༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༣༡ ཉིན་དཔལ་ས་སྐྱ་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་བ་ར་ཛིལ་དུ་ཞབས་སོར་འཁོད་སྐབས་ལྷོ་ཨ་མི་རི་ཀའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་དང་། བ་རཱ་ཛིལ་ས་སྐྱའི་ཆོས་ཚོགས་ (Mosteiro Sakya Tsarpa) ཀྱི་བླ་མ་རིན་ཆེན་མཁྱེན་རབ་ལགས། དེ་བཞིན་དད་ལྡན་རྗེས་འཇུག་ཁག་ཅིག་ནས་ཕེབས་བསུ་ཞུས་ཡོད།

ཕྱི་ཟླ་ ༡༡ ཚེས་ ༡ ཉིན་ས་སྐྱ་ཁྲི་འཛིན་ཞེ་གཉིས་པ་མཆོག་གིས་བ་རཱ་ཛིལ་བོད་ཁང་ངམ་ལྷོ་ཨ་རིའི་སྐུ་ཚབ་དོན་གཅོད་ཁང་གི་ལས་ཁུངས་གསར་པར་རབ་གནས་དབུ་འབྱེད་གནང་ཡོད། ལས་གཞི་འདི་ནི་ལྷོ་ཨ་རིའི་ཁུལ་དུ་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་སླད་དབུ་འཛུགས་གནང་བ་ཞིག་ཡིན་པ་དང་། ས་ཚིགས་གསར་པ་འདི་བརྒྱུད་བོད་ཀྱི་ཆོས་རིག་བ་རཱ་ཛིལ་གཙོས་པའི་ལྷོ་ཨ་རིའི་ཁུལ་དུ་དར་ཁྱབ་སྔར་ལྷག་ཡོང་བར་ཕན་ཐོགས་ངེས་པ་ཡིན།སྤྱིར་བ་རཱ་ཛིལ་བོད་ཁང་ནི་བོད་ཀྱི་ཆོས་དང་རིག་གཞུང་བ་རཱ་ཛིལ་ཁུལ་དུ་མི་ཉམས་གོང་འཕེལ་དང་རྒྱུན་འཛིན་གནང་མཁན་གྱི་བསྟི་གནས་གལ་ཆེ་ཞིག་ཡིན་ཞིང་། བསྟི་གནས་ཁང་འདིའི་ནང་བོད་ཀྱི་རིག་གཞུང་དང་འབྲེལ་བའི་གསུང་བཤད་ལས་རིམ་དང་། སྒྱུ་རྩལ་འགྲེམས་སྟོན། ཟབ་སྦྱོང་། སྒོམ་གྲུབ་འཛིན་གྲྭ་སོགས་ཀྱི་བྱེད་སྒོ་རྣམ་གཞག་གོ་སྒྲིག་གནང་གི་ཡོད་པ་བཅས།།