༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༨ ཉིན་ཕྱི་དྲིལ་ལས་ཁུངས་ཀྱིས་གོ་སྒྲིག་ཞུས་པའི་ཨོསྟྲེ་ལི་ཡཱར་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐབས་བྱུས་ཚོགས་འདུ་དང་ཟབ་སྦྱོང་མཇུག་སྒྲིལ་ཡོད།
དེ་ཡང་ཉིན་གྲངས་གཉིས་པར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་མཇུག་སྡོམ་གསུང་བཤད་གནང་སྐབས་ས་གནས་ཁག་ཏུ་དང་བླངས་བོད་དོན་ཞུ་གཏུག་ལས་འགུལ་གྱི་ལས་དོན་སྤེལ་ཕྱོགས་སྐོར་དང་། བོད་དོན་འཐབ་རྩོད་ཐོག་ཚོགས་བཅར་བ་རྣམས་ནས་ནུས་པ་མཉམ་སྤུངས་དགོས་པའི་འབོད་སྐུལ་གནང་ཡོད།
ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་ཚེ་བརྟན་སྒྲོལ་མ་ལགས་ཀྱིས་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་གྱི་ལག་བསྟར་འཆར་གཞི་ཁག་སྒྲོགས་སྦྱང་གནང་རྗེས་ཚོགས་བཅར་བ་རྣམས་སྡེ་ཚན་སོ་སོར་ཆ་བགོས་ཀྱིས་བགྲོ་གླེང་དང་། ས་གནས་འབྲེལ་མཐུད་པ་བསྐོ་བཞག་གནང་ཡོད།
དེ་ནས་ཚོགས་བཅར་བ་སྡེ་ཚན་སོ་སོའི་གྲོས་དོན་རྣམས་སྙན་སྒྲོན་དང་། ས་གནས་སོ་སོའི་འབྲེལ་མཐུད་པ་རྣམས་ནས་ཕྱི་དྲིལ་ལས་ཁུངས་ཀྱི་འབྲེལ་མཐུད་པ་ལྷན་གྲོས་མོལ་གནང་ཐོག་ཨོསྟྲེ་ལི་ཡཱར་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐུན་མོང་གི་ལག་བསྟར་འཆར་གཞི་གཏན་འབེབས་གནང་ཡོད་པ་བཅས།།
