༢༠༡༡ ཟླ་ ༡༢ ཚེས་ ༢༨ རེས་གཟའ་ལྷག་པ།
༄༅། །གནས་མཆོག་རྡོ་རྗེ་གདན་ནས་འདི་གའི་ཆེད་གཉེར་གསར་འགོད་པས་ཕྱི་ལོ་ ༢༠༡༡ ཟླ་ ༡༢ ཚེས་ ༢༧ ཉིན་བཏང་གནས་ནང་གསལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་དབང་ཆེན་ཐེངས་ ༣༢  བསྐྱང་ལ་ཉེ་བར་བརྟེན་ས་ཕྱོགས་འདྲ་མིན་ནས་མི་སྣ་མང་དག་ཅིག་གནས་མཆོག་རྡོ་རྗེ་གདན་དུ་འབྱོར་དང་འབྱོར་མུས་བཞིན་པའི་སྐབས་དང་སྟབས་བསྟུན་ཕྱི་ལོ་ ༢༠༡༡ ཟླ་ ༡༢ ཚེས་ ༢༧ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་གོ་སྒྲིག་འོག་རིགས་ལམ་སློབ་གཉེར་ཁང་གི་དགེ་བཤེས་བློ་བཟང་ཟླ་བ་ལགས་ཀྱིས་དད་ལྡན་ཆོས་ཞུ་བ་སྟོང་ཚོ་མང་པོར་གནས་མཆོག་རྡོ་རྗེ་གདན་གྱི་མཆོད་རྟེན་འགྲམ་དུ་ཡོད་པའི་སྐྱེད་ཚལ་ཞིག་ཏུ་དུས་འཁོར་དབང་ཆེན་ངོ་སྤྲོད་དང་ཕན་ཡོན་སྐོར་སྔ་དྲོ་ཆུ་ཚོད་ ༩།༣༠ གནང་འགོ་ཚུགས་འདུག
དེ་ཡང་གོང་ཚེས་ཉིན་དགེ་བཤེས་ལགས་ཀྱིས་ཐོག་མར་དུས་འཁོར་དབང་ཆེན་ངོ་སྤྲོད་གནང་བ་སྦྲགས་དུས་རབས་ཉེར་གཅིག་པའི་ནང་པ་ཞིག་བྱེད་དགོས་སྐོར་ལ་གསུང་བཤད་གནང་དོན། ང་ཚོས་དུས་དབང་ཞུ་སྐབས་རང་ཉིད་ཀྱི་ལུས་ངག་ཡིད་གསུམ་གྱི་སྤྱོད་པ་མི་དགེ་བའི་ལམ་ནས་དགེ་བའི་ལམ་དུ་གང་ཐུབ་ཅི་ཐུབ་ཀྱི་འཇུག་རྒྱུར་འབད་བརྩོན་གནང་དགོས་པ་མ་ཟད། ང་ཚོས་དུས་རབས་ཉེར་གཅིག་གི་ནང་པ་ཞིག་བྱ་རྒྱུ་ཤིན་ཏུ་ནས་གལ་འགངས་ཆེན་པོ་ཡིན། དུས་རབས་གཉེར་གཅིག་པའི་ནང་པ་ཞེས་པ་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྟག་ཏུ་བཀའ་སློབ་སྩལ་དང་སྩོལ་མུས་ལྟར་ང་ཚོ་ཕོ་མོ་རྒན་གཞོན་སུ་འདྲ་ཞིག་ཡིན་རུང་ནང་ཆོས་ལ་སློབ་སྦྱོང་བྱས་ཏེ་ཤེས་ནས་དད་པ་ཐོབ་པ་ཞིག་བྱེད་དགོས་པ་མ་ཟད། ནང་ཆོས་ནས་གསུངས་པའི་བསླབ་བྱ་དེ་དག་རང་རྒྱུད་ལ་འཇགས་པ་བྱས་ཏེ་སེམས་ཅན་གཞན་ལ་གནོད་འཚེའི་ལས་ཏིལ་འབྲུ་ཙམ་ཡང་བྱེད་རྒྱུ་མེད། དེ་བཞིན་ང་ཚོ་མང་དག་ཅིག་ས་ཐག་རིང་པོ་ནས་འདི་གར་ཡོང་རྒྱུ་ལས་སླ་པོ་ཞིག་མིན་སྟབས། ང་ཚོས་འདི་ནས་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་མདུན་ནས་དུས་དབང་ཞུས་རྗེས་ས་གནས་སོ་སོར་ལོག་སྟེ་༸གོང་ས་མཆོག་གིས་བཀའ་སློབ་རྣམས་སྙིང་བཅངས་ཀྱིས་ལག་བསྟར་གནང་རྒྱུ་གལ་ཆེན་པོ་རེད།  དེ་བཞིན་ང་ཚོ་བོད་མི་རིགས་ལ་ཐུན་མོང་མ་ཡིན་པའི་ཡ་རབས་སྤྱོད་བཟང་ཞིག་ཡོད་པ་དེ་དག་ཉམས་པ་སླར་གསོ་དང་མི་ཉམསརྒྱུན་འཛིན་གནང་གལ་ཆེ། ཞེས་སོགས་ཀྱི་ངོ་སྤྲོད་གནང་བ་དང། ཕྱོགས་མཚུངས་ཁོང་གིས་དུས་འཁོར་དབང་ཆེན་གྱི་ཕན་ཡོན་དང་དུས་དབང་ཞུ་སྐབས་གང་ཟག་སྒེར་སོ་སོ་ནས་ཀུན་སྤྱོད་ཇི་ལྟར་འཛིན་དགོས་མིན་ཐད་ལམ་སྟོན་གསུང་བཤད་གནང་སོང།
དུས་དབང་གི་ངོ་སྤྲོད་དང་དེའི་ཕན་ཡོན་སྐོར་གྱི་གསུང་བཤད་དེ་བཞིན་ཕྱེ་ཚེས་ ༢༧ ནས་ ༣༠ བར་ སྔ་དྲོ་ཆུ་ཚོད་ ༩།༣༠ ནས་ ༡༢ བར་དང་ཉིན་རྒྱབ་ཆུ་ཚོད་ ༢། ནས་ ༤ བར་གནང་རྒྱུ་ཡིན་འདུག་པ་བཅས།།