༄༅། །འདི་གར་ལྡི་ལི་བསམ་ཡས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ལྡི་ལི་བསམ་ཡས་གླིང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་འབུལ་བཞེས་མཛད་དེ་ལོ་ངོ་ ༣༤ འཁོར་བའི་དུས་ཆེན་སྲུང་རྩི་གཟབ་རྒྱས་ཞུས་ཡོད།
དེ་ཡང་ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་གྱི་སྔ་དྲོ་ཚུ་ཚོད་ ༩།༠༠ ཐོག་འདི་གར་གནས་འཁོད་མང་ཚོགས་ཡོངས་ནས་བོད་བསྟན་སྲིད་ཀྱི་དཀར་ཕྱོགས་སྐྱོང་བའི་བོད་སྐྱོང་ལྷ་སྲུང་འཕྲིན་སྐུལ་དང་འབྲེལ་བསངས་གསོལ་གཟབ་རྒྱས་འབུལ།
མཛད་སྒོ་དངོས་གཞིའི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་སྤོས་སྣེ་གདན་ཞུས་ཀྱི་བཞུགས་ཁྲིར་འཁོད་མཚམས་སྐུ་མགྲོན་གཙོ་བོ་རྒྱ་གར་གྲངས་ཉུང་མི་རིགས་ལྷན་ཁང་གི་འཐུས་མི་ལྕམ་སྐུ་རིན་ཆེན་ལྷ་མོ་ལགས་དང་། དམིགས་བསལ་སྐུ་མགྲོན་དུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་ཚོགས་གཙོ་རིན་ཆེན་མཁའ་འགྲོ་ཁིར་མེ་ལགས། ས་གནས་འགོ་འཛིན། བརྒྱ་དཔོན། གཞུང་དང་གཞུང་ཁོངས་མིན་པའི་སྒྲིག་འཛུགས་ཁག་གི་འགན་འཛིན། མང་ཚོགས་བཅས་ནས་མཇལ་དར་སྒྲོན་འབུལ་གནང་གྲུབ་བསྟུན་སློབ་ཕྲུག་རྣམས་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་དང་། ནོ་སྦེལ་བསྟོད་དབྱངས་བཅས་རིམ་གྱི་འབུལ།
དེ་ནས་བོད་བསྟན་སྲིད་མི་རིགས་དང་བཅས་པའི་དོན་དུ་ད་བར་རང་སྲོག་བློས་གཏོང་མཁན་རྒྱལ་གཅེས་པ་རྣམས་དང་། དེང་གི་ཆར་དངོས་སུ་རྒྱའི་བཙོན་ཁང་ཁག་ནང་སྡུག་སྦྱོང་མྱངས་དང་མྱོང་བཞིན་པ་རྣམས་ཀྱི་ཆེད་ངག་བཅད་མྱ་ངན་གུས་འདུད་ཞུས། དེ་ནས་ལྡི་ལི་སྐུ་ཚབ་དོན་གཅོད་ཀྱི་སྐུ་ཚབ་ཟུང་དྲུང་བསྟན་འཛིན་བཟང་མོ་ལགས་ཀྱིས་བཀའ་ཤག་གི་གསུང་འཕྲིན་སྒྲོགས་སྦྱང་གནང་། ཕྱོགས་མཚུངས་ས་གནས་རང་བདེན་ཚོགས་ཆུང་གི་ཚོགས་གཙོ་ཐུབ་བསྟན་རྒྱལ་མཚན་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་། དེ་བཞིན་མགྲོན་གྱི་གཙོ་བོ་རྒྱ་གར་གྲངས་ཉུང་མི་རིགས་ལྷན་ཁང་གི་འཐུས་མི་ལྕམ་སྐུ་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་མི་རིགས་སྤྱི་དང་། ལྷག་པར་དེང་གི་ཆར་འཁྲུག་རྩོད་ཀྱི་བརླམ་བཞིན་པའི་འཛམ་གླིང་འདིར་མགོན་པོ་གང་ཉིད་ཀྱི་བཀའ་སློབ་ལམ་སྟོན་རྣམས་གལ་གང་ཇི་ཙམ་ཡིན་མིན་དང་། ལྕམ་སྐུ་ཉིད་མཆོག་ནས་བོད་མི་རྣམས་ལ་དཀའ་ངལ་ཇི་འདྲ་འཕྲད་ཀྱང་མཐུན་འགྱུར་རོགས་རམ་གནང་རྒྱུ་ཡིན་པ་སོགས་ཀྱི་གསུང་བཤད་གནང་།
དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མས་ཚོགས་གཙོ་རིན་ཆེན་མཁའ་འགྲོ་ཁིར་མེ་ལགས་ནས་ཁོང་ཉིད་མཛད་སྒོར་མགྲོན་འབོད་གནང་བར་ཐུགས་རྗེ་ཆེ་ཞུ་བ་དང་སྦྲགས་ཁོང་ཉིད་བོད་དོན་ལས་འགུལ་ནང་མཉམ་ཞུགས་ཕྱི་ལོ་ ༡༩༧༧ ནས་དབུ་བཙུགས་ནས་ད་བར་བོད་དོན་རྒྱབ་སྐྱོར་ཆེད་ལས་འགུལ་སྣེ་མང་སྤེལ་ཡོད་པ་དང། ཨ་རུ་ན་ཅལ་མངའ་སྡེའི་ངོས་ནས་དུས་ནམ་ཡང་རྒྱ་ནག་དང་རྒྱ་གར་གྱི་ས་མཚམས་ཞེས་པའི་ཐ་སྙད་བེད་སྤྱད་ཀྱི་མེད་པ་མ་ཟད། ཡུལ་དེ་གཉིས་དབར་ས་མཚམས་ཞིག་ཡོད་པ་ངོས་ལེན་གཏན་ནས་གནང་ཀྱི་མེད་སྐོར་སོགས་གསུང་བཤད་གནང་། གཞན་ཡང་མཛད་སྒོའི་ཐོག་བོད་དོན་རྒྱབ་སྐྱོར་བ་སྐུ་ཞབས་སན་དེཤ་མི་ཤ་རཱམ་ (Sandesh Meshram) ལགས་ཕྱི་ཟླ་ ༡༡ ཚེས ༥ ཉིན་རྒྱ་གར་གྱི་མངས་སྡེའི་ནུབ་བྷང་གྷལ་གྱི་རྒྱལ་ས་ཀལ་ཀ་ཏ་ནས་དབུས་འཛུགས་ཞུས་པའི་རྐང་འཁོར་ཐོག་བོད་དོན་ལས་འགུལ་མཇུག་བསྡུ་ཡོད་པར་དེར་འདུས་མང་ཚོགས་ནས་ཁོང་ལ་སྣེ་ལེན་ཕེབས་བསུ་ཞུས་ཡོད།
དེ་མཚུངས་ལྡི་ལི་སྨན་རྩིས་ཁང་གི་ཕྱིར་ཚོང་ཁང་གི་འགན་འཛིན་དབུ་རྒྱན་ཚེ་དབང་ལགས་ཞབས་ལོ་ཧྲིལ་པོ་ཉེར་ལྔ་སོན་པར་དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་གཟེངས་བསྟོད་ཕྱག་འཁྱེར་དང་ཕྱག་རྟགས་གསོལ་སྩལ་གནང་ལམ་ཡོད་པ་སྐུ་མགྲོན་གཙོ་བོ་མཆོག་ནས་གསོལ་སྩལ་གནང་། དེ་བཞིན་མཛད་སྒོའི་སྐབས་འདི་གའི་མང་ཚོགས་དང་སློབ་ཕྲུག་སོགས་ནས་ཡུལ་ལུང་འདྲ་མིན་གྱི་རྐང་བྲོ་གླུ་གཞས་ཡང་གཟིགས་འབུལ་ཞུས་ཡོད་པ་དང་། འདི་གའི་བརྒྱ་འཐུས་ལས་ཁུངས་ནས་མཛད་སྒོ་སྐབས་མང་ཚོགས་ལ་གསོལ་ཇ་འབྲས་བསིལ། ཉིན་གུང་གསོལ་ཚིགས། དེ་བཞིན་མཛད་སྒོའི་སྐབས་ཞབས་སྟེགས་དང་དབུ་གུར་སོགས་ཀྱི་འགྲོ་གྲོན་མཐུན་འགྱུར་གནང་། ཕྱོགས་མཚུངས་འདི་གའི་ས་གནས་ཀྱི་ཚོགས་སྐྱིད་ཁག་ནས་མཛད་སྒོའི་སྡིངས་ཆ་སོགས་སྒྲིག་བཤམས་ཆེད་སྔར་རྒྱུན་བཞིན་མཐུན་འགྱུར་གནང་ཡོད། གཞུང་འབྲེལ་མཛད་སྒོ་གྲུབ་མཚམས་ཉིན་གུང་མི་མང་རྣམས་ནས་སྒོར་གཞས་འཁྲོབ་སྟོན་གནང་སྟེ་དེ་ཉིན་གྱི་མཛད་སྒོ་དགྱེས་ཁའི་ངང་ལེགས་གྲུབ་བྱུང་། །
