༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༢༤ ཉིན་བེལ་ཇ་ཡམ་བོད་རིགས་ཚོགས་པའི་སློབ་གྲྭ་ཤེས་རབ་སྣང་བྱེད་ཀྱིས་དཔལ་འབྱོར་འདུ་འགོད་ཀྱི་རིག་གཞུང་འཁྲབ་སྟོན་གོ་སྒྲིག་ཞུས་ཡོད།
རིག་གཞུང་འཁྲབ་སྟོན་གྱི་སྐུ་མགྲོན་གཙོ་བོར་བེལ་ཇ་ཡམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་དང་། བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཕེབས་ཞུགས་ཀྱིས་སྐབས་དེར་འཕྲིན་ལས་དབང་འདུས་ལགས་ཀྱིས་བཙན་བྱོལ་ནང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་ཆོས་དང་རིག་གཞུང་རྒྱུན་འཛིན་ཆེད་བོད་སློབ་ཟུར་འཛུགས་གནང་བའི་དམིགས་ཡུལ་ངོ་སྤྲོད་དང་། བེལ་ཇ་ཡམ་བོད་མིའི་གཟའ་མཇུག་སློབ་གྲྭའི་དགེ་ལས་དང་། ཕ་མ་རྣམས་ནས་བོད་ཀྱི་ཆོས་རིག་རྒྱུན་འཛིན་ཆེད་ཞབས་འདེགས་སྒྲུབ་པར་བསྔགས་བརྗོད་གནང་ཡོད།
དེ་བཞིན་ཁོང་གིས་ཕྱི་རྒྱལ་དུ་བོད་ཀྱི་ཆོས་རིག་རྒྱུན་འཛིན་ཆེད་གཟའ་མཇུག་སློབ་གྲྭ་ཁག་རྒྱུན་གནས་ཐུབ་རྒྱུ་གལ་གནད་ཆེན་ཡིན་པས་གཞོན་སྐྱེས་རྣམས་ནས་བོད་ཀྱི་ཆོས་དང་རིག་གཞུང་ལ་དོ་སྣང་དང་སློབ་གཉེར་གནང་དགོས་པའི་འབོད་སྐུལ་ཞུས། དེ་ལས་འཕྲོས་ཏེ་ཁོང་གིས་ཉེ་ལམ་ཡུ་རོབ་མཐུན་ཚོགས་ནང་བོད་ནང་གི་ཛ་དྲག་གནས་སྟངས་དང་འབྲེལ་བའི་གྲོས་ཆོད་བཞག་ཐུབ་ཡོད་སྐོར་འགྲེལ་བརྗོད་གནང་ཡོད་པ་རེད།
ཤེས་རབ་སྣང་བྱེད་སློབ་གྲྭའི་ངེས་སྟོན་པ་བསོད་ནམས་ཚེ་རིང་ལགས་ཀྱིས་གཟའ་མཇུག་སློབ་གྲྭའི་དཔལ་འབྱོར་རྒྱབ་རྟེན་དང་དཔལ་འབྱོར་འདུ་འགོད་ལས་གཞི་སྤེལ་དགོས་པའི་དམིགས་ཡུལ་གསལ་སྟོན་དང་། ཚོགས་བཅར་བ་རྣམས་ནས་ལས་དོན་དེའི་ཆེད་ཞལ་འདེབས་གནང་བར་ཐུགས་རྗེ་ཆེ་ཞུས་རྗེས་བེལ་ཇ་ཡམ་བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་བོད་རིགས་ཚོགས་པའི་ངོས་ནས་ཤེས་རབ་སྣང་བྱེད་སློབ་གྲྭ་དང་། འཇམ་དབྱངས་བློ་འཕེལ་སློབ་གྲྭར་རྒྱབ་སྐྱོར་མུ་མཐུད་གནང་རྒྱུ་ཡིན་པ་དང་། དེ་ལྟར་མང་ཚོགས་ནས་ཀྱང་བོད་རིགས་ཚོགས་པའི་སྤྱི་ཁང་གསར་བཞེངས་ཐད་དཔལ་འབྱོར་གྱི་རྒྱབ་སྐྱོར་ཡོང་བའི་རེ་སྐུལ་ཞུས་ཡོད།
བོད་རིགས་ཚོགས་པའི་དྲུང་ཡིག་འབའ་བ་རྡོ་རྗེ་ལགས་ཀྱིས་བོད་མི་རྣམས་ནས་བོད་ཀྱི་ཆོས་དང་རིག་གཞུང་རྒྱུན་འཛིན་དང་། བོད་ཀྱི་རང་དབང་འཐབ་རྩོད་ཆེད་མཐུན་ལམ་རྡོག་རྩ་ཆིག་སྒྲིལ་གནང་དགོས་པའི་འབོད་སྐུལ་གནང་ཡོད། མཛད་སྒོའི་སྔ་དྲོ་དཔལ་འབྱོར་འདུ་འགོད་ཆེད་རྩེད་མོ་གོ་སྒྲིག་དང་བོད་ཟས་ཚོང་སྒྱུར་དང་། ཕྱི་དྲོ་གཟའ་མཇུག་སློབ་གྲྭའི་རྒན་ནོར་བུ་ཚེ་རིང་ལགས་ཀྱི་སྣེ་ཁྲིད་འོག་སློབ་ཕྲུག་རྣམས་ནས་གཞས་སྣ་འཁྲབ་སྟོན་གནང་ཡོད་པ་བཅས།།
