༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༩ ཉིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོསྟྲེ་ལི་ཡཱར་གནས་འཁོད་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ཚབ་གསར་པ་ལྕམ་སྐུ་ཇ་ན་ཀྲ་རར་ལགས་སུ་འཚམས་འདྲིའི་མཇལ་བཅར་ཞུས་ཡོད།
མཇལ་འཕྲད་སྐབས་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོ་མཆོག་ལ་འཚམས་འདྲི་དང་སྦྲགས། ཅེཀ་སྤྱི་མཐུན་རྒྱལ་ཁབ་ངོས་ནས་བོད་དོན་འཐབ་རྩོད་ཐོག་རྒྱབ་སྐྱོར་ཚད་མཐོ་གནང་བར་ཐུགས་རྗེ་ལེགས་འབུལ་ཞུས་པའི་ཁར། ད་ལྟའི་ཆར་རྒྱ་ནག་གཞུང་གི་དྲག་རྩུབ་ཆེ་བའི་སྲིད་བྱུས་འོག་བོད་ཀྱི་ཆོས་དང་རིག་གཞུང་ངོ་བོ་བཅས་པ་རྩ་མེད་འགྲོ་ཉེན་ཆེ་བའི་བོད་ནང་གི་ཛ་དྲག་གནས་སྟངས་སྐོར་གསལ་བཤད་གནང་ཡོད།
གཞུང་ཚབ་ཆེན་མོ་ཇན་ཀྲ་རར་མཆོག་གིས་སྐུ་ཚབ་དོན་གཅོད་ཀྱི་ཞུས་དོན་ཁག་ལ་གསན་བཞེས་གནང་སྟེ། ཁོང་མོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་རྒྱབ་སྐྱོར་གཡོ་མེད་གནང་རྒྱུའི་ཞལ་བཞེས་བཟང་པོ་གནང་བ་མ་ཟད། ཨོསྟྲེ་ལི་ཡཱར་ཡོད་པའི་བོད་མི་རྣམས་དང་ཐུག་རྒྱུའི་ཐུགས་འདོད་ཆེན་པོ་ཡོད་པ་གསུངས་ཡོད་པ་བཅས།།
