༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༨ རེས་གཟའ་ལྷག་པ་ཉིན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་མི་ལོ་ ༢༨ ཧྲིལ་པོ་འཁོར་བའི་དུས་སྟོན་མཛད་སྒོ་འཚོགས་ཡོད།
དེ་ཡང་མཛད་སྒོའི་སྐུ་མགྲོན་གཙོ་བོར་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་མགྲོན་འབོད་གནང་བ་བཞིན་ཕེབས་བཅར་གྱིས་བོད་ཀྱི་རིག་གཞུང་གི་གལ་གནད་དང་། ལྷག་དོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་ནང་བོད་མིའི་སྒྲིག་འཛུགས་ནང་ནས་ཐོག་མར་ཆོས་དོན་ལྷན་ཁང་གསར་བཙུགས་མཛད་པ་དང་། དེ་བཞིན་བཙན་བྱོལ་ནང་འབྱོར་མ་ཐག་རིག་གཞུང་གི་ལྟེ་གནས་བོད་ཀྱི་ཟློས་གར་ཚོགས་པ་གསར་བཙུགས་མཛད་པ་སོགས་རིག་གཞུང་ཐོག་ལ་༸རྒྱལ་བའི་དགོངས་བཞེད་མཛད་ཚུལ་དང་། བོད་ཀྱི་ཆོས་དང་རིག་གཞུང་དེ་བོད་ཀྱི་འཐབ་བརྩོད་ཐོག་ལ་གལ་གནད་ཆེན་པོ་ཡིན་པ་སོགས་ཀྱི་གསུང་བཤད་གནང་ཡོད།
སྤྱིར་ཕྱི་ལོ་ ༡༩༩༥ ལོའི་ཕྱི་ཟླ་ ༡༡ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དེ་ཉིད་དབུ་འབྱེད་བཀའ་དྲིན་བསྐྱངས་གནང་ཡོད། བསྟི་གནས་ཁང་དེ་ནི་གངས་ཅན་པའི་ལེགས་བྱང་གིས་བསྡུས་པའི་སྒྱུ་རྩལ་གྱི་རྣམ་གྲངས་ཁག་མྱུར་སྐྱོབ་གཅེས་གཉེར་བྱེད་པའི་ལྟེ་གནས་ཤིག་ཡིན་པ་དང་། དེ་ལྟར་གཙོ་གཉེར་ཞུ་དགོས་པའི་རྒྱུ་མཚན་བོད་ཀྱི་རིག་གཞུང་ནི་བོད་མིའི་ངོ་བོ་མཚོན་པར་བྱེད་པའི་བོད་མི་རིགས་ཀྱི་ཐུན་མིན་བླ་སྲོག་དང་རྩ་དོན་འཐབ་རྩོད་བྱེད་པའི་དགོས་དམིགས་གལ་ཆེན་ཞིག་ཡིན་པ་བཞིན། རིག་གཞུང་གཅེས་སྐྱོང་གི་ཞུ་སྒོ་ནི་ཚོགས་སྡེ་འདིའི་དགོས་དམིགས་གཙོ་བོ་ཡིན།
གངས་ཅན་པའི་ཐུན་མོང་མ་ཡིན་པའི་རིག་གཞུང་ཆེ་ཕྲ་རྣམས་ཕྱོགས་ཡོངས་ནས་ཉམས་པ་སླར་གསོ་དང་། མི་ཉམས་གོང་སྤེལ་གྱིས་རྒྱལ་སྤྱིའི་རིག་གཞུང་དང་བཟོ་ཚོང་གི་སྡིངས་ཆའི་ཐོག་ཁྱབ་བརྡལ་བྱ་རྒྱུའི་དམིགས་དོན་བཟུང་སྟེ། ྋགོང་ས་མཆོག་གི་ཐུགས་རྗེའི་གྲིབ་བསིལ་འོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་འདི་ཉིད་གསར་འཛུགས་རྒྱ་བསྐྱེད་ཀྱིས་འཛིན་སྐྱོང་ཞུ་མུས་ཡིན་པ་རེད།
ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་འོག་ཏུ་སྤྱིར་སྡེ་ཚན་ཆེ་ཁག་གསུམ་སྟེ། བཟོ་རིག་སྡེ་ཚན་དང་། མཛད་རྣམ་དང་ཉམས་ཞིབ་སྡེ་ཚན། ཤེས་ཡོན་དང་བདེ་དོན་སོགས་ཀྱི་སྡེ་ཚན་བཅས་ཡིན་ཞིང་། བཟོ་རིག་སྡེ་ཚན་ཁོངས་སུ་རྟེན་བཞེངས་སྡེ་ཚན་དང་། ལྷ་བྲིས་སྡེ་ཚན། གོས་ཐང་སྡེ་ཚན། ཤིང་བརྐོས་དང་ཤིང་བཟོ་སྡེ་ཚན། ཤིང་ཚོན་དང་ཤིང་རྩི་སྡེ་ཚན། ལས་འཚེམ་སྡེ་ཚན། འཁོར་འཚེམ་སྡེ་ཚན་བཅས་ཡོད་ལ། མཛད་རྣམ་དང་ཉམས་ཞིབ་སྡེ་ཚན་ཁོངས་སུ་མཛད་རྣམ་རྩོམ་སྒྲིག་སྡེ་ཚན་དང་། བོད་ཀྱི་རིག་གཞུང་ཞིབ་འཇུག་ལྟེ་གནས་བཅས་ཡོད། ཤེས་ཡོན་དང་བདེ་དོན་སོགས་ཀྱི་སྡེ་ཚན་ཁོངས་སུ་བོད་ཀྱི་རིག་གནས་མཐོ་རིམ་སློབ་གྲྭ་དང་། ལག་ཤེས་སྒྱུ་རྩལ་སློབ་གྲྭ ནོར་གླིང་སམ་བྷོཊ་དཔེ་མཛོད། འཕྲོད་བསྟེན་སྨན་ཁང་། བྱིས་བཅོལ་ཁང་དང་སྔོན་འགྲོའི་སློབ་གྲྭ ཤེས་ཡོན་ཟུར་སྦྱོང་ཁང་བཅས་ཡོད་པ་བཅས།།
