ཕྱི་ལོ་ ༢༠༠༨ ཟླ་ ༧ ཚེས་ ༢༦ རེས་གཟའ་སྤེན་པ།
༄༅། །ཨ་རིའི་གཞུང་འཛིན་སྤྱི་མཐུན་ཚོགས་པའི་ཚོགས་མི་གྲོས་ཚོགས་གོང་མའི་འཐུས་མི་སྐུ་ཞབས་ཇོན་མེཀ་ཁན་(John McCain)མཆོག་གིས་ཕྱི་ལོ་ ༢༠༠༨ ཟླ་ ༧ ཚེས་ ༢༥ རེས་གཟའ་པ་སངས་ཉིན་ཨ་རིའི་དབུས་ཕྱོགས་མངའ་སྡེ་ཁོ་ལོ་ར་ཌོའི་(Colorado)གྲོང་ཁྱེར་ཨསེ་པིན་(Aspen)ནང་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐུ་ཞབས་ཇོན་མིཀ་ཁན་རྣམ་གཉིས་མཇལ་འཕྲད་གནང་བཞིན་པ།
དེ་ཡང་ཕྱི་ཚེས་ ༢༤ རེས་གཟའ་ཕུར་བུ་ཉིན་སྐུ་ཞབས་ཇོན་མེཀ་ཁན་ཨོ་ཧཱཡོ་(Ohio)མངའ་སྡེའི་ནང་རང་ཉིད་ལ་འོས་བསྡུའི་ལས་དོན་ལ་རྒྱབ་སྐྱོར་ཐོབ་ཐབས་ཀྱི་ལས་འགུལ་སྤེལ་བཞིན་པའི་སྐབས་ཁོང་གིས་གསར་འགོད་པ་ཚོར་གསུང་དོན། བོད་མིའི་༸སྐྱབས་མགོན་ཏཱ་ལའི་བླ་མ་མཆོག་གིས་རྒྱལ་སྤྱིའི་ནང་ཆོས་ལུགས་དང་མི་རིགས་སོགས་རྒྱལ་མཚམས་མེད་པ་ལྟ་བུ་གནང་སྟབས་ཀུན་གྱིས་མིག་དཔེ་བལྟ་ས་དང་གུས་བཀུར་ཞུ་སའི་དཔའ་བོ་ལྟ་བུའི་གང་ཟག་ཅིག་རེད། ཁོང་ནི་བོད་མི་གཙོ་བོར་འགྱུར་བའི་འཛམ་གླིང་གི་མི་མང་སྡུག་སྦྱོང་མྱོང་བཞིན་པ་ཚང་མའི་ཆེད་དུ་སྐུ་ངལ་བསྐྱོན་མཁན་ཞིག་ཡིན་པར་ངོས་རང་ཡིད་སྨོན་ཧ་ཅང་ཆེན་པོ་སྐྱེས་པ་དང་། གུས་བཀུར་ཞུ་ཡུལ་ཞིག་ཡིན། ཞེས་གསུངས་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་དང་སྐུ་ཞབས་ཇོན་མེཀ་ཁན་རྣམ་གཉིས་མཇལ་འཕྲད་དུས་ཡུན་སྐར་མ་ ༤༥ གནང་ཡོད་པ་དང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་ལ་བོད་ནང་གི་གནས་སྟངས་མདོར་བསྡུས་ཤིག་འགྲེལ་བརྗོད་གནང་ཡོད་རེད། སྐུ་ཞབས་ཇོན་མིཀ་ཁན་མཆོག་གིས་ཀྱང་༸གོང་ས་མཆོག་ལ་རྒྱབ་སྐྱོར་ཡོད་པ་གསལ་སྟོན་གནང་ཡོད་པ་རེད།
མཇལ་འཕྲད་གྲུབ་རྗེས་ཁོང་རྣམ་གཉིས་ནས་གསར་འགོད་པ་ཚོར་འགྲེལ་བརྗོད་མདོར་བསྡུས་རེ་གནང་ཡོད་པ་རེད། སྐུ་ཞབས་ཇོན་མེཀ་ཁན་གྱིས་གསུང་དོན། རྒྱ་ནག་གཞུང་ལ་བོད་མིའི་རེ་བ་དང་འདུན་པ་ཡོངས་རྫོགས་མཚོན་པའི་ཞི་བདེའི་ཐབས་ལམ་འཛིན་གནང་མཁན་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་བོད་ཀྱི་དཀའ་ངལ་སེལ་རྒྱུའི་སླད་གྲོས་མོལ་བཅོས་མ་མ་ཡིན་པ་དོན་སྙིང་ལྡན་པ་ཞིག་གནང་དགོས་པའི་འབོད་སྐུལ་གནང་བ་དང་ཆབས་ཅིག རང་གི་འདུན་པ་ཞི་བའི་རྔམ་སྟོན་ཁྲོམ་སྐོར་ཐོག་ནས་གསལ་སྟོན་བྱེད་མཁན་བོད་མི་གྲྭ་བཙུན་དང་སྐྱེ་ཕོ་མོ་འཛིན་བཟུང་དོ་དམ་བྱས་པ་ཡོངས་རྫོགས་གློད་བཀྲོལ་གཏོང་དགོས་པ་དང་།
