གསར་འགོད་གསལ་བསྒྲགས།

གསར་ལས་ཁང་གི་གསར་འགོད་པས།

༢༠༡༡-༡༢-༢༠

༢༠༡༡ ཟླ ༡༢ ཚེས་ ༢༠ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༢༠ ཉིན་ཕྱེད་ཡོལ་ཆུ་ཚོད་ ༢།༣༠ ཐོག་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་བཀའ་བློན་ལས་ཁུངས་སུ་བོད་རིགས་གསར་འགོད་པ་ ༡༥ བརྒལ་བ་རྣམས་ལ་ཉེ་ཆར་ཟི་ཁྲོན་ཞིང་ཆེན་གྱི་རྒྱལ་ས་ཁྲིན་ཏུའི་ནང་རྟེན་གཞི་བྱས་པའི་ལྕགས་ལམ་བཟོ་སྐྲུན་ཆེད་ལས་འབྲིང་རིམ་སློབ་གྲྭའི་ནང་། བོད་རིགས་སློབ་མ་དང་རྒྱ་རིགས་སློབ་མའི་བར་འཁྲུག་འཛིང་ཤོར་བའི་གནས་ཚུལ་ཐོན་པར་བོད་མིའི་སྒྲིག་འཛུགས་ལ་ཧ་ཅང་གི་སེམས་འཚབ་དང་བློ་ཕམ་ཆེན་པོ་བྱུང་བའི་གསར་འགོད་གསལ་བསྒྲགས་ཤིག་སྤེལ་ཡོད།
ཕྱི་ལོ་ ༢༠༡༡ ཟླ་ ༡༢ ཚེས་ ༡༤ རེས་གཟའ་ལྷག་པའི་དགོང་མོ་ཟི་ཁྲོན་ཞིང་ཆེན་གྱི་རྒྱལ་ས་ཁྲིན་ཏུའི་ནང་རྟེན་གཞི་བྱས་པའི་ལྕགས་ལམ་བཟོ་སྐྲུན་ཆེད་ལས་འབྲིང་རིམ་སློབ་གྲྭའི་ནང་། བོད་རིགས་སློབ་མ་དང་རྒྱ་རིགས་སློབ་མའི་བར་འཁྲུག་འཛིང་ཤོར་བའི་གནས་ཚུལ་ལྷག་པར་བཙན་བྱོལ་བོད་མིའི་སྒྲིག་འཛུགས་ལ་ཧ་ཅང་གི་སེམས་འཚབ་དང་བློ་ཕམ་ཆེན་པོ་བྱུང། སྐབས་དེར་རྒྱ་རིགས་སློབ་མ་གྲངས་ ༣༠༠༠ ཙམ་གྱིས་བོད་རིགས་སློབ་མ་བརྒྱ་ཕྲག་འགའ་ཤས་ལ་རྒོལ་འཛིང་བྱས་རྐྱེན་བོད་རིགས་སློབ་མ་འགའ་ཤས་ལ་རྨས་སྐྱོན་ཚབས་ཆེ་ཕོག་སྟེ་སྨན་ཁང་དུ་ལུས་པའི་གནས་ཚུལ་ཐོན་འདུག ཐེངས་འདིའི་ཁྲིན་ཏུའི་ས་ཁུལ་ནང་བོད་རྒྱ་མི་རིགས་གཉིས་ཀྱི་སློབ་མའི་དབར་འཁོན་རྩོད་ཀྱི་དཀའ་ངལ་བྱུང་བ་དེ་ཐོག་མ་ཆགས་མེད། ཨེ་ཤི་ཡ་རང་དབང་རླུང་འཕྲིན་ཁང་གི་རྒྱ་སྐད་ཚན་པས་གནས་ཚུལ་སྤེལ་བར་གཞིགས་ན་གནས་ཚུལ་དེ་མཚུངས་ཞིག་ཕྱི་ལོ་ ༢༠༡༠ ནང་ཐེངས་གཉིས་ཙམ་བཟོ་སྐྲུན་མཐོ་སློབ་གཞན་ཞིག་གི་ནང་དུའང་བྱུང་ཡོད། ཟི་ཁྲོན་ཞིང་ཆེན་གྱི་ཙི་ཀུང་གྲོང་ཁྱེར་དུ་རྟེན་གཞི་བྱས་པའི་གློག་ལས་བཟོ་སྐྲུན་གྱི་སློབ་གྲྭ་ཞིག་གི་ནང་འཁྲུག་འཛིང་འོག་བོད་པའི་སློབ་མ་པ་སངས་ཞེས་པ་ཞིག་ལ་རྒྱ་མིས་གྲི་བརྒྱབ་རྐྱེན་འདས་གྲོངས་སུ་གྱུར་ཡོད། རྙོག་གྲ་སློང་མཁན་འཛིན་བཟུང་དང་ཁྲིམས་བཅད་བཏང་ཡོད་མེད་ཀྱི་གནས་ཚུལ་ད་བར་ཤེས་རྟོགས་གང་ཡང་བྱུང་མེད། ང་ཚོས་བོད་པའི་སློབ་མ་ཚོར། སློབ་སྦྱོང་ལ་དོ་སྣང་མུ་མཐུད་གནང་ཐོག་སློབ་མ་གཞན་ཚོ་དང་ལྷན་འཆམ་མཐུན་གྱི་འབྲེལ་ལམ་རྒྱུན་སྲིང་ཐོག་བོད་པའི་སྲོལ་རྒྱུན་དང་འབྲེལ་བའི་ཡ་རབས་བཟང་སྤྱོད་དེར་དམ་འཛིན་གནང་རོགས་ཞེས་འབོད་སྐུལ་ཞུ་རྒྱུ་དང། ང་ཚོ་བོད་པ་ཚོས་ཤེས་ཡོན་གྱི་ནམ་འཕང་གཅད་དེ་རང་ཉིད་བོད་པ་ཡིན་བསམ་པའི་སྤོབས་པ་བྱེད་རྒྱུ་ལས་དཔའ་ངར་ངོམས་རྒྱུ་མེད། ང་ཚོས་རྒྱ་ནག་གི་གྲོང་ཁྱེར་ ༡༢ ཙམ་གྱི་ནང་དུ་སློབ་སྦྱོང་བྱེད་བཞིན་ཡོད་པའི་བོད་རིགས་སློབ་མ་ཚོའི་བདེ་འཇགས་ལ་འགན་ཁུར་གནང་རོགས་ཞེས་རྒྱ་ནག་གཞུང་ལ་ཛ་དྲག་གི་འབོད་སྐུལ་ཞུ་རྒྱུ་ཡིན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་འཆམ་མཐུན་གྱི་སྤྱི་ཚོགས་ཤིག་བསྐྲུན་རྒྱུའི་ཁས་ལེན་བྱས་པ་ལྟར། བོད་རྒྱ་མི་རིགས་ཕན་ཚུན་འཁོན་རྩོད་མེད་པ་བཟོ་ཆེད་རྒྱ་ནག་གཞུང་གིས་ཐབས་ཤེས་གང་ཡོད་འདོན་རྒྱུར་ང་ཚོས་རེ་བ་བྱེད་བཞིན་ཡོད། བོད་མིའི་སྒྲིག་འཛུགས་བཀའ་ཤག་གིས་བོད་མིའི་འཐབ་རྩོད་དེ་རྒྱ་ནག་དང་རྒྱ་མི་རིགས་ལ་ངོ་རྒོལ་བྱ་རྒྱུ་ཞིག་མིན་པར། ཞི་བའི་ལམ་ནས་བོད་ནང་རང་དབང་བསྐྱར་གསོ་ཡོང་ཆེད་ཡིན་པ་འདིར་ནན་བརྗོད་ཞུ་རྒྱུ་ཡིན།།
བཀའ་ཤག་ནས་ཕྱི་ལོ་ ༢༠༡༡ ཟླ་ ༡༢ ཚེས་ ༢༠ ལ།།