༄༅། །དཔལ་ལྡན་སྲིད་སྐྱོང་དང་ནང་སྲིད་བཀའ་གཅིག་ལྕོགས་སྤེན་པ་ཚེ་རིང་མཆོག་གི་བཀའ་འབྲེལ་དང་བཀའ་ཤག་སྐབས་ ༡༦ པའི་སྲིད་བྱུས་དགོངས་དོན་འོག་གཞིས་ཆགས་ཆེ་ཁག་ནང་བོད་འབྱོར་དང་ཁ་འཐོར་བོད་མི་རྣམས་གཞིས་སྤོ་གནང་རྒྱུའི་ལས་གཞི་དངོས་སུ་ལག་བསྟར་ཆེད་གཞིས་ཆགས་ཁག་ཏུ་འབྲེལ་ཡོད་ལས་བྱེད་ཆེད་ཕེབས་ཀྱིས་གཞིས་ཁང་རྩིས་འབུལ་གནང་མཁན་གྱི་ཐོ་གཞུང་མཁོ་སྒྲུབ་གནང་བཞིན་པ་ལྟར།  ཕྱི་ལོ་ ༢༠༢༤ ཟླ་ ༠༡ ཚེས་ ༡༡ ནས་ཉིན་གྲངས་དགུའི་རིང་ནང་སྲིད་དྲུང་འཕར་བསྟན་འཛིན་ནོར་བུ་ལགས་མན་སྤར་ཕན་བདེ་གླིང་གཞིས་ཆགས་སུ་ཆེད་ཕེབས་གནང་སྟེ། གཞིས་ཆགས་ཀྱི་གྲོང་སྡེ་སོ་སོའི་ཁོངས་ས་ཁང་ཇི་ཡོད་ཀྱི་གནས་སྟངས་རྟོག་ཞིབ་གནང་ཡོད།

དེ་དང་སྟབས་བསྟུན་དྲུང་འཕར་བསྟན་འཛིན་ནོར་བུ་ལགས་ཀྱིས་མན་སྤར་སཾ་བྷོ་ཌ་སློབ་གྲྭའི་སློབ་ཕྲུག་རྣམས་དང་ཐུག་འཕྲད་གནང་ཞིང་། ཕྱི་ཚེས་ ༢༠ ཉིན་མན་སྤར་ནས་ཇར་སུ་གུ་ཌ་ནས་མཁའ་ལམ་བརྒྱུད་ལྡི་ལིར་ཕེབས་ཐོན་གནང་ཡོད་པ་བཅས།།