༢༠༡༡ ཟླ་ ༡༢ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༡༡ དང་ ༡༢ བཅས་ཉིན་གཉིས་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ཅེཀ་སྤྱི་མཐུན་རྒྱལ་ཁབ་(Czech Republic)ཀྱི་རྒྱལ་ས་པ་རག་(Prague)ཏུ་ཆིབས་སྒྱུར་བསྐྱང་སྟེ་མང་ཚོགས་ལ་བཀའ་སློབ་དང་གསར་འགོད་པར་མཇལ་འཕྲད་ཐོག་བཀའ་སློབ་སྩལ་གནང་མཛད་རྒྱུ་མ་ཟད། བགྲོ་གླེང་སོགས་ཀྱི་ནང་ལྷན་ཞུགས་མཛད་རྒྱུ་ཡིན་འདུག  དེ་ཡང་མགོན་པོ་གང་ཉིད་མཆོག་གིས་ཕྱི་ཚེས་ ༡༡ ཉིན་སྔ་ལོ་ཟླ་ ༡༢ ཚེས་ ༡༠ ཉིན་རྒྱ་རིགས་མང་གཙོ་དོན་གཉེར་བ་སྐུ་ཞབས་ལིའུ་ཞའོ་པོ་ལ་ནོ་བེལ་ཞི་བདེའི་གཟེངས་རྟགས་ཐོབ་ཡོད་ཀྱང་རྒྱ་ནག་གཞུང་གིས་དམ་བསྒྲགས་བྱས་རྐྱེན་ནོ་བེལ་གཟེངས་རྟགས་འབུལ་ཡུལ་ནོར་བེ་རྒྱལ་ས་ཨོ་སི་ལོར་ཕེབས་མ་ཐུབ་པར་བརྟེན། གཟེངས་རྟགས་འབུལ་ཉིན་ཁོང་གི་ཞུགས་གྲལ་སྟོང་པར་བཞག་སྟེ་ལོ་གཅིག་ཧྲིལ་པོ་འཁོར་རྗེས། ཨེ་ཤིའི་ནང་མང་གཙོ་དང་འགྲོ་བ་མིའི་ཐོབ་ཐང་གི་གནས་སྟངས་ཐོག་གླེང་སྟེགས་སྒོར་མོའི་བགྲོ་གླེང་ལྷན་ཚོགས་སུ་ཆིབས་སྒྱུར་བསྐྱང་སྟེ་བཀའ་སློབ་སྩལ་གནང་མཛད་རྒྱུ་མ་ཟད། དེ་ཉིན་རྙོག་འཛིང་ཆེ་བའི་འཛམ་གླིང་ནང་བདེ་སྐྱིད་འཚོལ་ཐབས། ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག དེ་བཞིན་ཕྱི་ཚེས་ ༡༢ ཉིན་གསར་འགོད་པ་ཁག་གཅིག་དང་མཇལ་འཕྲད་ཀྱིས་ཆེད་དོན་དྲི་བར་བཀའ་ལན་སྩལ་གནང་མཛད་རྒྱུ་ཡིན་འདུག