༢༠༡༡ ཟླ་ ༡༢ ཚེས་ ༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཧོན་སུར་རབ་རྒྱས་གླིང་དུ་རྟེན་གཞི་བྱས་པའི་རྒྱུད་སྨད་གྲྭ་ཚང་གི་གཙུག་ལག་ཁང་ནང་དད་ལྡན་ཆོས་ཞུ་བ་ ༡༠༠༠༠ བརྒལ་བར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀའ་དྲིན་ཆེ་བ་སྩལ་རྗེས་མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཆེད་ས་གནས་ཀྱི་མི་མང་ཡོངས་ནས་བརྟན་བཞུགས་བསྟར་འབུལ་ཞུས་འདུག
དེ་ཡང་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། སྤྱིར་བཏང་འཛམ་གླིང་འདིའི་ཐོག་ལོ་ངོ་སྟོང་ཕྲག་གསུམ་ཙམ་གྱི་ནང་ཚུན་ལ་སྟོན་པ་མང་པོ་ཞིག་བྱུང་ཡོད། དེར་བརྟེན་སྟོན་པ་བཅོམ་ལྡན་འདས་ཀྱང་དེ་དང་དེ་འདྲ་བ་རེད་བསམས་པ་དྲན་ན་བཟོ་ལྟ་ཞེ་དྲག་མེད། ང་ཚོས་སོ་སོའི་ཆོས་ལ་རིན་ཐང་ཡོད་པ་དེ་མ་ཤེས་ན་སྤྱི་འགྲེ་སྤྱི་མཚུངས་རེད། སངས་རྒྱས་པའི་ཆོས་འདི་ནི་འདྲ་འདྲའི་ནང་ནས་མི་འདྲ་ཞིག་ཡིན་པ་དེ་མཆོད་ཤོམ་ནང་བཞག་པས་འགྲིག་གི་མེད། དེ་ང་ཚོས་ཤེས་དགོས་ཀྱི་ཡོད། ཁྱེད་རང་ཚོ་བོད་ནས་གསར་དུ་ཡོང་མཁན་ཚོས་ཤེས་ཀྱི་རེད། དེ་བཞིན་གོ་མྱོང་ཡང་ཡོད། གུང་ཁྲན་གྱིས་སྤྱིར་ཆོས་དང་དེའི་ནང་ཚན་ནས་ང་ཚོ་བོད་པའི་ཆོས་དེ་རྗེས་ལུས་དང་རྨོངས་དད་བཤུ་གཞོག་གཏོང་རྒྱུའི་ལག་ཆ་རེད་ཟེར་ནས་དེ་ལྟ་བུའི་རྨོངས་དད་དེ་རིམ་བཞིན་ཚན་རིག་གི་ཤེས་ཚད་ཡར་རྒྱས་ཕྱིན་ན། རྨོངས་དད་རང་བཞིན་གྱིས་ཡལ་འགྲོ་གི་རེད་ཅེས་བརྗོད་ཡོད། སྔོན་མ་དྲུག་ཅུ་བདུན་ཅུའི་ནང་གི་ཡིག་ཆ་དེ་འདྲ་ནང་བཀོད་འདུག་པ་ངོས་ཀྱིས་མཐོང་བྱུང་། ད་ཆ་ཕྱི་ལོ་ ༢༠༡༡ ནང་སླེབས་ཡོད། སྙན་གྲགས་ཅན་གྱི་ཚན་རིག་པ་མཁས་པའི་དབང་པོ་དེ་དག་གིས་ཀྱང་སངས་རྒྱས་པའི་ཆོས་མི་འདྲ་བ་ཞིག་ཏུ་བརྩིས་ཏེ་ཧ་ཅང་དགའ་པོ་བྱེད་བཞིན་འདུག