༢༠༡༡ ཟླ་ ༡༢ ཚེས་ ༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༦ ཉིན་ཉི་ཧོང་བོད་རིགས་མཐུན་ཚོགས་དང་ས་གནས་བོད་རང་དབང་སློབ་ཕྲུག་ཚོགས་པ་ཐུན་མོང་གིས་ཉི་ཧོང་གྲོས་ཚོགས་ཀྱི་ལས་ཁུངས་ཁག་བཅུ་གསུམ་ནང་བཅར་ཏེ་བོད་ནང་གི་ཛ་དྲག་གནས་སྟངས་སེལ་ཆེད་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་ཡོད་པ་མ་ཟད། ས་གནས་བོད་རིགས་ཚོས་ཉི་ཧོང་གི་གྲོས་ཚོགས་འཐུས་མི་རྣམས་ལ་ད་ལྟའི་བོད་ནང་གི་ཛ་དྲག་གནས་སྟངས་སྐོར་འགྲེལ་བརྗོད་དང་སྦྲགས། བོད་ནང་འ་ཆད་འུ་ཐུག་གིས་རང་ལུས་མེར་སྲེག་གཏོང་དགོས་བྱུང་བའི་དཀའ་ངལ་དེ་དག་སེལ་ཆེད་རྒྱལ་སྤྱིའི་རྒྱབ་སྐྱོར་གྱི་ནུས་པ་གཅིག་ཏུ་སྤུང་རྒྱུའི་ལས་འགུལ་དེར་ཉི་ཧོང་གྲོས་ཚོགས་ཀྱིས་རྒྱབ་སྐྱོར་གནང་རོགས་ཞེས་འབོད་སྐུལ་ཤུགས་ཆེ་ཞུས་ཡོད། དེ་ཡང་བོད་རིགས་ཚོགས་པའི་ཚོགས་གཙོ་བློ་བཟང་ཡེ་ཤེས་ལགས་ཀྱིས་གསུང་དོན། བོད་ནང་གི་བོད་མིས་རང་ལུས་མེར་སྲེག་བཏང་བའི་ཛ་དྲག་གི་གནས་སྟངས་ལ་གཞིགས་ཚེ་ང་ཚོས་དུས་ཚོད་ཐུང་ངུ་ཞིག་གི་ནང་རྒྱལ་སྤྱིའི་ནུས་པ་གཅིག་ལ་སྤུང་རྒྱུའི་ལས་འགུལ་སྤེལ་དགོས་པ་ཆགས་ཡོད་ཀྱང་ད་བར་ང་ཚོས་གང་ཐུབ་ཐུབ་བྱེད་རྒྱུ་བྱུང་བར་དགའ་པོ་བྱུང་།
འབྱུང་འགྱུར་ང་ཚོས་གྲ་སྒྲིག་སྔོན་སོང་གི་སྲིད་བྱུས་ཐོག་གྲོས་ཚོགས་ཀྱི་འཐུས་མི་གང་མང་ཐུག་ཐུབ་པའི་འབད་བརྩོན་ཞུ་རྒྱུ་ཡིན་ཞེས་གསུངས་འདུག ཕྱོགས་མཚུངས་ཚོགས་གཞོན་སྒྲོལ་མ་ཚེ་རིང་ལགས་ཀྱིས་གསུང་དོན། ཉི་ཧོང་གྲོས་ཚོགས་ཀྱི་འཐུས་མི་རྣམས་ནས་བོད་ནང་གི་བོད་མི་ཚོའི་གནས་སྟངས་ལ་དོ་སྣང་ཧ་ཅང་ཆེན་པོ་གནང་བཞིན་ཡོད་པ་མ་ཟད། བོད་ནང་ད་དུང་གནས་ཚུལ་ཇི་བྱུང་ཁོང་རྣམས་ལ་གསལ་བཤད་བྱེད་རོགས་ཞེས་འབོད་སྐུལ་ཡང་ཞུས་བྱུང་། ཞེས་གསལ་བཤད་གནང་ཡོད།
གཞན་ཡང་བོད་རིགས་སློབ་ཕྲུག་མཐུན་ཚོགས་ཀྱི་འཐུས་མི་རྣམས་ནས་རེ་སྐུལ་ཞུས་པ་ལྟར་ཉི་ཧོང་གྲོས་ཚོགས་འཐུས་མི་བཞིས་བོད་མི་ཚོར་རྒྱབ་སྐྱོར་གྱི་ཡིག་ཆར་མཚན་རྟགས་བཀོད་ཡོད། རྒྱབ་སྐྱོར་ཡིག་ཆ་དེར་འཛམ་གླིང་རྒྱལ་ཁབ་འདྲ་མིན་གྱི་གྲོས་ཚོགས་འཐུས་མི་དང་ནོ་བེལ་ཞི་བའི་གཟེངས་རྟགས་བཞེས་མྱོང་མཁན་མང་པོས་ཀྱང་མཚན་རྟགས་བཀོད་ཡོད་པ་བཅས།།
