས་མཆོག་གིས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་གཙོ་བོར་གྱུར་བའི་མཛད་འཕྲིན་ཁག་ལམ་ལྷོང་ལྡན་པ་ཡོང་སླད་བྷི་ཧར་གཞུང་མང་གཉིས་ནས་མཐུན་འགྱུར་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་ཡོད་པ་བཅས།།