སངས་རྒྱས་པའི་ཆོས་ཞེས་པ་དེ་དངོས་གནས་རང་ཚུགས་ཐུབ་པ་ཞིག་དང་བརྟག་དཔྱད་བྱས་ཀྱང་བྱ་རྒྱུ་ཡོད་པ་ཞིག་ཆགས་ཡོད། དེར་བརྟེན་ངོས་ཀྱིས་སྤྱིར་ནང་པའི་འགྲོ་སྟངས་དང་ཡང་སྒོས་དཔལ་ནཱ་ལེནྡྲའི་ཆོས་བརྒྱུད་དེ་ལྟར་རེད་ཅེས་འགྲེལ་བཤད་རྒྱག་སྐབས། ཚན་རིག་པ་ཁ་ཤས་ཀྱིས་དེ་འདྲ་ཡིན་ན། བཅོམ་ལྡན་འདས་ཁོང་རང་ཉིད་ཚན་རིག་པ་ཞིག་ཀྱང་རེད་འདུག ཅེས་བརྗོད་ཀྱི་འདུག སྔོན་མ་གུང་ཁྲན་ཏང་གི་དྲིལ་བསྒྲགས་བྱས་པའི་ཡིག་ཆ་དེ་དག་ནི་དངོས་ཡོད་གནས་ཚུལ་འདིའི་གྲས་མ་ཤེས་པའི་དབང་གིས་བཤད་པ་ཧ་ཅང་གསལ་པོ་རེད། ཧམ་པ་བྱས་ནས་བཤད་པ་རེད། གུང་ཁྲན་ཏང་ཧ་ཅང་འཇོན་པོ་འདུག སྔ་མོ་བཤད་པ་དེ་དག་རྫུན་རྐུབ་རྡོལ་བ་དང་སྔ་མོ་བཤད་པ་དེ་དག་རན་གྱི་མེད་ཀྱང་གུང་ཁྲན་ཏང་གི་སྲིད་བྱུས་ནི་ཐོག་མཐའ་བར་གསུམ་དུ་ཡང་དག་པ་ཡིན་ཞེས་ཨུ་ཚུགས་བརྒྱབ་ནས་ཤོད་ཀྱི་འདུག ཁ་སང་བཤད་པ་དེ་དེ་རིང་མི་འདྲ་བར་ཤོད་ཀྱི་འདུག་པས་སྐྱག་རྫུན་བཤད་ན་ཆོ་མེད། ཏང་གི་ཡང་དག་པའི་སྲིད་བྱུས་རེད་མ་གཏོགས་དེ་ཁ་སང་བཤད་པ་དེ་རེད་ཅེས་ཤོད་ས་མེད། ངོ་ཐོག་བྱས་ན་ཁ་སང་དང་དེ་རིང་བཤད་པ་དེ་དག་མི་འདྲ་ཡོང་གི་འདུག ཅེས་བཀའ་སློབ་སྩལ་ཡོད། ལྷག་པར་༸གོང་ས་མཆོག་གིས་ཆོས་ཞུར་བཅར་བའི་དགེ་ལས་སློབ་ཕྲུག་རྣམས་ལ་ཤེས་ཡོན་ཐོག་ཤུགས་སྣོན་རྒྱག་རྒྱུ་གལ་ཆེན་ཡིན་པའི་ལམ་སྟོན་བཀའ་སློབ་སྩལ་དོན། སློབ་ཕྲུག་ཁྱེད་རང་ཚོ་དེ་རིང་ཟུར་དུ་ཐུག་རྒྱུའི་དུས་ཚོད་མ་བྱུང་བ་རེད། འོན་ཀྱང་འཛམ་གླིང་གི་རྒྱལ་ཁབ་གང་དུ་ཡིན་རུང་ཇི་ཙམ་གྱིས་མི་མང་ལ་ཤེས་ཡོན་ཡོད་པ་དེའི་ཚོད་ཀྱིས་ལུང་པ་ཡར་རྒྱས་འགྲོ་རྒྱུ་ཡོང་གི་ཡོད་པ་ཧ་ཅང་གསལ་པོ་རེད། ཆོས་ཕྱོགས་ཐོག་ནས་ཡིན་ནའང་ཇི་ཙམ་གྱིས་ཤེས་ཡོན་ཡོད་པ་དེའི་ཚོད་ཀྱིས་ཆོས་བྱེད་མཁན་ཚོས་བདེ་བླག་ཏུ་ཤེས་ཐུབ་པ་དང་དད་པ་ཡང་བརྟན་པོ་ཞིག་ཡོང་གི་ཡོད། དེར་བརྟེན་ཆོས་དང་འཇིག་རྟེན་གང་གི་ཆ་ལ་ཡིནའང་གཞི་རྩའི་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། ང་ཚོ་བོད་གངས་ཅན་ལྗོངས་ལ་དེ་སྔ་དགོན་པ་དང་བཤད་གྲྭ་ཁག་ཏུ་སློབ་སྦྱོང་ཧ་ཅང་ཡག་པོ་ཡོད་ཀྱང་སྤྱི་ཡོངས་མང་ཚོགས་ཀྱི་ཤེས་ཚད་ཧ་ཅང་སྐྱོ་པོ་རེད་འདུག