ཕྱི་ལོ་ ༢༠༠༨ ཟླ་ ༧ ཚེས་ ༢༣ རེས་གཟའ་ལྷག་པ།
༄༅། །༢༠༠༨ ཕྱི་ཟླ་ ༣ པའི་ཚེས་ ༡༠ ནས་བཟུང་ཆོལ་གསུམ་བོད་རིགས་གནས་ཡུལ་ཡོངས་སུ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་བོད་དང་བོད་མིར་འཛིན་པའི་དྲང་བདེན་མིན་པའི་སྲིད་བྱུས་ལ་ཞི་བའི་ངོ་རྒོལ་ཤུགས་ཆེ་བྱེད་སྐབས་རྒྱ་ནག་གཞུང་ནས་སྙིང་རྗེ་སྤུ་ཙམ་མེད་པའི་ཐོག་ལག་ཏུ་མཚོན་རིགས་ཁབ་ཙམ་འཁྱེར་རྒྱུ་མེད་ཀྱང་། རྒྱ་ནག་གཞུང་ནས་བོད་མིའི་ཐོག་དྲག་པོའི་དམག་དཔུང་དང་དེང་དུས་ཀྱི་མཚོན་ཆའི་རིགས་བེད་སྤྱད་དེ་ཉམ་ཆུང་བོད་རིགས་མང་པོའི་རྩ་ཆེའི་ཚེ་སྲོག་ཀྱང་བཅོམ་ཡོད།
ལྷག་པར་དུ་གསུམ་བཅུའི་དོན་རྐྱེན་བྱུང་མ་ཐག་རྒྱ་ནག་གཞུང་གི་འགོ་ཁྲིད་རེ་བཟུང་གིས་སྔར་ནས་ད་བར་རྒྱུན་རིང་གསོ་སྐྱོང་བྱས་པའི་རྒྱ་མིའི་སོ་ཉུལ་ཆེད་མངགས་བཏང་སྟེ་བཙན་བྱོལ་བོད་མིའི་སྤྱི་ཚོགས་སྤྱི་དང་། ལྷག་པར་དུ་ཨོ་ལེམ་པིཀ་རྩེད་འགྲན་དང་དུས་མཚུངས་རྡ་ས་བཞུགས་སྒར་གྱིས་མཚོན་བཙན་བྱོལ་བོད་མིའི་བསྟི་གནས་ཁག་ཏུ་ཟིང་འཁྲུགས་སློང་འཆར་ཡོད་པ་དང་།
བོད་རིགས་སྤྱི་དང་བོད་དོན་རྒྱབ་སྐྱོར་བ་རྣམས་ལ་ཁོང་ཁྲོ་སློང་ཆེད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་ནག་གཞུང་ནས་སྨྱོ་ཧམ་ཆེན་པོས་གཞི་མེད་པའི་སྙོན་འཛུགས་སམ། སྐྱོན་བརྗོད་ཤུགས་ཆེ་བྱེད་བཞིན་ཡོད་སྟབས་བོད་མི་ཡོངས་ཀྱིེས་རང་མི་རིགས་ཀྱི་མཚན་མཐོང་དང་། བོད་ཀྱི་རྩ་དོན་ལ་དགོངས་པ་ཆེ་བཞེས་གནང་སྟེ་དུས་རྒྱུན་དང་། ལྷག་པར་འདི་ལོའི་ཕྱི་ཟླ་བདུན་པ་དང་བརྒྱད་པ་གཉིས་ཀྱི་རིང་ཕྱོགས་བཞི་ཀུན་ལ་དགོངས་བཞེས་དང་སྤྱང་གྲུང་དོད་པོའི་ཐོག་གཤམ་འཁོད་ཀྱི་དོན་ཚན་ཁག་ལ་དོ་སྣང་དང་རང་གི་ཤ་ཁྲག་གཅིག་པའི་བོད་རིགས་ཡོངས་ལ་སློབ་སྟོན་གནང་རྒྱུ་གལ་ཆེ།
༡༽ བཙན་བྱོལ་བོད་མི་དང་གནས་ཡུལ་ཡུལ་མིའི་དབར་འགལ་ཟླ་དང་འཁོན་རྩོད་མི་ཡོང་བ་དང་།
༢༽ བོད་རིགས་ནང་ཁུལ་འཐེན་འཁྱེར་དང་འཁོན་རྩོད་མི་ཡོང་བ།
༣༽ དེ་བཞིན་ས་གནས་ཡུལ་ཁྲིམས་དང་འགལ་བའི་སྐྱོན་འཛུགས་བྱ་གཞི་མ་ཡོང་བ།
བཅས་དོན་ཚན་དེ་དག་གསུམ་ལ་ཐུགས་གཟབ་གནང་རྒྱུ་གལ་ཆེ་ཡིན་སྐོར་བཀའ་ཤག་གིས་ ༢༠༠༨ ཕྱི་ཟླ་ ༧ ཚེས་ ༡༩ ཉིན་གལ་ཆེའི་ནང་དོན་གྱི་གསལ་བསྒྲགས་ཀྱང་གནང་འདུག
