༄༅། །འདི་གའི་ཆེད་གཉེར་གསར་འགོད་པ་བློ་བཟང་སྒྲོལ་དཀར་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་པ་ཤཱཀྱ་ཐུབ་པ་མངོན་པ་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་མོར་གནས་གཟིགས་སུ་ཆིབས་བསྒྱུར་བསྐྱངས་ཡོད།དེ་ཡང་གོང་ཚེས་ཉིན་གི་སྔ་དྲོ་ཆུ་ཚོད་ ༨ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགའ་ལྡན་འཕེལ་རྒྱས་གླིང་གི་ཕོ་བྲང་ནས་སྐུ་འཁོར་དང་བཅས་མཆོད་རྟེན་ཆེན་མོར་ཆིབས་བསྒྱུར་སྐབས་མཆོད་རྟེན་འཛིན་སྐྱོང་གི་འབྲེལ་ཡོད་སོགས་གནད་ཡོད་མི་སྣ་དང་། དེ་བཞིན་དད་ལྡན་སེར་སྐྱ་མི་མང་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད།དེ་རྗེས་མགོན་པོ་གང་ཉིད་མཆོག་སྟོན་པའི་སྐུ་བརྙན་ལ་མཆོད་མཇལ་དང་ཐུགས་སྨོན་མཛད་མཚམས་བཀའ་སློབ་སྩལ་དོན། དེ་རིང་ངོས་རང་གནས་མཆོག་རྡོ་རྗེ་གདན་གྱི་སྟོན་པ་ཤཱཀྱ་ཐུབ་པའི་སྐུ་ལ་གསོལ་བ་སྨོན་ལམ་འདེབས་རྒྱུ་བྱུང་བ་ཧ་ཅང་དགའ་པོ་བྱུང་། ང་ཚོའི་འཛམ་གླིང་གི་གནས་སྟངས་དང་དམིགས་བསལ་གནམ་གཤིས་འགྱུར་ལྡོག་གི་གནས་སྟངས་རྣམས་ཇེ་སྡུག་ཏུ་འགྲོ་བཞིན་ཡོད། ཡིན་ནའང་ང་ཚོ་ཚང་མ་འདིར་འཛོམས་ཡོད་པ་དེ་ནི་བསོད་ནམས་ཆེན་པོ་རེད། གནས་ཆེན་འདིར་གསོལ་བ་སྨོན་ལམ་བཏབ་པ་ཡིན་ན་སྡུག་བསྔལ་ཐམས་ཅད་ལས་གྲོལ་ཐུབ་ངེས་ཡིན་པས་ངོས་ནས་ཀྱང་དེ་བཞིན་སྟོན་པ་ཤཱཀྱ་ཐུབ་པར་སྨོན་ལམ་འདེབས་ཀྱི་ཡོད། ཅེས་གསུངས་རྗེས་དགའ་ལྡན་འཕེལ་རྒྱས་གླིང་དུ་ཆིབས་བསྒྱུར་བསྐྱངས་ཡོད་པ་བཅས།།