༄༅། །ཨོསྟྲེ་ལི་ཡཱའི་སྲིད་བློོན་ཨན་ཊོ་ནི་ཨལ་བྷ་ནི་སི་མཆོག་རྒྱ་ནག་ཏུ་གཞུང་འབྲེལ་འཚམས་གཟིགས་སུ་ཕེབས་ཀྱི་ཡོད་པ་ལྟར་ཕྱི་ལོ་ ༢༠༢༣ ཟླ་བ་ ༡༠ ཚེས་ ༣༠ ཉིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་སྲིད་བློན་མཆོག་ལ་ཕྱག་བྲིས་ཕུལ་ཏེ་རྒྱ་ནག་གི་སྲིད་འཛིན་ཞི་ཅིན་ཕིང་དང་དམར་ཚོགས་ཚོགས་པའི་འགོ་ཁྲིད་ལྷན་དུ་བོད་དོན་སྐོར་གླེང་སློང་གནང་སྐྱོང་ཡོང་བའི་འབོད་སྐུལ་ཞུས་ཡོད།
དེ་ཡང་ཕྱག་བྲིས་ནང་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས། བོད་ནང་གི་གནས་སྟངས་ཛ་དྲག་ཅན་དུ་གྱུར་ཡོད། རྒྱ་ནག་གཞུང་གི་དྲག་གནོན་ཅན་གྱི་སྲིད་བྱུས་འོག་ཏུ་བོད་མིའི་ངོ་བོ་རྩ་བརླག་ཏུ་འགྲོ་ཉེན་ཆེ། བོད་ནང་གི་བོད་མི་རྣམས་རིག་གཞུང་མཉམ་སྲེས་དང་། སྲིད་དོན་གྱི་གཉའ་གནོན། དཔལ་འབྱོར་ཟུར་ཕུད་བཏང་བའི་དཀའ་ངལ་འཕྲད་བཞིན་ཡོད། བོད་ནང་གཉན་གནོན་གྱི་གནས་སྟངས་དང་། སྤྱི་ཚོགས་འཚོ་བའི་གོ་ཡུལ་མེད་པའི་དབང་གིས་བོད་མི་ཉུང་མཐར་ ༡༥༧ ཙམ་གྱིས་བོད་ནང་རང་དབང་ཇེ་ཆེར་གཏོང་བ་དང་། ༸གོང་ས་༸སྐྱབས་མགོན་ཆེན་པོ་མཆོག་བོད་དུ་ཕྱིར་ཕེབས་དགོས་པའི་འབོད་སྐུལ་ཞུས་ཏེ་རང་ལུས་མེར་བསྲེགས་ཀྱིས་ངོ་རྒོལ་བྱས་ཡོད། བོད་ཕྲུག་ས་ཡ་གཅིག་ཙམ་ཁྱིམ་ཚང་དང་ཁ་བྲལ་ཏེ་རྒྱའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ནང་བཙན་འཁྲིད་བྱས་སྐོར་བརྗོད་ཀྱི་ཡོད་ལ། བོད་ཡིག་གི་ཚབ་ཏུ་རྒྱ་ཡིག་སློབ་འགོ་བཙུགས་ཏེ་བོད་པའི་སློབ་འབྲིང་ཁག་སྒོ་རྒྱག་གི་ཡོད། དེ་མ་ཚད་བོད་མི་འབྲོག་པ་ས་ཡ་གཉིས་ལྷག་བཙན་ཤེད་ཀྱིས་རང་གི་ཕ་མེས་ཀྱི་ས་ཆ་ནས་ཕྱིར་ཕུད་བཏང་ཡོད་པ་རེད། པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་བཙན་འཁྲིད་ཀྱིས་གར་སོང་ཆ་མེད་དུ་གྱུར་པ་དེ་བོད་མི་ཙམ་དུ་མ་ཟད། ནང་ཆོས་ཉམས་ལེན་བྱེད་མཁན། དེ་བཞིན་འཛམ་གླིང་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་རྩོད་ལེན་པ་ཚོར་སེམས་འཚབ་ཆེན་པོ་ཡོང་གཞིའི་རྒྱུ་རྐྱེན་ཞིག་ཏུ་གྱུར་ཡོད། ཅེས་འཁོད་ཡོད།
གཞན་ཡང་ཁོང་གིས་རྒྱ་ནག་གཞུང་ནས་བོད་མིའི་རིགས་རྫས་དཔེ་མཚོན་བསྡུ་རུབ་བྱས་ཏེ་བོད་མིའི་འགྲོ་འཆག་ཉལ་འདུག་ཐོག་བྱ་ར་སོ་ཉུལ་བྱེད་ཀྱི་ཡོད་པ་དང་། དེ་ལ་བརྟེན་ནས་བོད་མི་ཙམ་མ་ཟད་འགྲོ་བ་མི་རིགས་སྤྱི་ཡོངས་ལ་རྗེས་འབྲས་ངན་པ་ཡོང་ངེས་པའི་ཉེན་བརྡ་བཏང་ཡོད།