དེ་བཞིན་བོད་ནང་རྒྱལ་སྤྱིའི་གསར་འགོད་པ་དང་ཡུལ་སྐོར་སྤྲོ་འཆམ་འགྲོ་བསྐྱོད་བྱ་རྒྱུ་དམ་བསྒྲགས་བྱས་ཡོད་པ་དེ་དག་ཕྱིར་བསྡུ་བྱེད་དགོས། ཞེས་དང་། ཟླ་བ་རྗེས་མའི་ནང་ཚོགས་རྒྱུའི་ཨོ་ལེམ་པིཀ་རྩེད་འགྲན་དེ་རྒྱ་ནག་གཞུང་གྱིས་འཛམ་གླིང་ནང་སོ་སོའི་མི་མང་གི་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་ཡི་ཡོད་པ་སྟོན་བྱེད་ཀྱི་དུས་ཚོད་ཤིག་རེད། ཨ་རིའི་གཞུང་གིས་རྒྱ་ནག་གཞུང་དང་འབྲེལ་ལམ་བཟང་པོ་ཡོང་རྒྱུར་དགའ་བསུ་ཞུ་ཡི་ཡོད། ཡིན་ནའང་དེས་རྒྱ་ནག་གཞུང་དང་རྒྱ་ནག་མི་མང་གིས་རྒྱ་ནག་ནང་གི་ཐོབ་ཐང་རྩིས་མེད་རྡོག་རོལ་གཏོང་བར་ཨ་རི་དང་མང་གཙོའི་རྒྱལ་ཁབ་ཁག་གིས་ཐེ་བྱུས་མེད་པ་མ་རེད། དེར་ང་ཚོས་ཐེ་བྱུས་བྱས་ཡོད། བྱེད་ཀྱི་ཡིན། ཐེ་བྱུས་ཡོད་རེད། ཅེས་གསུངས་ཡོད་པ་རེད། སྐབས་དེར་སྐུ་ཞབས་ཇོན་མིཀ་ཁན་གྱི་ཕྱག་རོགས་སུ་ཨ་རིའི་གཞུང་འཛིན་སྤྱི་འཐུས་ཚོགས་པའི་ཚོགས་མི་སྐུ་སིན་ལིནཌེ་སིའི་གྷ་ར་ཧམ་(Sen Lindsey Graham)ཕེབས་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགོད་པ་ཚོར་བཀའ་ཕེབས་དོན། ཐེངས་འདིར་ངོས་རང་ཆབ་སྲིད་ཀྱི་ཆེད་དུ་བཅར་བ་ཞིག་མིན། ངོས་ཀྱི་གྲོགས་པོ་རྙིང་པ་ད་ཆ་སྙན་གྲགས་ཅན་གྱི་རྒྱལ་ཁབ་འདིའི་སྲིད་འཛིན་འོས་མི་ཆགས་པ་ཁོང་དང་ངོས་གཉིས་ཐུག་འཕྲད་བྱེད་རྒྱུའི་གོ་སྐབས་ཤིག་བྱུང་། དོན་དངོས་ཐོག་ངོས་རང་དགའ་སྤྲོ་དང་སྤོབས་སེམས་ལྡན་པ་བྱུང་། ཁོང་གིས་སྤྱིར་རྒྱ་ནག་ནང་དུ་མང་གཙོ་དང་། འགྲོ་བ་མིའི་ཐོབ་ཐང་། ཆོས་དད་རང་དབང་། ཁོར་ཡུག་གི་གནད་དོན་བཅས་ལ་ཐུགས་འཁུར་གནང་བ་དང་ལྷག་པར་དུ་བོད་དོན་ཐོག་ཐུགས་འཁུར་ཆེན་པོ་གནང་གི་འདུག ངོས་ཀྱིས་ཁོང་ལ་བོད་ནང་གི་ད་ལྟའི་གནས་སྟངས་འགྲེལ་བརྗོད་ཞུས་པ་ཡིན། ཁོང་གཉིས་ཀྱིས་ཐུགས་འཁུར་དང་ཐུགས་སྣང་ཆེན་པོ་གནང་སོང་བས་ཐུགས་རྗེ་ཆེ་ཞེས་བརྗོད་རྒྱུ་ཡིན། ཞེས་བཀའ་སྩལ་ཡོད་པ་རེད།།
