༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན།  བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐོག་གཏན་འབེབས་བྱས་པའི་གྲོས་ཆོད་ཀྱི་འབྲུ་དོན་ཁག་ས་གནས་སོ་སོས་ལག་བསྟར་གནང་དང་གནང་བཞིན་ཡོད་པ་ལྟར།  ཨ་རིའི་ནུབ་ཕྱོགས་སུ་ཆགས་པའི་ཡུ་ཊ་བོད་རིགས་སྤྱི་མཐུན་ཚོགས་པས་ཉེ་ཆར་བོད་དོན་ཞུ་གཏུགས་ཀྱི་ལས་འགུལ་ནུས་པ་ཐོན་པ་ཞིག་སྤེལ་ཡོད།  དེ་ཡང་ས་གནས་བོད་རིགས་སྤྱི་མཐུན་ཚོགས་པས་སྐུ་ཚབ་དོན་གཅོད་ལས་ཁུངས་སུ་གནས་ཚུལ་ཕུལ་འབྱོར་བྱུང་བར་གཞིགས་ན།  བདུན་ཕྲག་འདིའི་ནང་ཡུ་ཊ་བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་ཚེ་རིང་ལགས་དང་།  བོད་རིགས་སྤྱི་མཐུན་ཚོགས་པའི་བོད་དོན་ཞུ་གཏུགས་ལས་འགུལ་གྱི་འབྲེལ་མཐུད་འགན་ཁུར་བ་སྤྱི་ཟུར་ཕྱག་མཛོད་ཚང་པདྨ་ལགས།  ཚོགས་གཞོན་བསྟན་འཛིན་ཆོས་དར་ལགས།  རྒྱུན་ལས་ཀརྨ་ཡོན་ཏན་ལགས་བཅས་ནས་གྲོས་ཚོགས་འོག་མའི་འཐུས་མི་སྐུ་ཞབས་ (Burgess Owens) ལགས་དང་།  སྐུ་ཞབས་ (Casey Saxton) ལགས།  སྐུ་ཞབས་ (Zack Hodgson) ལགས་བཅས་གནད་ཡོད་དཔོན་རིགས་ཁག་ཅིག་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་གདན་ཞུས་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་ཀྱི་ལམ་ནས་བོད་དོན་སྐོར་ཞུ་སྐུལ་དང་།  ལྷག་པར་དུ་ལོ་རྒྱུས་ཀྱི་དོན་སྙིང་ལྡན་པའི་བོད་དོན་ཁྲིམས་འཆར་ (ཁྲིམས་འཆར་ཨང་ H. R. 533 Promoting a Resolution to the Tibet-China Conflict Act) ལ་རྒྱབ་སྐྱོར་ཡོང་བའི་ཞུ་སྐུལ་ནན་པོ་གནང་བར་ཧ་ཅང་གི་ཐུགས་སྣང་ཆེན་པོ་གནང་བ་མ་ཟད།  རྒྱབ་སྐྱོར་ཞུ་རྒྱུའི་ཞལ་བཞེས་ཀྱང་གནང་ཡོད་པ་རེད་འདུག  བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་ཚེ་རིང་ལགས་ནས་འགྲེལ་བརྗོད་གནང་དོན་ལ།  གྲོས་ཚོགས་འོག་མའི་འཐུས་མི་སྐུ་ཞབས་ (Burgess Owens) ལགས་དང་། ཁོང་གི་ཕྱག་རོགས་ཚོས་ས་གནས་བོད་རིགས་ཚོའི་ཞུ་དོན་ལ་ཐུགས་སྣང་ཆེན་པོ་དང་རྒྱབ་སྐྱོར་གནང་རྒྱུའི་ཞལ་བཞེས་གནང་བ་ལྟར།  ཉིན་གཉིས་རྗེས་སྐུ་ཞབས་ (Burgess Owens) ལགས་ཀྱི་ལས་ཁུངས་ནས་ཕྱག་མཛོད་ཚང་པདྨ་ལགས་སུ་ཞལ་པར་འབྱོར་ཏེ།  བོད་དོན་ཁྲིམས་འཆར་ལ་རྒྱབ་སྐྱོར་གྱི་མཚན་རྟགས་བཀོད་ཟིན་པའི་འགྲེལ་བརྗོད་གནང་ཡོད་པ་རེད་འདུག  

སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ཀྱིས་ཡུ་ཊ་ས་གནས་ཀྱིས་བོད་དོན་ཞུ་སྐུལ་ནུས་པ་ལྡན་པ་བྱུང་བར་བསྔགས་བརྗོད་དང་།  ས་གནས་གཞན་ཁག་གིས་ཀྱང་བོད་དོན་ཞུ་གཏུགས་ལས་འགུལ་ཐོག་སྔར་ལས་ཤུགས་སྣོན་ཐེབས་ཐུབ་པའི་རེ་བ་དང་ཡིས་ཆེས་གནང་གི་ཡོད་ཅེས་གསུང་གི་འདུག  །