མཐའ་དོན་སྐུ་ཚབ་དོན་གཅོད་ནས། ངེས་གཏན་མེད་པའི་ཛ་དྲག་གི་དུས་སྐབས་འདིར་ཁྱེད་རྣམ་པ་གཉིས་རྒྱ་ནག་ཏུ་ཕེབས་སྐབས་བོད་ནང་གི་གནས་སྟངས་ཐད་ཨོསྟྲེ་ལི་ཡཱའི་སེམས་ཁྲལ་གསལ་འདོན་དང་། རྒྱུན་རིང་གནས་པའི་རྒྱ་བོད་དབར་གྱི་དཀའ་རྙོག་སེལ་ཐབས་སུ་༸གོང་ས་༸སྐྱབས་མགོན་ཆེན་པོའི་སྐུ་ཚབ་དང་རྒྱ་ནག་གཞུང་གཉིས་དབར་གྲོས་མོལ་བྱེད་དགོས་པའི་འབོད་སྐུལ་གནང་རོགས་ཞེས་འབོད་སྐུལ་ཞུ་རྒྱུ་ཡིན། བོད་ཀྱི་གནད་དོན་སེལ་ཐབས་ཤིག་བྱུང་བ་ཡིན་ན། འཛམ་གླིང་ཞི་བདེ་ལྡན་པ་ཡོང་བ་དང་། བོད་མི་ཙམ་མ་ཟད། རྒྱ་ནག་དང་བོད་ལྗོངས་ཡོངས་ལ་འཕེལ་རྒྱས་དང་བརྟན་བརླིང་ཡོང་བའི་གོམ་པ་ཆེན་པོ་ཞིག་ཏུ་འགྱུར་རྒྱུ་རེད། ཅེས་གསལ་ཡོད།
གཞན་ཡང་ཨོསྟྲེ་ལི་ཡཱ་བོད་དོན་ལྷན་ཚོགས་ངོས་ནས་ཀྱང་སྲིད་བློན་ཨལ་བྷ་ནི་སི་མཆོག་ནས་རྒྱ་ནག་གི་འགོ་ཁྲིད་ལྷན་གྲོས་མོལ་གནང་སྐབས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་སྐོར་གླེང་སློང་གནང་དགོས་པའི་རེ་སྐུལ་ཞུས་ཡོད། ཕྱི་ལོ་ ༢༠༢༣ ཟླ་བ་ ༡༡ ཚེས་ ༠༢ ཉིན་ཨོསྟྲེ་ལི་ཡཱ་བོད་དོན་ལྷན་ཚོགས་ཀྱི་སྤྱི་ཁྱབ་འགན་འཛིན་ཛོ་བྷེ་ཕོཊ་ལགས་ཀྱིས་གསར་འགོད་བསྒྲགས་གཏམ་ཞིག་སྤེལ་ཏེ། ཉེ་ལམ་ཨོསྟྲེ་ལི་ཡཱ་མི་མང་གི་བསམ་ཚུལ་བསྡུ་ལེན་བྱེད་པ་བརྒྱུད་མི་སེར་བརྒྱ་ཆ་ ༦༦ ནས་རྒྱ་ནག་ལྷན་དུ་ཚོང་གི་འབྲེལ་ལམ་འཛུགས་རྒྱུ་དེ་རྒྱ་ནག་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སྐྱོན་བརྗོད་གདོང་ལེན་བྱ་རྒྱུ་དེ་ལས་གལ་ཆུང་བ་རེད་ཅེས་བསམ་ཚུལ་བཤད་ཡོད་ཅེས་དང་། རྒྱ་ནག་དང་མཉམ་དུ་ཚོང་འབྲེལ་གྲོས་མོལ་བྱེད་སྐབས་ཨོསྟྲེ་ལི་ཡཱའི་རིན་ཐང་ཉམས་རྒུད་དུ་འགྲོ་བ་མཐོང་འདོད་མེད། བོད་དོན་སྐོར་གླེང་སློང་མ་ཐུབ་ན། དེ་ནི་རྒྱ་ནག་གི་ཚོང་འབྲེལ་གྱི་ཐབས་བྱུས་དེ་རྒྱལ་ཁ་ཐོབ་པ་ཆགས་ཡོད། ཨོསྟྲེ་ལི་ཡཱའི་མི་མང་གིས་སྲིད་བློན་མཆོག་ནས་ཨོསྟྲེ་ལི་ཡཱའི་རིན་ཐང་བརྩི་སྲུང་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་སྐོར་གླེང་སློང་གནང་བའི་རེ་བ་བྱེད་ཀྱི་ཡོད་ཅེས་གསུངས་ཡོད་པ་བཅས།།
