༄༅། །ཕྱི་ལོ་ ༢༠༢༣ ཟླ་བ་ ༡༡ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་བཅོ་ལྔ་པ་དབུ་འཛུགས་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་པའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། བདེ་སྲུང་བཀའ་བློན་རྒྱ་རི་སྒྲོལ་མ་མཆོག བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། ནང་སྲིད་དྲུང་འཕར་བསྟན་འཛིན་ནོར་བུ་ལགས། ནང་སྲིད་དྲུང་འཕར་བྱམས་པ་ཕུན་ཚོགས་ལགས། ཚོགས་བཅར་བ་ས་གནས་འགོ་འཛིན་རྣམ་པ་ཚང་འཛོམས་ཀྱི་ཐོག་མར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་སྣང་གསལ་མར་མེ་ཞལ་འབྱེད་གནང་རྗེས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་འབུལ་ལེན་དང་། བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་འདས་གསོན་རྣམས་ལ་གདུང་སེམས་མཉམ་སྐྱེ་མཚོན་ཆེད་སྐར་མ་གཅིག་རིང་ངག་བཅད་མྱ་ངན་གུས་བཏུད་ཞུས་གྲུབ་བསྟུན་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཚོགས་འདུའི་ངོ་སྤྲོད་གསུང་བཤད་གནང་ཡོད།
དེ་རྗེས་དཔལ་ལྡན་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ཚོགས་འདུ་དང་འབྲེལ་བའི་གསུང་བཤད་གནང་སྐབས་ས་གནས་འགོ་འཛིན་རྣམས་ནས་ས་གནས་སོ་སོའི་མང་ཚོགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་དྲན་གསོ་གནང་རྒྱུ་དང་། བོད་མི་མི་རབས་རྒན་པ་རྣམས་ཀྱིས་བོད་བསྟན་སྲིད་ཆེད་དུ་སྐུ་ངལ་འཛད་མེད་སྐྱོན་ཡོད་པས་ཁོང་ཅག་ལ་གུས་བརྩི་དང་གཟིགས་སྐྱོང་གནང་དགོས་པའི་ལམ་སྟོན་དང་སྦྲགས། བཀའ་ཤག་དང་འཛིན་སྐྱོང་གི་ལས་བྱེད་རྣམས་འཕྲུལ་འཁོར་གཅིག་ལྟ་བུར་ནུས་པ་མཉམ་སྤུངས་ཀྱིས་བོད་དོན་ཆབ་སྲིད་དང་། བཙན་བྱོལ་བོད་མིའི་བདེ་སྡུག་ལྟ་སྐྱོང་གནང་རྒྱུར་ཕྱག་ལས་གནང་དགོས་སྐོར་གསུངས།
དེ་བཞིན་ཁོང་གིས་ཉེ་ལམ་བཀའ་ཤག་སྐབས་བཅུ་དྲུག་པའི་ངོས་ནས་མ་འོངས་བོད་ཀྱི་འགན་སྲུང་ཞེས་པའི་ཕུགས་དམིགས་ཡིག་ཆ་ཞིག་འདོན་སྤེལ་གནང་ཡོད་པ་ལྟར། ས་གནས་འགོ་འཛིན་དང་ལས་བྱེད་རྣམས་ནས་བཀའ་ཤག་གི་འཆར་གཞི་དང་ལས་དོན་གནང་ཕྱོགས། དེ་འབྲེལ་ལས་རིམ་སྒྲིག་སྟངས་སོགས་ཀྱི་སྐོར་རྒྱུས་ལོན་ཡོང་ཐབས་སུ་ཡིག་ཆ་དེ་ཉིད་ལྟ་ཀློག་གནང་དགོས་ཤིང་། ལྷག་པར་དེར་གསལ་བའི་ལས་གཞི་ལས་དོན་མང་དག་ཅིག་མི་མང་གི་དགོས་མཁོ་དང་ཐད་ཀར་འབྲེལ་བ་ཡོད་པས་ས་གནས་འགོ་འཛིན་རྣམས་ནས་དེ་དོན་མཁྱེན་རྟོགས་དགོས་རྒྱུ་གལ་གནད་ཆེན་པོ་ཡིན་པ་གསལ་བཤད་གནང་རྗེས་ཕུགས་དམིགས་ཡིག་ཆའི་ནང་གསལ་བའི་གནད་དོན་ཁག་ཅིག་ངོ་སྤྲོད་གནང་ཡོད་པ་རེད།
དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་གིས་ས་གནས་འགོ་འཛིན་རྣམས་ནས་ས་གནས་སོ་སོར་ལས་དོན་གནང་ཕྱོགས་དེ་མང་གཙོའི་ལྟ་གྲུབ་དང་མཐུན་པའི་ཐོག་མང་ཚོགས་ཀྱི་བདེ་དོན་ལ་བསམ་གཞིག་གིས་ལས་དོན་རྣམས་དྲང་བདེན་དང་། ཕྱི་གསལ་ནང་གསལ་གནང་དགོས་པ་མ་ཟད། ས་གནས་སོ་སོའི་སྒྲིག་གཞི་ཁག་དུས་བསྟུན་ལེགས་བཅོས་གནང་འོས་ཇི་ཡོད་རྣམས་ཁྲིམས་སྒྲིག་འགལ་མེད་གནང་རྒྱུ་དང་། ས་གནས་འཐུས་ཚོགས་མེད་པའི་ས་གནས་ཁག་ནས་ས་འཐུས་གསར་འཛུགས་གནང་ཐབས་སུ་འབད་རྩོལ་གནང་དགོས་པའི་ལམ་སྟོན་གནང་ཡོད།
སྤྱིར་ཐེངས་འདིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅོ་ལྔ་པ་དེ་བཞིན་འདི་ལོའི་ཕྱི་ཟླ་ ༡༡ ཚེས་ ༠༦ ནས་ ༠༩ བར་ཉིན་གྲངས་གསུམ་རིང་འཚོག་གི་ཡོད་པ་དང་། ཚོགས་འདུའི་ཐོག་རྒྱ་བལ་འབྲུག་གསུམ་གྱི་ས་གནས་འགོ་འཛིན་གྲངས་ ༤༥ མཉམ་ཞུགས་གནང་ཡོད་པ་བཅས།། 