ང་ཚོ་རྒྱ་གར་སླེབས་ནས་དེ་རིང་ཁ་སང་གི་དུས་ཚོད་ལ་བོད་ཕྱི་ནང་གང་དུ་ཡིན་རུང་ང་ཚོས་ཤེས་ཡོན་ཐོག་ཤུགས་རྒྱག་རྒྱུ་དེ་ཧ་ཅང་གལ་ཆེན་པོ་རེད། ངོས་ཀྱིས་རྟག་པར་འབོད་སྐུལ་བྱེད་ཀྱི་ཡོད། འདི་གར་གཞིས་ཆགས་སུ་ཡོད་མཁན་སློབ་ཕྲུག་ཚོས་ཉིན་རེ་བཞིན་དུ་དུས་ཚོད་འཕྲོ་བརླག་མ་བཏང་བར་སློབ་སྦྱོང་ལ་འབད་བརྩོན་བྱེད་དགོས། གཙོ་བོ་དགེ་རྒན་སོགས་ཤེས་ཡོན་དང་འབྲེལ་བ་ཡོད་པའི་ཁྱེད་རང་ཚོ་ཚང་མས་དོ་ཁུར་ཆེན་པོ་བྱས་ཏེ་ང་ཚོ་བོད་ཀྱི་མི་རབས་གསར་པ་དེ་དག་ཕྱིས་སུ་ཆོས་སྲིད་གང་ཅིའི་ཐོག་ལ་ཡང་དངོས་གནས་མི་གོ་ཆོད་པ་ཞིག་ཡོང་རྒྱུར་ཚང་མས་འབད་བརྩོན་བྱེད་རོགས་བརྗོད་རྒྱུ་ཡིན་ཞེས་བཀའ་སློབ་སྩལ་ཡོད། དེ་རྗེས་སྒྲོལ་མའི་མཚན་སྔགས་གསོག་སྒྲུབ་མཛད་ནས་དེར་འདུས་དད་ལྡན་ཆོས་ཞུ་བ་རྣམས་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀའ་དྲིན་ཆེ་བ་སྩལ་གྲུབ་མཚམས་ཧོན་སུར་གཞིས་ཆགས་ཀྱི་སེར་སྐྱ་མི་མང་ཡོངས་ནས་མགོན་པོ་གང་ཉིད་མཆོག་ལ་མདོ་ལུགས་ཀྱི་བཀའ་གསུམ་རྩ་གསུམ་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་སྐབས་རྒྱུད་སྨད་གྲྭ་ཚང་གི་མཁན་རིན་པོ་ཆེ་བཀྲིས་ཚེ་རིང་མཆོག་གིས་མཎྜལ་ལྗགས་བཤད་ཞུས་ཡོད། ཉིན་རྒྱབ་༸གོང་ས་མཆོག་གིས་བོད་ནས་ཆེད་དུ་བཅར་བའི་དད་ལྡན་ཆོས་བ་ཞུ་རྣམས་ལ་ཟུར་མཇལ་དང་བཀའ་སློབ་སྩལ་ཡོད་པ་མ་ཟད། རྒྱུད་སྨད་གྲྭ་ཚང་གིས་གསར་འཛུགས་གནང་བའི་གངས་ཅན་རིག་གནས་སློབ་གྲྭ་དབུ་འབྱེད་མཛད་ནས་ཁུལ་དེར་ཉིན་གྲངས་གསུམ་རིང་བསྐྱངས་པའི་ཆོས་འབྲེལ་ཁག་ཡོངས་སུ་ལེགས་གྲུབ་མཛད་ཡོད་པ་བཅས། །